Rim năr, yă Trần Thị Lan, 90 sơnăm, tơ̆ Kueng Bến, xah Ô Loan, dêh char Đăk Lăk oei pơgiơ̆ng unh lơ̆m hnam pai gŏ vă pai xa ăn kơ yă păng ƀok sơnăm ou tŏk 95 sơnăm bơih. Hnam pai gŏ iĕ hăm pơgau gŏ 3 kan, ‘long duơh kram, kơđŏng tanh hăm hre, đing hlôm hlôi so, hơdra tơ̆ kơjung ‘măn dôm kơđŏng kram vă ‘măn tơmam xa atŭm hăm gŏ pai xa gom kơmŏ gŏ. Dôm tơmam yua noh dang ei pă đei ƀôh lơ̆m lơ unh hnam, mă lei tơ̆ ou oei đei tôm. Đơ̆ng hơnih pai gŏ, dôm ‘măng sŏng xa phŏ ‘noh phe peh kok ‘lơ̆ng, phŏ noh lŭk lơ̆k hăm ƀum ƀlang, ƀum iĕ mă yă Lan hlôi rong ‘me 7 ‘nu kon tih vơ̆ djơ̆ ‘lơ̆ng. Hăm yă Lan, hăp ưh hơdrô̆ hơnih pai xa mă oei jing hơnih vei um rup unh hnam đơ̆ng khei năr tơnap tap sơ̆: "Inh rơneh đei 7 ‘nu kon, rong đe sư vơ̆ ‘lơ̆ng tôm. Dang ei vei hơnih pai gŏ ou jĭ hơnih vă chôt vih, kiơ̆ khôi kră sơ̆, hơnih pai gŏ kŭm jing tơdrong hơrih kơ po, jing hnam kơdih po, rim unh hnam kŭm đei hơnih pai gŏ hăm ‘long unh truh kơ hrei ou hloi"

Hăm ƀok Trần Kim Thiên, mă ưh kơsĭ pai xa rim năr lơ̆m hơnih pai gŏ ou nhen yă, mă lei đơ̆ng hơdra unh, kơđŏng, ‘long duơh, đing hlôm truh kơ dôm kơđŏng iĕ tanh hăm hre... noh ƀok kơdih pơm tơlĕch. Dôm tơmam yua yak atŭm hăm yă ƀok đĭ jơhnơr hơrih păng pơtoi oei truh khei năr kơdŭ kŏk sŏk ko. Hơnih pai gŏ so păng rim tơmam yua,, hlôi hram lơ̆m đon bơnôh păng tơdrong tơƀlŏk kơ minh unh om hlôi găn ga hloh tong hơnê̆ hơnglŏ sơnăm: " ‘Nhŏng brŏk tanh brong jak/Jĭt ‘long mơnai, iŏk hơkăn oei rơkah. Kơđŏng iĕ ou noh inh năm tơ̆ bri koh hre brŏk tanh jak, đơ̆ng kră sơ̆ yă ƀok bơ̆n kŭm tanh jak ou, tanh kan ‘măn gŏ vă hăp huai kơ tŏ"

Tơ̆ lơ tơring pơsĕl kơ dêh char Đăk Lăk, rim năr đơ̆ng hơnih pai gŏ gah rŏng hnam, ‘nhui păr chră chrang jơ̆p groi teh, kueng ƀôt. Hăm unh hnam ƀok Phan Hữu Lộc tơ̆ thôn Mỹ Phú 1, xah Ô Loan dah mă unh hnam yă Trần Thị Lịch tơ̆ thôn Phú Hữu, xah Hòa Thịnh, ‘noh đơ̆ng gŏ rơ̆ đak hla ah rim pơgê hrôih, truh tơ̆ gŏ chăo iĕ, dah mă ‘măng sŏng xa rim năr kŭm đei pai pơjing đơ̆ng hnam pai gŏ ou. Đei hnam pai gŏ đei pơdjoi đơ̆ng jơhnơr mă ou truh jơhnơr mă nai păng dang ei oei đei yă ƀok, mĕ ƀă răk vei, vă ah năm tơ̆ yơ đe kon sou adoi oei hơdơ̆r vih tơ̆ pơlei pơla. Hăp noh pơhngol kơ pơlei pơla, jing đon bơnôh, jing um rup juăt jue kơ unh hnam. Yă Trần Thị Lịch ƀrơ̆k kơ jơhngơ̆m:  "Hnam pai gŏ ou hlôi rong ‘me tôm unh hnam, pai por ‘nhot noh tôm kon sou brŏk sŏng xa. Têt noh pơtơm chhŭt ‘long unh, dah mă tah ngar noh unh ngơ ngŭr khơ̆ng hơnơ̆ng đĕch. Đe kon hơ-ioh chă brŏk akhan, sŏng xa tơ̆ yơ kŭm ưh kơ hơtŏ hăm por ‘nhot mĕ pai. Mă por ‘nhot tơ̆ pơlei pơla ưh đei hơtŏ tơ̆ pơlei tơm, mă lei por ‘nhot mĕ pai xa layơ kŭm ‘lơ̆ng hloh, ‘noh năm hơtaih đơ̆ng pơlei pơla ling lang ƀlŏk kơ mĕ ƀă"

‘Nhŏng Phạm Văn Long, kơdră thôn Mỹ Phú 2, xah Ô Loan ăn tơbăt, unh hnam ‘nhŏng đơ̆ng đunh tơplih yua ƀêp gas păng khei năr tơjê̆ ou noh yua ƀêp tư. ‘Nhŏng tơroi, tơdrong hơrih tơplih, hnam pai gŏ kơ unh hnam đe mơlôh roi năr roi pha, mă lei rim ‘măng ƀôh hnam pai gŏ so tơ̆ pơlei pơla, ‘nhŏng nhen vih hơdơ̆r hăm khei năr đei mĕ, đei yă pai pơ-‘nhŏ ăn sŏng xa, ƀĭch tep rim năr. ‘Nhui unh dang ei ƀônh pơm hang măt, kơlih đon vơch ƀrơ̆k hơdơ̆r:  "Hơdrol sơ̆, yă ƀok bơ̆n pai xa hăm ‘long unh, dang ei oei đei yă ƀok pai xa hăm ‘long unh mơ̆n. Rim ‘măng inh ƀôh hơnih pai gŏ thoi ou noh inh ƀlŏk kơ pơlei pơla, inh ƀlŏk kơ sơnăm mơlôh inh sơ̆, inh ƀlŏk kơ pơlei pơla joh ayŏ păng khôi juăt so Việt Nam bơ̆n. Hnam pai gŏ đei kơdih tơdrong sô̆ ‘lơ̆ng, hăp pơm ăn kơ bơ̆n tơnŏ lơ̆m jơhngơ̆m đon hloh"

Bơngai ayơ mă đei rơneh tih vơ̆ tơ̆ tơring pơsĕl, jăk đơ̆ng pơlei pơla, truh minh năr ƀôh dơ̆ng um rup hnam pai gŏ hăm ‘nhui unh păr chră chrang gah jih rŏng hnam, ‘nhui păr jơ̆p groi teh pơlei pơla, dah mă đei ƀou hơyuh hơnong ƀa ‘noh măt mơn hang yuơ kơ ƀlŏk hơdơ̆r. Um rup noh, hơyuh ‘long unh hăp ưh kơsĭ tơmam drăm kăp kơ jên, mă lei hăp akŏm ƀenh păng hram đunh lơ̆m rim đon bơnôh kơ rim bơngai mă năm hơtaih dang yơ hơdoi oei ƀlŏk hơdơ̆r ling lang.