Năr hơtuch giĕng, tơ̆ rông pơlei Đak Pơkao, xah Tơ Tung, rơ-ông rơ-ang jơva chĭng chêng. Kră pơlei Đinh Plơnh, bơngai hlôi lơ sơnăm hăt hot pơtho tôn chĭng chêng păng hơri brông ăn đe sơnăm mơlôh tơroi: "Inh hơdrin pơtho ăn kon sou băt gah chĭng chêng păng hơri brông, vă joh ayŏ kon kông Bahnar ưh kơ ƀơm hiơt hiong. Kơlih tơdra chĭng chêng hlôi hram lơ̆m sĕch pham bơngai Bahnar bơ̆n bơih. Đơ̆ng nge hlôi đei tơmơ̆ng tơdra chĭng chêng et hlôm đon, truh ah lôch hơchăng. Inh hơnơ̆ng pơtho ăn kôn mon kon sou băt 'noh tôn chĭng chêng ưh kơsĭ 'măn năm pơdah đĕch ôh, mă athei tôn hăm đon bơnôh tơpăt, băt reng dih băl păng hrau atŭm hăm khŭl. Hơmrŭk chĭng chêng gơh 'lơ̆ng ƀơ̆t ah tôm bơngai atŭm minh đon bơnôh" 

     Adoi tơguăt hăm tơdra chĭng chêng, tơdrong hơsuang đơ̆ng oei 'lơ̆p, ngê̆ nhơ̆n Đinh Hdot tơrĕk kăp gĭt truh kih thuơ̆t păng tơdrong kăp gĭt kơ rim ƀai chêng ah pơtho đe hơ-ioh. Ƀok tơblang: "Rim ƀai chêng kơ bơngai Bahnar tơ̆ Tơ Tung adoi tơguăt hăm minh khôi et soi hơdah nhen et xa ƀa 'nao 'noh ƀai chĭng chêng re sô̆, ƀai chĭng chêng re tơnơ̆m ah mă et xa kơpô. Ah mă pơtho ăn đe hơ-ioh, inh athei pơtho đơ̆ng trong chĕp tơnuh, bơbĭt tơdra mă trŏ. Ba pơtho noh athei mă tơnăp, athei pơdjoi đei tơdrong kŭp yom hăm tơmam reh tôn juăt jue, kĕ đei thoi noh nơ̆r chĭng chêng Đak Pơkao pơtơm vei sơđơ̆ng tơdrong juăt jue nuih mơng kơ bri kông"

Atŭm hăm tơdra chĭng chêng re ang, dôm nơ̆r hơri brông Bahnar hiôk chơt, dôm tơdrong hơ-'mon ang jơva adoi jing đak toh rong 'me đon bơnôh ăn tôm jơhnơr kôn mon kon sou, tŏk bŏk đei đe ngê̆ nhơ̆n pơdjoi ăn đe sơnăm mơlôh. Ƀok Đinh Bri, tơ̆ pơlei Đak Pơkao, xah Tơ Tung tơroi: "Tơdrong tơnap kơ hơri brông noh athei đei hơyuh re đunh, akŏm đon băt lơ̆m nơ̆r hơri. Dang ei đe hơ-ioh ƀônh ƀơm kiơ̆ tơdrong hơri hle lơ̆m điê̆n thuăi. Dom bơngai 'lŏ kră nhen nhôn ou athei tơgenh rim kơmăng, rim năr pơdơh vă hơri ăn kon hơ-ioh mơ̆ng, hăm tơdrong hơpơi 'meh pơhram ăn đon bơnôh đe kôn mon băt 'mêm kơ nơ̆r pơma, nơ̆r hơri mă yă ƀok pơsư̆ ăn"

