Tơdrong akŏm dôm bơngai pai xa rơgei truh đơ̆ng Việt Nam, Thái Lan păng Malaysia, 3 teh đak pran kơtang gah pơtăm păng pơjing tơmam xa đơ̆ng plei sâu riêng. Tơ̆ talkshow, dôm bơngai pai xa hlôi pai pơdah 7 tơmam xa. Dôm tơmam jĭ tơdrong tơguăt đơ̆ng sâu riêng Đăk Lăk hăm trong pai ‘nhot xa kơ 3 teh đak, đơ̆ng ‘nhot xa pơih blŭng, truh ‘nhot xa dơnơm lơ̆m ‘măng sŏng truh tơmam xa mă hơtuch đĭ đăng. 

Lơ bơngai juăt jang akhan, sâu riêng Đăk Lăk jĭ mŭk drăm tih vă pơm tơlĕch dôm tơmam xa ‘nao, tơgop hơtŏk kơjă tơmam choh pơtăm ah mă tơguăt tơmang pơhiơ̆ hăm chă hơlen băt gah joh ayŏ. Ƀok Lý Kim Long, Phŏ Kơdră Jơnŭm Bơngai pai gŏ gơh hơgei Việt Nam, tơroi: " ‘Năr ou inh khŏm mă pai ka hơdang hăm sâu riêng, inh rơih hơdang ‘lơ̆ng hloh kơ tơring Phú Yên so vă pai hăm sâu riêng jing tơmam xa kăp gĭt kơ Đăk Lăk. Inh adoi ‘meh hơlen lăng vă pai hăm sâu riêng lơ̆m dôm ‘nhot xa nai, pơjing đei tơmam xa chrih ‘nao ăn tơmoi, hơtŏk tơdrong tĕch tơlĕch, tơgop hơtŏk ăn tơmang pơhiơ̆ kơ Đăk Lăk pơma hơdrô̆ păng kơ Việt Nam bơ̆n pơma atŭm"

Kiơ̆ Jơnŭm pơgơ̆r, talkshow ưh hơdrô̆ tơroi gah dôm trong tơguăt ‘nao lơ̆m pơm tơlĕch tơmam xa đơ̆ng plei sâu riêng mă oei pơkăp pơjing tơmam drăm tơmang pơhiơ̆ kăp gĭt đơ̆ng tơmam choh pơtăm kơ tơring. Minh ƀar tơmam xa trŏ ƀlep gô đei hơlen păng pơtruh ăn nha hang, khăch sạn, lơ̆m tơring vă jong ăn tơmoi lơ̆m Lêh akŏm Sâu riêng Đăk Lăk pơgơ̆r ah khei 8 ou kơnh. Ƀok Nguyễn Quốc Hiệp, Phŏ Kơdră Hơnih Joh ayŏ, Tơplŏng kơdou păng Tơmang pơhiơ̆ Đăk Lăk ăn tơbăt:  "Nhôn hơvơn bơngai pai xa rơgei vă pai pơjing tơmam xa ‘nao đơ̆ng plei sâu riêng, vă hơlen băt gah tơmam xa ‘nao, hơtŏk kơjă kăp gĭt kơ plei sâu riêng tĕch răt lơ̆m teh đak adoi nhen tĕch tơlĕch tơ̆ teh đak đe, hơ-‘nhăk lơ tơdrong kăp gĭt hloh dơ̆ng hăm tơdrong jang sâu riêng tơ̆ tơring bơ̆n dou".