Lơ̆m dôm năr ou, rim bơngai jang lơ̆m Hơp tak xah Ƀa Yŏng (Ƀa Mĕ) Phan Lâm, xah  Phan Sơn, dêh char Lâm Đồng tŏk bŏk oei hơmet pơm 'nao hơnih 'măn tơmam drăm kơ Hơp tak xah. Pơmai Nguyễn Thị Hoa, jang lơ̆m Hơp tak xah ăn tơbăt: “Inh chơt hơ-iă dêh păng ƀôh lăp 'lơ̆ng gah đon bơnôh. Mă mônh 'noh tơm ƀa, hăp jĭ tơdrong hơrih, jĭ “găr dơmŏng” plĕnh pơsư̆ ăn, lơ̆m kơplah noh nhôn păng dôm bơngai xa yua hăp, adoi tam mă hlôh vao hơdah gah tơm a la chă kơ hăp, hăm bơngai jang chŭn mir adoi hiơt hiong tơdrong kăp gĭt tơm a la chă ou. Inh hơpơi 'meh, ning nai kơnh đei lơ bơngai băt truh tơdrong kăp gĭt kơ tơm Ƀa Yŏng adoi nhen dôm tơmam drăm đei pơm tơlĕch đơ̆ng cham char, vă đơ̆ng 'noh rim bơngai hlôh vao hơdah hloh gah um ai tơdrong hơrih păng dôm tơmam drăm mă kơdih đei dang ei”

Hăm tơdrong mă tơm Ƀa Yŏng jê̆ hiơt hiong, sơnăm 2024, unh hnam ƀok Nguyễn Văn Chung, dang ei noh Kơdră Hơp tak xah Ƀa Yŏng Phan Lâm hlôi pơtơm pơtăm Ƀa Yŏng kiơ̆ pơkăp pơ-'lơ̆ng rơgoh hăm tơdrong tơgŭm kih thuơ̆t đơ̆ng Viê̆n Khua hŏk Kih thuơ̆t Choh jang xa tơring Pơbah. Ƀơ̆t blŭng, ƀok Chung pơm jang lơ̆m 2ha teh păng đei yua lơ ƀiơ̆. Sơnăm 2025, ƀok Chung pơih să teh pơtăm tŏk truh 5ha tơ̆ tơring teh kơ pơlei Phan Lâm so (Danao Ghe).

Hăm dôm tơdrong jang đei, dang ei ƀok Chung hlôi hơvơn kon pơlei pơih să teh pơtăm Ƀa Yŏng tŏk jê̆ 10ha. Tơmam pơm jang đei gô đei Hơp tak xah Ƀa Yŏng Phan Lâm păng Kŏng ti Bách Mộc Global răt iŏk.

Hăm kon pơlei Raglai păng K’ho tơ̆ xah Phan Sơn, dêh char Lâm Đồng, găr ƀa yŏng đei lăng kăp gĭt thoi lĕ "găr dơmŏng”. Hăm lơ tơdrong phara băl, truh dang ei đei minh ƀar unh hnam kon pơlei oei pơtăm ƀa yŏng lơ̆m teh iĕ. Kră pơlei Mang Ngọc Văn, bơngai Raglai ăn tơbăt, kiơ̆ lơ jơhnơr bơngai, unh hnam ƀok adoi oei pơtăm ƀa yŏng nhen lĕ minh trong vă vei răk tơƀăk mong tơdrong juăt jue: “Tơdrong mă Hơp tak xah pơm hơnih 'măn tơmam drăm rơgoh 'lơ̆ng kơ tơring noh 'lơ̆ng tơpă, mă kăl noh gah Ƀa Yŏng.  Kơlih hơdrĕch Ƀa Yŏng tŏk bŏk oei ƀơm hiơt hiong, minh tơring teh pơtăm iĕ ioch, dang ei đei hơtŏk ăn kon pơlei pơtơm hơlơ̆k dơ̆ng, năr Et jur xa kơ kon pơlei sơnăm ou hơmŏ gô kơdrơ̆m bơngai hloh, lơ phe ƀa hloh”

