Ƀơ̆t đei 'măng veh hơpong ngôi tơ̆ dôm pơlei pơla K’Ho, tơmoi gô đei gô đei tơ-'ngla hnam sơng kăp gĭt hăm minh ƀai chêng Bor – tơƀôh tơdrong sô̆ ƀơ̆t đei tơmoi gĭt truh. Ƀok Liêng Hót Ha Kliêng (bơngai K’Ho Cil) tơ̆ thôn Srê Đăng, xah Tân Hội, dêh char Lâm Đồng ăn tơbăt: hơdrol ki, chêng Bor hơnơ̆ng đei pơre ƀơ̆t lơ̆m unh hnam dah mă pơlei pơla đei tơdrong sô̆. Noh jing tơdrong et pơsĭt pơkong, sơng tơmoi gĭt, dah mă et tŏk hnam 'nao, et jur xa... Tơdra chêng bor pơm ăn kon bơngai chơt hơ-iă hăm tơdrong hơpơi đei yua tơnăp: “Ah mă ba đei yua lơ phe ƀa 'nhăk vih tơ̆ hnam noh athei sô̆ hơ-iă, athei iŏk chêng bor vă tôn, pơgơ̆r et jur xa vă tơroi ăn kon pơlei pơla. Vang truh et xa sô̆ atŭm hăm pơlei pơla hăm tơdrong hơpơi 'meh pơyan jang 'nao grăng pran păng gô đei yua lơ phe ƀa hloh, noh jing khôi juăt 'lơ̆ng kơ kon pơlei K’Ho nhôn”

Ngê̆ nhơ̆n Ka Să Ha Sang, tơ̆ thôn Dà Blah, xah Lạc Dương, dêh char Lâm Đồng ăn tơbăt: Hơmrŭk chĭng chêng kơ bơngai K’Ho đei 6 tŏ, pơtih ăn kơ unh hnam 6 'nu, đei mĕ ƀă păng 4 'nu kon. Hơnăn krao kơ rim chêng noh: Chêng yŏng, chêng Rơnoai, chêng Ndơn, chêng Mboăt, chêng Blah păng chêng klŏk.

Ƀai chêng Bor ah tôn noh athei đei tôm 6 tŏ. Đe tôn chĭng chêng noh tuơ đĕch (3 drŏnglo - 3 drăkăn, dah mă 6 drŏnglo, 6 drăkăn). Ngê̆ nhơ̆n Ka Să Ha Sang ră hơdah, mưh kơƀah minh lơ̆m 6 tŏ noh gô ưh đei trŏ ƀai chêng bor – chêng kơ tơdrong tơguăt tơguăl: “Tôm tơrĕk truh minh pang, atŭm tơgŭm pring vei dih băl, tơguăt tơguăl minh đon bơnôh. Nhen chêng ou, đei 6 tŏ mă 'meh tôn ƀai chêng bor noh athei đei tôm 6 tŏ, kơlih mưh asong rim pah noh 3 tŏ đĕch noh ưh gơh chă tôn ƀai chêng bor, ưh kơsĭ ƀai chêng bor sô̆ - tơguăt tơguăl, noh đei lăng jĭ atŭm krung kơtum, minh pơlei pơla, minh teh đak”.

Ah mă tôn chêng Bor, chêng yŏng athei pơtơm hơdrol, đang kơ noh chêng kon kiơ̆ đơ̆ng rŏng nhen lĕ tơl nơ̆r hăm mĕ ƀă... Tơdra chêng re pơtơm tơtenh vă tơbang tơdrong sô̆ lơ̆m đon bơnôh kơ rim bơngai. Minh ƀai chêng athei đei tôm 6 tŏ, kơlih ưh gơh kơƀah tơdrong sô̆ mưh tơklah chêng yŏng dah mă chêng kon. Ngê̆ nhơ̆n Kơ Să Ha Sang ăn tơbăt, tơdrong kăp gĭt hloh kơ ƀai chêng Bor 'noh ưh gơh tơklah, athei tơguăt păng 'mêm kơ-eng dih băl, đơ̆ng unh hnam, truh pơlei pơla păng teh đak: “Tơdrong kăp gĭt kơ ƀai chêng bor ou ah anih lơ̆m unh hnam dah mă lơ̆m pơlei đei bơngai 'lŏ bơngai mơlôh, tôm yak atŭm minh trong... noh pơtơm đei teh đak Việt Nam bơ̆n”.

Hăm tơdrong kăp gĭt thoi noh, lơ̆m dôm năr ou tơ̆ jơ̆p pơlei pơla K’Ho, dêh char Lâm Đồng, tơdra chĭng chêng Bor tŏk bŏk ang bang, hrou atŭm hăm tơdrong sô̆ kơ tôm kon pơlei jơ̆p teh đak sơng kơ kuh 80 sơnăm năr tơ-iung pơjing teh đak, đe oei krao noh năr Kuôk khanh năr 2/9.