Đơ̆ng dang 4 jơ 1 puăt pơgê, pơlei jang ka Mũi Né (phường Mũi Né, dêh char Lâm Đồng) mơsưt mơsat ƀơ̆t dôm khŭl duk ka vih hơlơ̆k đơ̆ng rŏng 1 ‘măng jang tơ̆ đak dơsĭ. Kơhrĕng tong duk ka păng thŏng an kơthŭng akŏm tơ̆ đak dơsĭ, ƀơ̆t mă tơ̆ hơla hơnih đak dơsĭ, tơdrong jang chă răt iŏk ka hơdang hlôi pơtơm rơ ông. Lăng kơ pal, kơhrĕng tong duk ka păng thŏng nan kơthŭng dơ̆ng tơ̆ tơnŏk lơ̆m hơnih đak dơsĭ hlăng hlơ hlơr, pơm jing hơnih tôch kơ hơiă kơ plei jang ka Mũi Né mưh rim pơgê hrôih.

Tơ̆ âu, thŏng nan kơthŭng jĭ thŏng an ưh kơ gơh kơƀăh chơ bơngai păng ka hơdang đơ̆ng duk ka tŏk tơ̆ kông. Tơdrong kơchơ pơgê hrôih mơsưt mơsat ƀơ̆t kon pơlei păng bơngai mơdro akŏm tơ̆ hơnih đak dơsĭ răt iŏk ka hơdang ‘nao đei hơnhăk tŏk tơ̆ kông. Dôm kơthŭng ka hơdrih đei kon pơlei tơtĕnh klah, rơih hloi tơ̆ hơnih đak dơsĭ hơdrol kơ chơ truh tơ̆ dôm kơchơ păng anih răt iŏk.

Đơ̆ng rŏng akŏm kơchơ, dôm bơngai jang ka tơgĕch pleh hơmet păng sĭt dơ̆ng hơnhoăl, hơmet ăn vă năm chă rôp yâu ka dơ̆ng. Đak dơsĭ och, lơ bơngai tơgĕch dônh hơbâu păng rơih ka hơdang tơ̆ jih đak dơsĭ, tơgop hơtŏk dơ̆ng iŏk yua. Đơ̆ng rŏng dôm jơ jang hăt hot, plei jang ka hơlơ̆k dơ̆ng tơdrong hơrih sa sơđơ̆ng hiôk. Khŭl duk ka pơdơ̆ng tơ̆ kơpal đak dơsĭ tŏk bŏk ‘năr tŏ ƀrach.

Ưh khan lăp jing hơnih jang sa đơ̆ng lơ jơhnơr kon pơlei jang ka, plei jang ka Mũi Né oei chĕp vei dôm tơdrong oei sa ‘lơ̆ng hơiă hơdrô̆ đơ̆ng kon pơlei oei sa tơter đak dơsĭ. Dôm ‘măng duk vih hơlơ̆k ƀơ̆t pơgê hrôih, tơdrong tĕch mơdro ka hơdang mơsưt mơsat, um rup hao thŏng nan kơthŭng, sĭt hơnhoăl dăh mă kơhrĕng tong duk ka pơdơ̆ng tơ̆ hơla ‘năr tŏ hrôih hlôi pơjing um rup bơ̆jang hmă mă lei ƀĕnh tơdrong hơrih ‘lơ̆ng.

Kơlih đơ̆ng tơdrong hơrih hmă ‘noh hlôi tơgop pơm đei tơdrong ‘lơ̆ng hơiă hơdrô̆ đơ̆ng Mũi Né, hơnih tơmoi tơmang lăng ưh khan lăp tơchă ƀôh tơdrong hơiă đơ̆ng đak dơsĭ mă oei ƀôh đei tơdrong tơpă đơ̆ng 1 pơlei jang ka đơ̆ng sơ̆ oei chĕp vei kiơ̆ lơ jơhnơr.