Ah kơsơ̆ tơ̆ pơlei Kon H’Ring, xah Cư M'gar, dêh char Đăk Lăk, yă Nŏ Đi, 68 sơnăm, tơ-oei ah tơnuh unh khơ̆ng tŏk bŏk hơmet pai xa ah kơsơ̆ măng ăn unh hnam. 'Năr ou yă pai 'nhot đơ̆ng kơdret ju pơda. Nŏ Đi ăn tơbăt, hăm bơngai Xơ Đăng, rim hơnih lơ̆m tơm kơdret adoi kăp gĭt ngăl. Gah  dŏl kơdret ju jing tơmam vă pai pơjing 'nhot xa 'lơ̆ng, păng ƀou phu.  

Hơbŏt dŏl 'lơ̆ng hloh noh ah pơyan phang. Kon pơlei năm tơ̆ bri tơchă dôm tơm kơdret ju 'lơ̆ng, koh iŏk 'lek kơđoh tơ̆-'nguaih kră vă iŏk dŏl lơ̆m lăm kok 'lơ̆ng vih pai pơjing 'nhot xa. Nŏ Đi akhan, vă 'nhot kơdret gơh ƀou phu 'lơ̆ng noh athei tah kơđoh 'long sôi păng pŭk phe vă kơ kơdret gơh jing hơte 'lơ̆ng: "Đơ̆ng rŏng kơ koh đei tôm kơdret ju noh bơ̆n chet iĕ đang kơ 'noh iŏk kơđoh 'long xôi hlôi hơmŏ vă lŭk lơ̆k hăm kơdret ju mă hlôi chet iĕ đang kơ noh peh atŭm dih băl. Đơ̆ng rŏng kơ peh đang noh tah lơ̆m gŏ tuh đak ôp păng iŏk sơ̆k tơ̆ tŏ lơ̆m minh năr. Sơ̆ noh kon pơlei hơnơ̆ng tah lơ̆m đing 'lao vă sơ̆k tơ̆ tŏ. Sơ̆k đang noh peh lŭk lơ̆k hăm pŭk phe. Đak 'noh rơ̆ mă tŏ, đang kơ noh tah 'nhot, mưh đei hơdang, ka dah mă 'nhĕm noh pai atŭm hloi. Tah bơ̆n hơmrĕ, hla ƀou ou to. Ah pai noh athei vơ̆r ling lang kuă kơ 'nhot khoi. Truh ah pŭk phe sĭn  noh đei bơih  'nhot hơte kơdret ju xa 'lơ̆ng" .

Hăm bơngai Xơ Đăng, 'nhot kơdret ju ưh hơdrô̆ jĭ minh 'nhot sŏng xa rim năr kơ unh hnam. Kơlih pai 'noh hrat, đơ̆ng tơdrong hơmet tơmam drăm, truh tơdrong pai kăl lơ jơ, 'nhot xa ou tơƀôh đon tơguăt tơguăl kơ unh hnam, pơlei pơla.

Ƀok A Hvâng 71 sơnăm, oei tơ̆ pơlei Kon Hring ăn tơbăt, pôk bơnê kơ dôm tơmam mă bri kông pơsư̆ ăn, kon pơlei Xơ Đăng băt trong iŏk yua trŏ ƀlep tơm kơdret ju, hơdrô̆ iŏk tôm đơ̆ng cham char vă hăp pơtoi chêk lar. Lơ̆m dôm tơdrong et xa kơ kon pơlei Xơ Đăng ưh đei kơƀah 'nhot xa đơ̆ng kơdret ju: "Rim 'măng pơlei pơla pơgơ̆r Et xa ƀa 'nao, 'nhot pai đơ̆ng kơdret ju ưh gơh kơƀah, xa 'lơ̆ng dêh, mă kăl noh mưh pai hăm hơdang, ka you đơ̆ng đak glung, bu bu kŭm 'meh xa ngăl. Kon pơlei xa rah et rah tơdrô ge 'noh vă kiơ dơ̆ng. Unh hnam inh hơnơ̆ng pai 'nhot xa ou, 'nhŏng oh kueng tơring truh chă apinh sŏ minh pơnhan 'nhăk brŏk sŏng hăm por"

Hơdoi hơnơ̆ng kơ pai 'nhot xa ou, yă H’chel, 68 sơnăm tơ̆ pơlei Kon H’Ring, xah Cư M'gar, dêh char Đăk Lăk ăn tơbăt, rim bơngai pai 'nhot kơdret ju gô tah tôm tơmam mơ̆ng kơ vă, 'noh 'nhot xa jing ƀou phu 'lơ̆ng hloh: "Lơ̆m khei kăt ƀa, et tŏk hnam 'nao, pơkong 'noh nhôn pai 'nhot xa đơ̆ng kơdret ju. 'Nou jĭ 'nhot xa ƀônh ƀŏ đĕch mă lei 'lơ̆ng tơpă, vă 'nhot xa gơh ƀou phu 'lơ̆ng athei đei hơmrĕ, hla ƀou, 'nhot kuê̆ 'nou nai hia"

'Nhot xa pai đơ̆ng kơdret ju kơ bơngai Xơ Đăng 'lơ̆ng 'ngam păng tơdrong tơroi gah hơrih xa pơlei pơla hrau atŭm hăm cham char, plenh teh, gah tơdrong pơ-'nam pơm jang. Lơ̆m tơdrong hơrih hrei ou, 'nhot xa ou adoi oei hơnơ̆ng đei lơ̆m 'măng sŏng xa kơ unh hnam, lơ̆m dôm tơdrong et xa kơ pơlei pơla, nhen tơdrong hơrih ƀônh hiôk mă đon bơnôh kon pơlei Xơ Đăng tơ̆ tơring bri kông Tây Nguyên.