Mĭnh lơ̆m dôm tơdrong hơiă ‘noh jĭ tơdrong  Khánh Hòa pơtơm tơƀôh kơmăy kơsô̆ găh tơdrong joh ayŏ so Chăm păng pơdă trực tuyến. Tơdrong kơmăy kơsô̆ tơgŭm dôm kơjă kăp gĭt joh ayŏ kơdŏ soang Chăm yak lĕch đơ̆ng hơnih ‘măn răk dăh mă anih gru groa, pơyua ăn tơchĕng hơlen, pơtho pơhrăm, roi tơƀôh păng tơgoăt hăm chă tơmang lăng lơ̆m teh đak păng apŭng plĕnh teh.

Kiơ̆ kơ dôm anih mơdro sa, tơdrong gơ̆t jơ̆ng tơmoi chă tơmang lăng ưh khan lăp cham char ‘lơ̆ng đĕch mă oei jing tơdrong tơroi joh ayŏ tơ̆ rŏng rim tơmam drăm so. Đơ̆ng trong lăng âu, joh ayŏ kơdŏ soang Chăm ưh khan lăp jing mŭk drăm tơmam kăl kơ chĕp vei mă tŏk bŏk jing tơdrong ‘lơ̆ng vă pơjing dôm tơmam chă tơmang lăng pha ra, chă lăng vă kơ băt lơ. Ƀok Alain Nguyễn, Kơdră dơnơm vei lăng Hơnih pơdơh pơdơi Hoàn Mỹ, dêh char Khánh Hòa tơroi:

“Tơmơ̆t jên jang tơ̆ dêh char Khánh Hòa đĭ 10 sơnăm, roi ‘năr  nhôn roi ƀôh kơjă kăp gĭt, tơdrong ‘lơ̆ng joh ayŏ kơdŏ soang Chăm tơgŭm nhôn đei dôm tơdrong vă tơroi. Kơna, nhôn nuih vă roi tơƀôh tơdrong joh ayŏ kơdŏ soang Chăm, kiơ̆ đơ̆ng noh, hơtŏk tơiung dôm tơmam chă tơmang lăng joh ayŏ dôm hơdrĕch hơdrŭng. Ưh kơ sĭ truh tơ̆ Việt Nam lăp hum đak dơsĭ, ưh kơ sĭ lăp đei sa ‘noh gơh ôh mă athei jing tơdrong joh ayŏ kơdŏ soang vă đe chă hơlen lăng, đe tơroi dơ̆ng ăn kơ kon sâu đe”.

Dôm bơngai joăt jang hơlen lăng, tơplih kơsô̆ tŏk bŏk pơih ăn tơdrong hiôk hơnhăk tơdrong joh ayŏ kơdŏ soang Chăm truh jê̆ hloh hăm tơmoi chă tơmang lăng ‘moi kiơ̆ dôm kơmăy kơsô̆ păng kơmăy kơmŏk ‘nao. Mă lei, vă sơng đei tơmoi đei ‘meh vă chă năm lăng gĭt kăl, tơplih kơsô̆ athei năm hơdai hăm hơtŏk ‘lơ̆ng bơngai jang. Khŭl bơngai chă pơtho, roi tơƀôh, bơngai jang chă tơmang lăng păng kơdih tơpôl bơ̆jang tơmam drăm so kăl kơ đei hơmet ăn tơdrong hlôh vao vă tơroi trŏ ‘lơ̆ng tơdrong joh ayŏ kơdŏ soang truh tơmoi chă tơmang lăng.

Phŏ Giáo sư, Tiến sĩ Ngô Văn Doanh, sơ̆ jang lơ̆m Khŭl vei lăng tơmam drăm so kơ teh đak hơlen lăng:

“Băt kơjăp ki thuơ̆t ‘noh hơiă bơih, hiôk ăn tơdrong roi tơƀôh, tôch kơ hiă, tơtĕnh. Mă lei kăl hloh ‘noh jĭ athei hlôh đei dôm kơjă kăp gĭt joh ayŏ kơdŏ soang, hlôh ưh kơ lơ ‘noh lăp pơma atŭm atŭm đĕch. Mă loi ‘noh jĭ tơmoi teh đak đe, mưh đe sư mơ̆t tơ̆ âu, tơdrong hlôh vao đơ̆ng tơmoi đĭ pha, ưh khan lăp năm chă ngôi đĕch, đe sư oei hlôh vao hloh kơ bơngai chă pơtho, roi tơƀôh”.

