Tơdrong chă tơmang lăng chơt hơiă tơ̆ dôm hơnih truh păih Pơbăh dêh char Khánh Hòa, tơring teh Ninh Thuận hơdrol sơ̆. Dôm hơnih chă ngôi tơ̆ đak dơsĭ Ninh Chữ, Vĩnh Hy, hơnih ngôi pơdơh tơ ter đak dơsĭ, hơnih chă năm lăng joh ayŏ kơdŏ soang, plei tơdrong jang joăt joe nhen Bàu Trúc, Mỹ Nghiệp mơ sưt mơ sat tơmoi tơmang lăng. Tơdăh Nha Trang ‘lơ̆ng hơiă hăm chă tơmang lăng tơ̆ đak dơsĭ, pơdơh ngôi, ‘noh Phan Rang - Ninh Thuận so đei tơdrong ‘lơ̆ng găh cham char bri brăh, đei tơdrong joh ayŏ kơdŏ soang, đei lơ tơmam ‘lơ̆ng đơ̆ng choh jang sa. ‘Nhŏng  Huỳnh Trọng Lượng, đơ̆ng Nha Trang năm tơ̆ Phan Rang đei nơ̆r pơma thoi âu:

“Tơdrong joh ayŏ kơdŏ soang, anih so kăp gĭt tơ̆ Nha Trang hlôi đei yua ‘lơ̆ng ăn tơdrong chă tơmang lăng . Oei Phan Rang ‘noh oei đei lơ cham char bri brăh, oei chĕp vei dôm tơdrong joăt joh ayŏ kăp gĭt đơ̆ng sơ̆ kơ bơngai Chăm. Dôm tơmam pơyua ăn chă tơmang lăng tơ̆ âu, kŭm tôch kơ lơ, đơ̆ng hơbăn ao hrŭk truh tơmam chĕp ba, che văn păng dôm tơmam tanh sĭt tơgŭm ăn bơngai chă tơmang lăng gơh rơih lơ tơdrong vă truh hơlen lăng păng răt iŏk tơmam, 'noh jĭ tơdrong tôch kơ 'lơ̆ng”

Đơ̆ng rŏng 1 sơnăm tơmơ̆t hơdai, anih jang tŏk găh chă tơmang lăng kơ Khánh Hòa đei pơih să, dôm hơnih truh tơ̆ găh Pơbăh dêh char dar deh pơih trong tơƀưh hăm dôm anih joăt chă tơmang lăng hơdrol ki. Lơ̆m 6 khei blŭng sơnăm 2026, Khánh Hòa sơng đei dang 12 triệu ‘nu tơmoi, tŏk hloh 40% pơting hăm khei 'nâu sơnăm sơ̆; iŏk yua đơ̆ng chă tơmang lăng đei dang 42.500 ti hlak jên.

Tơring găh Pơbăh dêh char đei dơ̆ng lơ tơdrong ‘lơ̆ng ƀơ̆t oei jê̆ cham gre păr apŭng plĕnh teh Cam Ranh, trong năm tơƀưh hiôk hian, kŭm hăm hơnăn chă tơmang lăng Khánh Hòa đei ư hơnhang ang hơnhăk. Ƀok Alain Nguyễn, Kơdră vei lăng Anih pơdơh ngôi Hoàn Mỹ, phường Ninh Chữ, tơbăt, anih jang đei sa yua lơ đơ̆ng kơ tơmơ̆t hơdai 2 dêh char:

“Đơ̆ng rŏng 1 sơnăm tơmơ̆t hơdai, nhôn hlôi iŏk đei lơ tơdrong ‘lơ̆ng. Khŭl bơngai jang, jên tơmam vă jang tŏk đei tơplih pran ‘lơ̆ng jur tơ̆ găh Pơbăh Khánh Hòa. Mă loi, kơsô̆ tơmoi đơ̆ng Nha Trang jur tơ̆ găh pơbăh Khánh Hòa tep pơdơh tŏk lơ, pơjing đei jơhngơ̆m pran ‘nao vă hơtŏk tơiung chă tơmang lăng tơ̆ tơring”.

Đơ̆ng rŏng kơ tơmơ̆t hơdai hăm Ninh Thuận, dêh char Khánh Hòa hơtŏk tơdrong roi tơbăt, tơlĕch trong chă tơmang lăng, lơ̆m noh chơt hơiă hloh ‘noh jĭ Festival Đak dơsĭ Khánh Hòa 2026 hăm hơnăn “ ‘Lơ̆ng rŏ đak dơsĭ – Yak tŏk lơ̆m apŭng plĕnh teh pơgơ̆r đơ̆ng 17/7-19/7. 'Ngoăih kơ Nha Trang, lơ tơdrong đei pơgơ̆r tơ̆ găh pơbăh dêh char nhen Pơdă tơƀôh tơmam păng pơgơ̆r pơm bô̆i Bàu Trúc, tanh khăn Mỹ Nghiệp tơ̆ xăh Ninh Phước; tôn reh tơmam joh hơri hơsoang kơ bơngai Chăm tơ̆ Kơthôt Po Klong Garai; tơdrong joh hơri hơsoang tơ̆ trong glung, hao gre pơkao kơdâu pơrŏ tơ̆ rok trong tơ̆ phường Đông Hải. Mă loi tơ̆ xăh groi kông Lâm Sơn pơgơ̆r Lêh plei ‘long păng prăh hơmlăi pơkao. Tơdrong pơih să anih pơgơ̆r Festival đak dơsĭ truh tơ̆ lơ tơring vang tơgop tưk tơiung kơjă kăp gĭt đơ̆ng joh ayŏ kơdŏ soang tơ̆ tơring, pơjing đei dơ̆ng tơmam chă tơmang lăng păng tơdrong jang sa ăn kon pơlei.