Tơ̆ Năr pơchơt, kon pơlei păng tơmoi chă tơmang lăng truh hăm lơ tơdrong et soi tôch hơiă lơ̆m Têt Bunpimay nhen plang pơyơ̆r tơmam Tắc-bạt, tơhum ăn mul phât, chô̆ brai ƀât kŏng ti, pơm kơthôt chuơh, hơtat unh đeng pơkao tơ̆ đak, kơsăy đak apinh tơdrong pŭn ai. ‘Nâu jĭ dôm tơdrong juăt vă pơm rơgŏh jơhngâm đon, apinh tơdrong hiôk hian păng tơiung tơdrong ‘lơ̆ng, pŭn ai ăn sơnăm ‘nao.

Hăm lơ unh hnam bơngai Lào arih xa đunh sơnăm tơ̆ Buôn Đôn, Têt so ưh lăp jơnăr vă ngôi hơdai đĕch mă oei jing tơdrong juăt vă chĕp vei tơlei brai tơguăt hăm chăl yă ƀok sơ̆. Yă Khăm Bo Lào, tơ̆ plei Trí, xăh Buôn Đôn tơroi: “Ba soi, plang pơyơ̆r pơkao, plei ‘long, ƀĕng keo păng tŏ sĕt tơmam soi ăn đe ƀok chuơ vă soi apinh jơhngâm pran, hiôk chơt ăn unh hnam. Ba athei tơhum ăn mul phât hai vă apinh tơdrong liĕm kâu, hiôk hian ăn unh hnam, kôn mon kon sâu”.

Găh noh dơ̆ng, tơmoi chă tơmang lăng oei đei ngôi hơdai hăm tơdrong lêh, kiơ̆ đơ̆ng hơxoang Lăm Vông, hơxoang Chăm-pa, lêh sơng Bia Nang Sangkhane, lêh pơchơt tơ̆ trong glung; truh hăm dôm tơdrong chă tơmang lăng rôih, năng tơdrong hơri hơxoang păng xa ngôi dôm tơmam xa đơ̆ng hơdrĕch kon kông.

Mŏ Hoàng Thúy Lư, tơ̆ phường Ea Kao, dêh char Đắk Lắk ăn tơbăt: “Năr ‘nâu inh truh hăm Buôn Đôn păng vang akŏm lơ̆m năr Têt kơ bơngai Lào. Inh ƀôh tôch hơiă găh tơdrong juăt, jŏh ayŏ kơ dŏ xoang đơ̆ng bơngai Lào tơ̆ Buôn Đôn. Inh ƀôh tôch hưch ‘mêm hơbăn ao hrŭk đơ̆ng sơ̆, sư tôch ‘lơ̆ng âu, kŭm nhen dôm tơdrong ngôi pơchơt năr Têt tơ̆ âu păng inh tôch hơiă mưh truh hăm tơdrong kơsăy đak, rim bơngai pơm ngôi đak tôch chơt hơiă, ‘nă hal”.

Buôn Đôn, nơ̆r Lào ‘nŏh jĭ “Plei Kông lôk”, jĭ anih oei xa đơ̆ng sơ̆ đơ̆ng kơhrĕng unh hnam bơngai Việt hơdrĕch Lào tơ̆ Đắk Lắk.

Kiơ̆ ƀok Nguyễn Cảnh Tùng, Kơdră vei lăng kon pơlei xăh Buôn Đôn, đơ̆ng rŏng kơ tơmât hơdai, lơ̆m xăh đei 15 hơdrĕch hơdrung arih xa hơdai, lơ̆m noh đei hlŏh 400 ‘nu bơngai Lào. Tơdrong hơnơ̆ng pơgơ̆r Têt Bunpimay ưh lăp pơm lăp hăm tơdrong ‘mĕh vă găh tơdrong joh ayŏ kơ dŏ xoang đơ̆ng kon pơlei đĕch mă oei pơjing anih ngôi pơchơt, hơmet kơjăp tơdrong pơvei, tưk tơiung tơdrong jang mŭk drăm, tơpôl tơ̆ tơring dơ̆ng.

“Tơpôl bơngai Lào tơ̆ âu đei dang hlŏh 400 ‘nu bơngai, arih xa tơ̆ xăh Buôn Đôn. ‘Nâu jĭ tơdrong juăt ‘lơ̆ng đơ̆ng bơngai Lào đei chĕp vei đơ̆ng sơ̆. Nhôn, rim sơnăm hơnơ̆ng pơgơ̆r Têt ăn bơngai Việt hơdrĕch Lào arih xa tơ̆ tơring vă pơjing tơdrong 'mêm băl, mât pôm ƀơ̆r đon lơ̆m tơpôl, tơgŭm băl lơ̆m tơdrong jang atŏk tơiung mŭk drăm, tơpôl tơ̆ xăh Buôn Đôn.