Hơdai hăm tơdrong hơtŏk ‘lơ̆ng tơmam chă tơmang lăng joh ayŏ kơdŏ soang, tơdrong pơih să anih mơdro sa apŭng plĕnh teh hăm dôm tơmam pha hơdrô̆ kŭm kăl kơ athei đei bơngơ̆t truh. Mĭnh trong năm ‘nao đei bơngơ̆t truh ‘noh jĭ hơtŏk tơiung chă tơmang lăng Halal tơklep hăm joh ayŏ kơdŏsoang Hồi giáo Chăm.

Kiơ̆ kơ dôm bơngai jang tơchĕng hơlen, kŭm hăm tơdrong hơtŏk kơsô̆ tơmoi truh đơ̆ng Trung Đông păng dôm teh đak Hồi giáo, tơdrong pơjing dôm tơdrong pơvih pơvăn ‘lơ̆ng Halal hơdai hăm iŏk jang tơdrong ‘lơ̆ng hơiă joh ayŏ kơdŏ soang Chăm gô pơih dơ̆ng teh hơtŏk tơiung ăn anih jang chă tơmang lăng. ‘Nhŏng Huỳnh Thanh Tâm, Khŭl jang tơchĕng hơlen găh hơdrĕch hơdrŭng păng Kon bơngai pơlei tơm Hồ Chí Minh tơblang hơdăh:

“Mă đơ̆ng tơpôl bơngai Hồi giáo tơ̆ pơlei tơm Hồ Chí Minh ưh kơ lơ ră mă oei ‘nâu jĭ hơnih tơm mŭk drăm tih hloh kơ lơ̆m teh đak, tŏk bŏk sơng đei lơ bơngai tơmơ̆t jên jang, tơmoi chă tơmang lăng đơ̆ng Trung Đông gơh iŏk yua dôm pơvih pơvăn chă tơmang lăng Halah, tơklep hăm joh ayŏ kơdŏ soang Hồi giáo Chăm tơ̆ pơlei Hồ Chí Minh".

Hăm Khánh Hòa - tơring đei kơthôt Chăm ‘lơ̆ng kŭm hăm tơpôl bơngai Chăm hơrih sa đunh đơ̆ng sơ̆ - chĕp vei tơmam drăm so ling lang tơklep hăm hơnăp jang tơm đơ̆ng tơpôl. Yă Thái Thị Lệ Hằng, Kơdră Anih vei lăng găh Joh ayŏ, Tơplŏng kơdâu păng Chă tơmang lăng dêh char Khánh Hòa akhan, mưh kon pơlei kơtă vang jang chĕp vei păng tưk tơiung kơjă kăp gĭt joh ayŏ kơdŏ soang, tơmam drăm so ưh khan lăp đei chĕp vei mă oei pơjing tơdrong jang sa kơjăp kiơ̆ hơtŏk tơiung chă tơmang lăng.

“Yua kơ kiơ bơ̆n ưh kơ chĕp vei, ưh kơ tưk tơiung dôm kơjă kăp gĭt joh ayŏ kơdŏ soang vă mưh tơoi chă tơmang lăng truh hăm Khánh Hòa đei sư gô băt tơ̆ âu đei tơpôl bơngai Chăm, tơdrong ‘lơ̆ng hơiă kon kông, đei lơ tơmam chă tơmang lăng ‘lơ̆ng hơiă vă kơbăt?. Kiơ̆ đơ̆ng noh, pơtho pơhrăm ‘mêm kơjă kăp gĭt joăt joe, dôm tơdỏng jang joh ayŏ kơdŏ soang đei hiơt hiong gơh chĕp vei đei”.

Gơh ƀôh, lơ̆m chăl kơmăy kơsô̆, chep vei tơdrong joh ayŏ kơdŏ soang Chăm ưh pă khăn lăp jing chĕp vei dôm kơjă kăp gĭt đơ̆ng sơ̆ mă pơjing dơ̆ng tơdrong hơrih ‘nao ăn tơmam drăm so. Mưh kơmăy kơmŏk, tơdrong hlôh vao păng tơpôl vang yak hơdai, joh ayŏ kơdŏ soang Chăm gô ưh khan lăp đei chĕp vei đĕch mă oei jing tơmam hơtŏk tơiung chă tơmang lăng, tơgop pơjing anih jang kơmăy kơmŏk joh ayŏ kơdŏ soang păng roi tơƀôh um rup Việt Nam lĕch tơ̆ apŭng plĕnh teh.