Chao hơƀo jing tơmam xa juăt jue, jing tơdrong akŏm đơ̆ng đak pơ-uh păng đon băt pơm jang kơ bơngai K’Ho. Vă gơh đei găr hơƀo 'lơ̆ng, kon pơlei athei rơih hơdrĕch hơƀo rơmuơn dah mă hơƀo lai, đei jang tơnăp lơ̆m pơyan choh jang. Yă K’Bri tơ̆ xah Đinh Văn Lâm Hà, dêh char Lâm Đồng ăn tơbăt: “Ah mă hơƀo kră, inh gơ̆ hơƀo, sơ̆k hrăng tơ̆ hơdra unh dah mă sơ̆k tơ̆ tŏ cham hnam, đơ̆ng rŏng kơ noh pleh iŏk găr, ot đang noh đei phe hơƀo 'lơ̆ng bơih”.

Dôm găr hơƀo đơ̆ng rŏng kơ ot noh ưh đei ot hĕch nhen pŭk hơƀo kŏng ngĭp, mă hơdrô̆ ot pơchah jing iĕ, thoi lĕ phe noh đe krao "phe hơƀo". Phe hơƀo adoi oei đom kơđoh, noh ah pai đang, ưh hơdrô̆ rơmuơn ƀou phu kăp gĭt kơ găr hơƀo. Tơdrong pai chao đơ̆ng “phe hơƀo” noh athei mă sơ̆n păng kơchăng. Vă hơƀo tenh sĭn păng rơmuơn, bơngai K’Ho hơnơ̆ng tong phe lơ̆m lơ jơ, 'lơ̆ng hloh noh tong lơ̆m minh măng. Đơ̆ng rŏng tong đak, ôp phe mă rơgoh đang kơ noh tah lơ̆m gŏ, pai ah unh hơda lơ̆m lơ jơ. Ah jơ pai noh vơ̆r hơnơ̆ng vă chao sĭn 'lơ̆ng ưh đei khoi ah klŏng gŏ. 'Nhŏng Ha Zu Na, tơ̆ xah Đinh Văn Lâm Hà, dêh char Lâm Đồng ăn tơbăt: “Chao hơƀo noh pai ƀônh đĕch, ưh đei yua phe, adoi ưh đei pai hăm kơting nhŭng iĕr kiơ ôh. Hơƀo ot găr tah lơ̆m gŏ, ôp rơgơh păng tuh đak, pai hăm 'long unh truh ah chao klĭ, găr hơƀo sĭn rơmuơn. Bơngai K’Ho lăp thoi ăi kơlih hăp 'ngam 'lơ̆ng đơ̆ng găr hơƀo”.

Chao hơƀo hơnơ̆ng xa atŭm hăm ka kro peh, ka hơ̆p, ka ƀuh atŭm hăm 'nhot ơ̆p dah mă pai hăm rơmă, chŭ ƀoh hơmrĕ. Dôm hơdrĕch 'nhot xa atŭm hăm chao noh pơjing tơdrong 'lơ̆ng ƀou phu kơ bri kông. Pơmai K’ Huyền, tơ̆ xah Đinh Văn Lâm Hà, dêh char Lâm Đồng ăn tơbăt: dôm kơluăi 'nhot păng ƀoh ƀôk ngok xa atŭm ưh hơdrô̆ pơm pơ-'lơ̆ng tơmam xa mă oei tơbang đei um ai kăp gĭt lơ̆m tơmam xa kơ bơngai K’Ho: “Ah mă xa pơnhan chao hơƀo ou, mă blŭng noh inh mơn ƀou phu rơmuơn đơ̆ng hơƀo. Chao klĭ, găr hơƀo rơmuơn păng xa ƀônh. Hơdah, ưh đei pai hăm kơting nhŭng iĕr mă chao adoi oei 'lơ̆ng 'ngam kơlih găr hơƀo nham 'lơ̆ng”

Chao hơƀo ƀônh ƀŏ ou ưh hơdrô̆ tơbang gah tơdrong hơrih ƀônh hiôk, mă oei tơbang hơdah đon bơnôh bơngai K’Ho “đei kiơ xa mă noh”, iŏk yua dôm tơdrong kiơ mă cham char pơsư̆ ăn. Chao hơnơ̆ng đei xa đơ̆ng rŏng kơ jang hrat, vă kơ phĭ pơdŭk, đei jơhngơ̆m vă pơm jang, nhen minh tơmam xa kăp gĭt kơ plenh teh đơ̆ng rŏng kơ chă hơrih jang xa.

Lơ̆m tơdrong hơrih 'nao kơ tơring kơdrơ̆m, dôm tơmam xa 'nao hơnơ̆ng vih truh pơlei pơla, “chao hơƀo” tơmam xa 'lơ̆ng kơ bơngai K’Ho adoi oei kơjăp lơ̆m đon bơnôh kơ lơ jơhnơr bơngai. Lơ̆m pơnhan chao hơƀo, ưh hơdrô̆ 'ngam đơ̆ng găr hơƀo, ƀăt đơ̆ng ƀoh, mă oei akŏm ƀenh tơdrong hơrih kiơ̆ khei năr. Chao hơƀo ưh hơdrô̆ hơtŏk jơhngơ̆m pran đơ̆ng rŏng minh năr pơm jang hrat tơ̆ mir ƀa na pơtăm mă oei pơm ăn đe vih ƀlŏk kơ pơlei pơla, ƀlŏk kơ 'nhui unh, ƀlŏk kơ yă kơ mĕ 'mêm kơ-eng.