Hơdoi đei đon tơchĕng thoi ăi, ngê̆ nhơ̆n Đinh Plih, tơ̆ pơlei Leng, xah Tơ Tung tơroi: "Nhôn hơdrin pơih lăm pơtho gah chĭng chêng păng hơri brông tơ̆ pơlei Đak Pơkao ăn đe kôn mon kon sou, tôm noh yuơ kơ sơnong hăm yĕ ƀok dơnơm păng kon pơlei pơla. Inh sô̆ hơ-iă kơlih jơnŭm pơgơ̆r tơring Tơ Tung hơnơ̆ng tơgŭm, pơm trong ƀônh. Nhôn hơdrin akŏm tơđrong pơtho ah khei pơdơh hŏk, akŏm hŏk hôp tơ̆ rông. Ƀôh đe mon hăt hot truh lăm hŏk, atŭm băl pơhrăm, dôm tơdrong gleh hrat hiong huach đĭ đăng. Truh dang ei hlôi đei 2 khul chĭng chêng păng hơri brông hơ-ioh, păng 3 khul sơnăm pah hơlam"

Dôm tơdrong hơdrin hăt hot đơ̆ng đe ngê̆ nhơ̆n tơ̆ Tơ Tung hlôi akŏm đon lăp gah joh ayŏ kon kông Bahnar truh hăm đe sơnăm mơlôh pơdjoi. 'Nhŏng Đinh Văn Anging, minh lơ̆m dôm bơngai dơnơm gơh hơgei lơ̆m dôm tơdrong akŏm joh ayŏ kơdŏ suang kơ đe hơdruh tơdăm xah Tơ Tung tơroi: "Nhôn đe sơnăm mơlôh tôch hmach bơnê kơ đe ma nhen ma Plơnh, ma Hdot ưh kơ mơ̆ng gle hrat măng năr pơtho pơhrăm ăn kơ nhôn. Kơdih inh minh 'nu mơlôh, inh băt hơdah mưh nhôn ưh đei vang jang, 'noh ning nai kơnh ah đe ma 'lŏ kră, mŭk drăm joh ayŏ noh gô năm tơ̆ ayơ? Inh hơnơ̆ng tơchĕng athei pơhrăm mă tơnăp, ưh hơdrô̆ pơhrăm chĭng chêng hơgei mă oei pơhrăm gah hơmet nơ̆r chĭng chêng, pơhrăm hơdơ̆r gah dôm ƀai chêng, ƀai hơri brông kră sơ̆ vă ning mônh kơnh pơtho ăn kôn mon hơ-ioh iĕ" 

Ưh đei pơdơh ah tơdrong vei răk tơƀăk mong joh ayŏ lơ̆m pơlei pơla, ngê̆ nhơ̆n Đinh Ơng oei hơ-'nhăk dôm tơdrong 'lơ̆ng gah joh ayŏ Bahnar hơtŏk lơ̆m mạng tơpôl, pơkăp truh tơdrong pơlan să tih să hloh: "Joh ayŏ kơ bơngai Bahnar tơ̆ Tơ Tung ou kăp gĭt tơpă păng akŏm ƀenh đon bơnôh 'lơ̆ng. Inh tơchĕng, 'nguaih kơ tơdrong pơdah lơ̆m et soi kiơ̆ khôi juăt jue, đe sơnăm mơlôh athei chă yua kơmăi kơmŏk 'nao, mạng tơpôl păng dôm tơdrong akŏm joh ayŏ jơ̆p teh đak vă tơbang hơdah chĭng chêng, tơdrong hơri brông Bahnar truh hăm tơmoi hơtaih jê̆. Ah mă joh ayŏ juăt jue tơguăt hăm hơtŏk jang tơmang pơhiơ̆ pơlei pơla, tơdrong hơrih kon pơlei gô hơtŏk ƀiơ̆, păng 'noh jing trong kơjăp sơđơ̆ng hloh vă vei răk tơƀăk mong mŭk drăm joh ayŏ"

Ah hơla bơbŭng rông kơjung ti ti, tơnuh unh grasia adoi oei khơ̆ng hơhŭr nhen chăl bơngai nuih mơng Ƀok Núp sơ̆, jơva chĭng chêng hrau atŭm hăm tơdra hơsuang, nơ̆r hơri brông adoi oei ang bang jơ̆p bri kông Tơ Tung. Tơdrong joh ayŏ kon kông tŏk bŏk đei pơdjoi, tơgop tơ-iung pơjing pơlei pơla Tây Nguyên roi năr roi 'lơ̆ng rŏ hloh.