Vang năm hŏk lăm pơhrăm đei 30 'nu jĭ đe hơ-ioh, hơdruh tơdăm păng ngê̆ nhơ̆n bơngai ÊĐê tơ̆ xah Ea Phê. Lơ̆m  25 'măng hŏk, rim bơngai hŏk đei Ngê̆ sih ưu tŭ Y Phôn Ksơr păng Ngê̆ sih ưu tŭ Vũ Lân kơtă pơtho tôn chĭng chêng, hơsuang păng tôn pơre dôm ƀai chêng so kơ kon pơlei Êđê. Atŭm hăm hŏk gah lĭ thuyêt, bơngai hŏk gô đei tôn kiơ̆ hloi, atŭm hăm noh chih akŏm, kuay video, tơmơ̆t lơ̆m kơmăi kơsô̆ gah tơdrong jang vei răk tơƀăk mong mŭk drăm kră sơ̆. Oh Y Li San Kbuôr, tơ̆ pơlei Puăn, xah Ea Phê chơt hơ-iă tơroi: “Lơ̆m pơlei ou đei khul tôn chĭng chêng, inh lăp dêh. Inh 'meh pơhrăm tôn chĭng chêng vă akŏm lơ̆m khŭl. 'Năr ou đei hŏk inh chơt hơ-iă dêh”.

Hơdrol kơ noh, ah năr 7/7, hơnih jang joh ayŏ pơih lăm pơtho tôn hơgơ̆r đôi, mông 3, chĭng chêng 5 kơ kon pơlei Bahnar tơ̆ thôn Xí Thoại, xah Xuân Lãnh; năr 8/7 pơtơm lăm pơtho hơgơ̆r đôi, mông 3, chĭng chêng 5 tơguăt hăm hơsuang kơ bơngai Chăm Hroi tơ̆ Hnam trưng Phôh thŏng Kon kông teh đak rong 'me Đinh Núp, xah Phú Mỡ. Atŭm hăm lăm pơhrăm tơ̆ xah Ea Phê, 'măng mă ou Đăk Lăk pơih 3 lăm pơtho gah joh ayŏ kon kông, rim lăm đei 30 bơngai hŏk păng hơmŏ keh đang hơdrol kơ năr 30/8.

Kiơ̆ đơ̆ng yă Nguyễn Thụy Phương Hiếu, Kơ iĕng Kơdră Hơnih cvei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Đắk Lắk, đơ̆ng rŏng 3 lăm pơtho mă blŭng, hơnih vei lăng joh ayŏ gô hơnơ̆ng pơih dơ̆ng lăm đơ̆ng Tơdrong jang tơm teh đak păng tơlĕch jang kiơ̆ rim trong jang tơgŭm djru ‘nao găh vei lăng năng tông tôn chĭng chêng: “Dôm lăm pơtho ou jang kiơ̆ Tơdrong jang 1719 iŏk đơ̆ng sơnăm 2025 pơtruh ăn, pă dôm yơ ‘noh đơ̆ng tơdrong jang kơ sơnăm 2026 ‘noh gô đei lơ lăm pơtho ăn dơ̆ng, akom tơlĕch jang kiơ̆ dôm tơdrong jang kơ Tơdrong iung jang kơsô̆ 14 đơ̆ng dêh char adoi nhen Tơdrong tơchơ̆t kơsô̆ 03. Jei hơpơi ‘meh vă rim tơring, phương pơjing rim khul tôn chĭng chêng kiơ̆ tơdrong pơkăp ‘nao kơ Tơdrong tơchơ̆t 215 đơ̆ng Khul kơdră chĕp pơgơ̆r teh đak, mưh đei iung jang ‘noh sơng iŏk đei tơdrong tơgŭm djru tôch hơ iă”.