Dôm năr hơtuch giĕng vưh ou, tơring dơnou đak Ea Kao, phương Ea Kao, dêh char Đăk Lăk jing hơnih truh hăt hot hăm kơ rơbou kon pơlei păng tơmoi. Dôm tơdrong akŏm pơdơh pơdei vơ̆r  SUP, tơpăr klang dah mă păr yu tŏk bŏk pơjing minh tơdrong tơmang ‘nao, hơlen băt păng tơguăt hăm cham char plenh teh. Đơ̆ng minh hơnih dơnou đak rơngươ̆, dơnou Ea Kao tŏk bŏk jing hơnih truh pơdơh hơtuch giĕng kơ kon pơlei păng tơmoi. Ƀok Lê Trương Quân, tơ̆ pơlei Cư Mlim, xah Ea Kao chơt hơ-iă ah mă tơring đei hơnih tơmang pơhiơ̆ ‘nao: “Dôm năr ou inh ƀôh tơmoi năm truh dơnou Ea Kao tôch lơ, mă kăl noh ah kơsơ̆. Tơ̆ ou đei lơ tơdrong akŏm nhen vơ̆r thŏng, hơri hơsuang, tơmoi truh tơmang sô̆ chơt dêh. Inh adoi kơtơ̆ng truh tơ̆ cham golf tơ̆ Ea Kao mă lei truh dang ei tam mă đei pơm, adoi hơpơi ‘meh đei pơjing ăn Ea Kao gơh hơtŏk hloh, tơmoi truh tơmang roi năr roi lơ hloh, kon pơlei đei trong jang xa sơđơ̆ng hloh”.

Tơdrong pơm cham golf Ea Kao hlôi oei lơ̆m pơkăp đơ̆ng lơ sơnăm mă lei truh dang ei adoi tam mă đei pơtơm. Mưh đei asong jang drơ̆ng minh atŭm hăm hơnih pơdơh pơdei, tĕch pơdro păng hơlen lăng tăp dăr dơnou đak, tơring ou gơh pơm jang đei yua hloh kơ cham char, atŭm hăm noh asong đei tơdrong jang păng hơtŏk kăp gĭt ăn tơdrong jang tơmang pơhiơ̆ tơ̆ tơring.

Đăk Lăk đei mŭk drăm gah tơmang pơhiơ̆ mă lei truh dang ei tam mă đei cham golf trŏ tơchơ̆t đei tơmơ̆t jang. Lơ̆m kơplah noh, tơmang pơhiơ̆ cham golf jĭ tơdrong kăl vă hơtŏk tơ-iung tenh, hơvơn lơ tơmoi jang xa jên khei lơ truh oei tơmang pơhiơ̆. Kơyươ noh, pơkăp ‘nao vă hơtŏk tơ-iung 6 cham golf hăm jên asong jang hloh 11.000 tih hlj tơ̆ Ea Kao, Buôn Đôn, Bình Kiến, Tuy An Nam... vă pơjing tơmam drăm tơmang pơhiơ̆ golf tơguăt hăm pơdơh pơdei, joh ayŏ păng cham char. Kiơ̆ kơ ƀok Trần Tiến Lợi, Kơdră Jơnŭm jang gah Teh hnam oei dêh char Đăk Lăk, ou jĭ tơdrong jang kơtang ăn tơmang pơhiơ̆ tơ̆ tơring: “Bơ̆n ưh gơh lăng golf ƀônh ƀŏ nhen tơdrong tơplŏng kơdou pơchơt mă athei lăng jĭ trong jang mŭk drăm dơnơm. Pơjing jơnŭm jang hơdai, tơguăt pơm jang mă kơjăp, cham golf, cham gre păr, hơnih oei xa păng hơnih tơmang lăng, vă pơjing đei tơmam drăm tơmang pơhiơ̆ hơdai. Dôm tơdrong pơkăp pơjing cham golf ‘lơ̆ng kơjăp hlôi pơjing tơring teh phui phang jing dôm hơnih teh maih, pơjing đei kơ rơbou tơdrong jang ‘nao”