Tang măt ăn Kŏng ti Bách Mộc, ƀok Lục Hoà ăn tơbăt, kŏng ti răt tôm Ƀa Yŏng kiơ̆ 3 tơchơ̆t tơm: Choh jang xa lơ̆m hơnih teh ưh đei yua phŏng; Vei sơđơ̆ng tơmam sŏng xa păng sơđơ̆ng pơyua ăn tơpôl tơ̆ tơring; Atŭm hăm tơring hơtŏk tơdrong hơrih ăn kon pơlei kon kông. Păng ah mă hơdrĕch Ƀa Yŏng tŏk giơ̆ng 'lơ̆ng 'noh Kŏng ti Bách Mộc pơtơm asong dôm hơdrĕch ƀa hmă nai kơ tơring: “Gah tơdrong tơlĕch jang 'noh Bách Mộc gô asong ăn hơdrĕch, jên jang păng tơmam choh pơtăm, păng gô tơgŭm lơ̆m vei lăng kiơ̆ trŏ tơchơ̆t rơgoh 'lơ̆ng. Ah jang đei trŏ thoi 'noh bơih, gah kŏng ti tơgŭm răt tôm ƀa jang đei. Hăm trong tơlĕch jang đơ̆ng Bách Mộc dang ei tŏk bŏk pơyua tơpă ăn kon pơlei jang chŭn mir. Mă mônh đe sư ưh đei yua phŏng, pơgang huă chơ̆t. Mă ƀar đe sư ưh đei pơngơ̆t gah ƀa lơ dah mă tŏ sĕt, đe sư hơdrô̆ pơm kiơ̆ trŏ tơchơ̆t đĕch. Păng mă pêng noh tơdrong hơrih kơ đe sư gô đei vei sơđơ̆ng mưh đe pơm jang trŏ tơchơ̆t tơlĕch păng jang tơpă”

Ƀok Mai Hồng Đăng, Kơdră Hơnih jang vei lăng kon pơlei xah Phan Sơn, dêh char Lâm Đồng ăn tơbăt, Ƀa Yŏng ưh hơdrô̆ jĭ tơmam kăp gĭt kơ tơring mă oei akŏm lơ tơdrong kăp gĭt gah juăt jue tơguăt hăm tơdrong hơrih đon lui kơ kon pơlei tơ̆ ou: “Dang ei nhôn hlôi pơjing Hơp tak xah Phan Lâm, ưh hơdrô̆ juăt jang gah Ƀa Yŏng mă oei pơtăm hloi dôm tơmam drăm rơgoh 'lơ̆ng nai. Pơtih nhen pơtăm pơmou, đang kơ 'noh pơtăm tơm va ni, cà ri... Lơ̆m khei năr truh, tơring adoi lăng truh dôm tơmam choh pơtăm nai mă tơring kĕ jang kơtang”

Khei năr ou ki, atŭm hăm tơdrong jang vei răk tơƀăk mong joh ayŏ, dêh char Lâm Đồng adoi tơrĕk truh hơtŏk tơmang pơhiơ̆ tơpôl tơguăt hăm tơdrong joh ayŏ kơdŏ suang tơ̆ tơring. Dang ei lơ tơdrong jang tơmang pơhiơ̆ pơlei pơla 'lơ̆ng hlôi đei iung jang nhen: tơdrong tơmang pơhiơ̆ pơlei pơla tơ̆ thôn Đưng K’Si (xah Lạc Dương), pơlei joh ayŏ kon kông Dao (xah Đắk Wil), pơlei joh ayŏ kon kông Mông (xah Tà Đùng), tơdrong jang tơmang pơhiơ̆ pơlei pơla joh ayŏ Chăm (xah Bắc Bình)… hơvơn lơ tơmoi lơ̆m păng 'nguaih kơ teh đak truh tơmang lăng. Lơ tơdrong akŏm khôi et xa juăt jue kơ kon pơlei K’ho, Raglai, M’nông, Chu Ru, Mạ, Chăm… hlôi jing tơmam drăm tơmang pơhiơ̆ 'lơ̆ng hơ-iă, tơgop pơjing tơdrong 'lơ̆ng ăn tơmang pơhiơ̆ joh ayŏ kơ tơring.  

Ƀa Yŏng đơ̆ng kră sơ̆ đei lăng jĭ “găr dơmŏng” đơ̆ng plĕnh pơsư̆ ăn, tơguăt hăm tơdrong hơrih, đon lui kơ kon pơlei K’ho, Raglai tơring groi kông xah Phan Sơn, dêh char Lâm Đồng. Ning mônh, găr Ƀa Yŏng - “găr dơmŏng” tơ̆ xah groi kông Phan Sơn oei kiơ̆ rok jơ̆ng tơmoi năm truh jơ̆p tơring kơ Teh đak.