Kiơ̆ tơdrong tơm jang hơdai, tơdrong  “Hla kak Khánh Hòa athei pơlong lăng” gô roi tơƀôh hơnăn dôm hơnih năm chă tơmang lăng, tơmam sa păng hơnih tĕch tơmam sa ‘lơ̆ng yua đơ̆ng anih jang chă tơmang lăng dêh char rơih iŏk, hơlen lăng hơdăh păng tơroi kiơ̆ rim jơ năr. ‘Moi kiơ̆ ứng dụng, tơmoi gơh chă pơih lăng tơdrong tơroi, băt hơnih truh, krao gre, pơkă răt tơmam sa dăh mă pơkă hloi kơƀang lơ̆m 1 hơnih. Tơdrong jang gô tơlĕch jang dôm hơpăh vă pơtrŭt tơmoi chă lăng dôm hơnih ‘lơ̆ng kơ  Khánh Hòa.

Ƀar pah kŭm gô jang hơdai pơjing hơnăn “Dôm tơmam sa athei sa pơlong lăng” păng “Hơnih tĕch tơmam et sa đei ư hơnhang Khánh Hòa", roi tơƀôh dôm kơjă kăp gĭt tơmma sa kơ tơring, hơdai hăm tơgŭm dôm anih tĕch mơdro gơh yua kơmăy kơsô̆, pơih să tơdrong tơgoăt hơdai hăm tơmoi chă tơmang lăng. Pơma tơ̆ lêh kĭ pơkăp, yă Thái Thị Lệ Hằng, Kơdră Anih vei lăng găh Joh ayŏ, Tơplŏng kơdâu păng Chă tơmang lăng dêh char Khánh Hòa tơbăt, tơdrong jang hơdai ‘noh jĭ yak năm hơdăh vă bơ̆jang kiơ̆ ‘lơ̆ng tơdrong hơgăt tơplih kơsô̆ đơ̆ng anih jang chă tơmang lăng, hơtŏk đei yua kơmăy kơmŏk vă tơgoăt dôm tơdrong đei yua ƀônh, roi tơƀôh jơnei hơnih truh, joh ayŏ kơdŏ soang păng tơmam sa tơring. Kiơ̆ đơ̆ng noh tơgop hơtŏk ‘lơ̆ng tơdrong chă năm lăng, chă ngôi đơ̆ng tơmoi, hơtŏk jơhngơ̆m kĕ pơjei đơ̆ng hơnih truh Khánh Hòa păng yak truh tơdrong hơgăt hơnhăk tơring jing rơih iŏk hơdrol hloh đơ̆ng tơmoi lơ̆m teh đak păng apŭng plĕnh teh:

“Anih jang kơ dêh char kĭ pơkăp jang hơdoi hăm Grab roi tơbăt ứng dụng tơƀôh 1,2 anih, hnam et sa hăm hơnăn krao “Hơnih tĕch tơmam et sa đei ư hơnhang” vă roi tơƀôh ăn bơngai chă tơmang lăng. Mưh đe truh tơ̆ Khánh Hòa pơih ứng dụng Grab, gô ƀôh hloi anih et sa tơ̆ Khánh Hòa lơ̆m noh. ‘Nâu jĭ tơdrong jang mŭk drăm kơmăy sô̆ păng chă tơmang lăng rơgei”.

Tơdrong tơlĕch kơmăy sô̆ đei ƀat mă tơdrong chă tơmang lăng Khánh Hòa hơnơ̆ng tŏk pran, hăm dang 12 triu ‘nu bơngai chă tơmang lăng truh, lơ̆m noh hlŏh 4,6 triê̆u ‘nu bơngai đơ̆ng teh đak đe truh tơ̆ Khánh Hòa lơ̆m sơnăm ‘nâu; iŏk yoa đơ̆ng chă tơmang lăng đei hlŏh 42.000 ti hlak jên. Đơ̆ng ‘năr 17 truh 19/7 âu kơnh, Festival Đak dơsĭ Khánh Hòa 2026 gô đei pơgơ̆r hăm hlŏh 40 tơdrong joh hơri hơsoang, tơplŏng kơdâu păng chă tơmang lăng, tơchĕng adrol sơng đei đơ̆ng 600.000 truh 800.000 ‘nu kon pơlei păng tơmoi chă tơmang lăng, pơjing jơhngơ̆m pran ăn khei tơmang lăng pơyan he.