Ưh hơdrô̆ cham golf, pơkăp hơmet đơ̆ng rŏng kơ hơgrop oei pơih trong hơtŏk jang tơmang pơhiơ̆ ‘nao ah ‘măng mă blŭng Đăk Lăk akŏm mŭk drăm bri kông păng dơsĭ. Lơ̆m hơnăn 257 tơdrong jang hơvơn jang ah jăl mă blŭng, đei 32 tơdrong jang gah tơmang pơhiơ̆ pơdơh pơdei, cham golf păng tơplŏng kơdou hăm kơsô̆ jên jang jê̆ 127 rơbou tih hlj. Tơring gah hơlĕch đei sơkơ̆t hơtŏk hơnih pơdơh pơdei đak dơsĭ, cham golf păng tơring kơdrơ̆m tĕch pơdro; gah pơmơ̆t iŏk yua mŭk drăm bri, choh jang xa păng joh ayŏ kơ jê̆ 50 hơdrung bơngai kon kông vă pơjing tơmam drăm tơmang pơhiơ̆ kăp gĭt.

Kiơ̆ kơ ƀok Lê Phúc Long, Phŏ Kơdră Hơnih Joh ayŏ, Tơplŏng kơdou păng Tơmang pơhiơ̆ dêh char Đăk Lăk, pơkăp ‘măng mă ou ưh hơdrô̆ pơih să cham char hơtŏk tơ-iung mă oei pơm trong hiôk ăn khôi luơ̆t kăp gĭt vă hơvơn rim hơnih asong pơm jang: “ ‘Nou jĭ tơdrong pơkăp khôi luơ̆t kăp gĭt hloh vă hơvơn rim hơnih asong jang pran kơtang, truh asong jang gah tơmang pơhiơ̆, pơdơh pơdei, tơmang lăng cham char. Tơdrong tơm tơmang pơhiơ̆ Đăk Lăk lơ̆m khei năr truh ‘noh asong pơm tơlĕch dôm tơdrong tơmang pơhiơ̆ jơk, kơjăp sơđơ̆ng păng ‘lơ̆ng hăm cham char”

Vă sơkơ̆t hơdah lơ̆m pơkăp dah hrôih jing tơpă, Đăk Lăk sơkơ̆t hơdah atŭm hăm keh đang hơnih pơm jang gô akŏm pơjing tơdrong asong jang hơtŏ hơnơ̆ng, kơchăng akŏm groi teh ‘lơ̆ng, pơklaih tơhlăk tơhlĭn gah tơdrong hrŭ ‘mong teh iŏk jang păng yak hơdoi hăm hơnih jang mŭk drăm lơ̆m tơdrong tơlĕch pơm jang. Ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk sơkơ̆t hơdah: “Dêh char Đăk Lăk pơkăp yak hơdai hăm hơnih jang mŭk drăm lơ̆m tơdrong pơm jang, kơchăng asong teh ming man hơnih jang, hơtŏk tenh tơdrong hrŭ ‘mong, tơgŭm hơnih oei xa ăn kon pơlei ƀơm iŏk teh vă pơm jang. Hăm dôm tơdrong jang tơm, tơdrong jang kăl hơtŏk mŭk drăm tơpôl kơ dêh char, đe kơdră dêh char gô kơtă pơgơ̆r jang vă pơklaih tơnap tap, tơhlăk tăk, vă vei sơđơ̆ng ăn tơdrong hrŭ ‘mong mưh iŏk teh pơm ‘noh athei jang hơdai hloi, trŏ nhen tơchơ̆t tơlĕch”.

Đơ̆ng jơhngơ̆m pran ‘nao tŏk bŏk oei đei pơjing tơ̆ dơnou đak Ea Kao truh tơchơ̆t jang pơih să đơ̆ng bri kông klĕch tơ̆ đak dơsĭ, Đăk Lăk tŏk bŏk oei đei trong hiôk vă pơm jang hơdah tơchơ̆t pơjing cham char hơtŏk tơ-iung ‘nao.