Lơ̆m ‘măng năm tơmang lăng tơ̆ plei tanh sơkok pơnan Phú Tân (xăh Ô Loan, dêh char Đắk Lắk), yă Nguyễn Huỳnh Phương, truh đơ̆ng plt Cần Thơ, ‘măng mă blŭng kơdih kâu chĕp xăng kăt hla pơnan, sơ̆k kro, nhưm kơmâu, đang kơ ‘nŏh tanh ƀât không truh tanh đei sơkok. Yă Phương tơroi, rim tơdrong tơƀôh hơdăh tơdrong gleh hrat, pơmat tat đơ̆ng bơngai tanh sơkok âu: “Tanh đei sơkok pơnan âu tôch mơmat. Ƀôh tôch hơiă, ‘nao ‘măng mă blŭng jang ‘nŏh ƀôh tôch pơmat mă lei mưh đĭ juăt bơih ‘nŏh tanh kŭm hrĕnh păng ƀônh ƀiơ̆”.

Jô̆ păh lăp 1 năr, pơlei đei tơdrong jang so Phú Tân sơng đei dôm jĭt ‘nu tơmoi truh tơmang lăng, chă hơlen năng păng kơdih kâu pơhrăm tanh ngôi sơkok. Đơ̆ng lăp tơgĕch tanh ngôi ƀât jơ rơhơi, lơ unh hnam tanh sơkok pơnan dang ei oei đei dơ̆ng tơdrong jang ‘nao ‘nŏh chă sơng păng pơtho tơƀôh tơmoi chă tơmang lăng tanh sơkok.

Mŏ Lê Thị Bích Liêm, tơ̆ plei Phú Tân 1, akhan ‘nâu ưh kơsĭ tơdrong tơroi găh trong jang xa đĕch mă oei jing trong jang vă chĕp vei kơjăp tơmam so gĭt kăl tơ̆ tơring dơ̆ng: “Tanh sơkok kăl jang tôch hơlen, đunh ‘mơ̆i. Tơ̆ teh đak bơ̆n kŭm đei lơ dêh char, plt nhen tơring găh Pơmât dăh mă găh Tu đei lơ pơlei tanh sơkok ngăl. Mă lei rim pơlei đei tơdrong juăt pha ra băl. Hăm pơlei tanh sơkok pơnan Phú Tân ‘nŏh đei tơdrong juăt pha ƀiơ̆, inh hơpơi ‘mĕh rim bơngai băt truh plei tanh sơkok pơnan nhôn âu, vang tơgop tơgŭm ăn tơdrong arih xa kơ kon pơlei tơ̆ âu roi tŏk ‘lơ̆ng ƀiơ̆”.

Vă kơchăng sơng tơmoi, dôm HTX tơ̆ Phú Tân jang hơdoi hăm anih chă tơmang lăng, pơih tour chă tơmang lăng đei kơjă đơ̆ng 350.000 - 600.000 hlak jên 1 ‘nu. Tơmoi chă tơmang lăng đei hao thŏng nan, hao gre công nông năm tơ̆ pơgar pơtăm hla pơnan, kăt iŏk, chô̆ hơmet dui hor kiơ̆ hơbong đang vih tơ̆ hnam, blăh, nhưm păng tanh sơkok pơnan; atŭm hăm ‘nŏh gơ̆h pơhrăm tanh sơkok vă pơm tơmam ăn kơdih chĕp brŏk hai. Dôm tơmam tanh đơ̆ng hla pơnan đei lơ kơloăi, đei hloi bơ̆n kơmŏk chơ khoă, kơkuăt ti, kơdŭng ƀăk, truh dôm tơmam yoa tih ƀiơ̆ nhen kơdŭng mong tơmam, ‘long kơn,…

Ƀok Nguyễn Anh Quân, Kơdră chĕp kơ̆l HTX An Cư, tơ̆ plei Phú Tân 1, tơroi: “HTX tŏk bŏk đei trong jang năm truh tơdrong vei lăng ‘lơ̆ng cham char, vei kơjăp dôm tơdrong juăt ‘lơ̆ng đơ̆ng sơ̆ truh dang ei nhen dôm tơmam nhưm, blăh hla pơnan hăm ti tơplih ăn jang hăm kơmăy nhen hrei ‘nâu mă ưh ‘nŏh kơdih kâu gơ̆h pơhrăm tanh ngôi, hao thŏng nan vă gơh băt tôm tơdrong ƀiơ̆”.

Kiơ̆ yă Lê Thị Mai Thoa, Bơngai vei lăng plei Phú Tân 1, tơdrong tanh sơkok pơnan tơ̆ âu đĭ đei hlŏh 100 sơnăm bơih păng đei năng jĭ plei đei tơdrong jang so đơ̆ng sơnăm 2013. Dang ei đei hlŏh 540 unh hnam vang jang, tanh hăm ti hai, tanh hăm kơmăy hai vă gơ̆h tanh đei lơ sơkok. ‘Ngoăih kơ đei anih tĕch mơdro sơđơ̆ng tơ̆ găh Pơbăh tơring Tŏk bŏk păng Tây Nguyên, tơmoi truh tơmang lăng roi đunh roi lơ vang tơgop ăn kon pơlei jang xa roi đei iŏk yoa lơ ƀiơ̆.

“Tơdăh tơ̆ hnam đei 1 ‘nu hơioh păng 1 ‘nu bơngai ‘lŏ ‘nŏh gơ̆h jang bơih, hơioh kŭm gơ̆h tanh sơkok pơnan ‘năi. Tơgĕch iŏk bơngai jang lơ̆m hnam vă tanh sơkok hai, jang chŭn na hai, yoă sip ăn ăn rơmo hai păng năm kăt iŏk hla pơnan vă tanh sơkok tĕch ăn kơ đe hai, chă dơ̆ng kon jên pơ ‘nhŏ ăn tơdrong arih xa kơ unh hnam. Tơring oei pơjing tơdrong ‘lơ̆ng vă atŏk tơiung pơlei đei tơdrong jang yoa hli, mưh mih ma duch nă tĕch đĭ hla pơnan ‘nŏh jing ưh pă đei tơdrong tanh sơkok pơnan bơih. Hrei ‘nâu đei 1 HTX đe ‘nhŏng Nguyễn Anh Quân oei tơiung ming dơ̆ng tơdrong jang ‘nâu păng jang hơdoi hăm công ty chă tơmang lăng vă roi tơbăt pơlei tanh sơkok pơnan đơ̆ng sơ̆ âu”.

Hăm tơdrong hơbĕch hơbal lơ̆m trong jang xa, pơlei tanh sơkok pơnan Phú Tân oei dar deh chă đei anih dơ̆ng ‘nao. Chă tơmang lăng ưh lăp hơnhăk ba kơjă kăp gĭt găh muk drăm đĕch, mă oei tơgop chĕp vei, tưk tơiung tơdrong juăt ‘lơ̆ng đơ̆ng pơlei đei tơdrong jang so kơhrĕnh sơnăm âu hloi. Đơ̆ng âu, sơkok pơnan păng dôm tơmam tanh, pơm đơ̆ng hla pơnan gô đei tơdrong ‘lơ̆ng ‘nao, pơih đei trong jang ‘nao hai, vei kơjăp tơdrong juăt ‘lơ̆ng đơ̆ng sơ̆ lơ̆m tơdrong arih xa chăl hle hai.