Ah ‘năr tŏ hlơ hlĕng tơ̆ tơring bri kông Trường Sơn, đơ̆ng pơgê hrôih, rim khul bơngai đơ̆ng dôm pơlei kơ apŭng Kà Lừm, dêh char Sê Kông, Lào – tơring sơlam tơkuh hăm xah Hùng Sơn, pơlei tơm Đà Nẵng (apŭng Tây Giang, dêh char Quảng Nam so) iơ̆r iăr krao băl năm truh thôn A Tu 1, xah Hùng Sơn nhen năm akŏm et xa. Lơ̆m khul bơngai đơ̆ng pah to sơlam teh truh, bu bu adoi hrŭk hơbăn ao guăng ‘lơ̆ng hloh.

Nơ̆r hơhiĕk sô̆ chơt ƀrŭng ƀrăng bang hơdah lơ̆m muh măt găm tŏ xa. Đei bơngai ‘nhăk hloi đe kră, kon hơ-ioh. Đei bơngai pŭ ‘nhăk tơmam kơ pơlei pơla... Ƀok Savandi chơt hơ-iă tơroi, kơtơ̆ng gah xah Hùng Sơn pơgơ̆r Têt Bunpimay, rim bơngai lơ̆m pơlei bu bu adoi hăt hot sô̆ băl năm akŏm atŭm: “Sơnăm mă yơ truh ah Têt Bunpimay, kon pơlei adoi hăt hot dêh... Truh tơ̆ ou rim bơngai adoi sô̆ chơt. ‘Nou jĭ Têt nhôn, mă đe buăl Việt Nam pơgơ̆r tơnăp dêh, thoi lĕ Têt juăt jue kơ sư hloi. Năm truh tơ̆ ou tơƀơ̆p đe ‘nhŏng oh, đei et xa, pơchơt, sơng Têt atŭm dih băl... sô̆ Têt thoi lĕ tơ̆ hnam po kơdih”.

Tơ̆ xah Hùng Sơn, dôm tơmam xa juăt jue kơ bơngai Cơ Tu đei pai hơmŏ, akŏm ƀenh đon băt kơ tơmoi đơ̆ng bơngai tơring groi kông. Ƀok Plong Rang, Ƀĭ thư Chi ƀô̆ thôn A Tu 1 chơt hơ-iă, rim bơngai lăng ou jĭ tơdrong jang atŭm kơ pơlei pơla, kơdih chă tơgop jơhngơ̆m păng tơmam drăm: “Pơtăm pơk, hơmet chơnang pơdah; hơvơn kon pơlei pĕ ‘nhot, bŭch ƀum ƀlang vă pai pơjing lơ tơmam xa juăt jue ‘măn ăn khul truh akŏm xa Têt Lào. Dôm tơmam xa kăp gĭt nhen nhŭng, iĕr, ka, por prung, ƀanh hơke kơpô đei hơmet tôm vă sơng kon pơlei teh đak buăl Lào. Tơdrong akŏm tơnăp sô̆ hơ-iă dêh”.

Năr hơtuch giĕng, kơ rơbou bơngai đơ̆ng 5 pơlei kơ apŭng Kà Lừm, dêh char Sê Kông ‘nhăk ba tơdrong sô̆ Têt Bunpimay rơ-ông rơ-ang jơ̆p bri kông sơlam teh Hùng Sơn. Nơ̆r hơhiĕk chhôk atŭm hăm nơ̆r tơdra hơri re ang bri kông. Dôm tơdrong pơsuh pơchơt nhen dui tơlei, drŭt ‘long, tơplŏng ƀao ƀô̆... đei pơgơ̆r hăt hot, hơvơn lơ kon pơlei 2 pah tơring sơlam atŭm vang akŏm pơsuh pơchơt.  

Hơnih kăp gĭt hloh kơ năr akŏm noh ‘Măng akŏm kơchơ Têt Bunpimay akŏm ƀenh đon tơbôl sơlam teh Việt – Lào. Tơ̆ noh, kon pơlei ưh hơdrô̆ năm tơ̆ kơchơ ưh huach jên mă oei “sơng Têt” hăm ‘nhot xa juăt jue. Dôm tơmam pôk ƀônh ră mă lei tơnŏ ‘lơ̆ng nhen mi tôm, ka kro, hơbăn ao ‘nao... đei hloi săng tơgăk, ‘nhik, dôm tơmam yua tơguăt hăm tơdrong hơrih jang xa rim năr, đei pơjao ăn kon pơlei nhen minh tơmam pôk Têt ‘mêm kơ-eng.

Đại tá Hoàng Văn Mẫn, Chĭnh uy Jơnŭm Pơgơ̆r Khul linh Vei lăng sơlam teh Đà Nẵng sơkơ̆t hơdah, dôm tơmam pôk kăp gĭt, tơdrong ming man pơyua ăn kon pơlei, truh hloi dôm tơdrong akŏm joh ayŏ, tơplŏng kơdou... adoi pơkăp truh kon pơlei Lào nhen ‘nhŏng po kơdih: “Lơ̆m ‘măng Têt Lào dah mă Têt Việt, nhôn adoi pơgơ̆r vă kon pơlei atŭm vang akŏm; kon pơlei Lào đei akŏm sô̆ ah mă pơgơ̆r Têt Việt, păng kon pơlei Việt adoi gơh sô̆ ah mă Têt Lào truh. Dôm sơnăm ou ki, đon bơnôh đơ̆ng kon pơlei 2 tơring sơlam, khul linh vei lăng sơlam teh, jơnŭm pơgơ̆r tơring sơlam 2 pah hơnơ̆ng tơguăt tơguăl, tơgop pơjing tơring sơlam sơđơ̆ng hiôk hian, tơbôl jang hơdoi”

Lơ̆m tơring bri kông Trường Sơn, Têt Bunpimay sơnăm ou đei dơ̆ng ‘măng tơroh tơguăt dôm hơyak jơ̆ng kơ 2 tơring sơlam. Dôm tơpang ti krôp băl, nơ̆r hơhiĕk hrơ hrou dih băl... ƀônh ƀŏ đĕch mă lei tơnŏ lơ̆m đon.