Tơ̆ cham să thôn Như Ngọc, xah Phước Hữu, dêh char Khánh Hòa, kơ hrĕng hơdruh tơdăm bơngai Chăm hrŭk hơbăn ao juăt jue vang akŏm pơdah hơsuang  kiơ̆ tơdra hơgơ̆r Paranưng păng khen hlôm Saranai re ang. Dôm tơdrong hơsuang đei hơmŏ tôch tơnăp, pơdah dơ̆ng tơdrong hơrih jang xa kơ kon pơlei Chăm, đơ̆ng rup hơkă ƀa, pơchoh na, tanh brai truh hloi dôm tơdra hơsuang kră sơ̆ kăp gĭt. Hrou dơh po lơ̆m khul tơmoi truh akŏm lêh kơdrơ̆m kơdreng, yă Đàng Thị Hơi, xah Phước Hữu, dêh char Khánh Hòa tơroi: “Lêh akŏm sơnăm ou đei pơgơ̆r đơ̆ng kơ̆l pơlei truh tơ̆ hơtuch pơlei, rơ-ông rơ-ang sô̆ chơt dêh. Dôm tơdrong hơri hơsuang ‘lơ̆ng kăp gĭt dêh, rim bơngai pơdah adoi hăt hot hăm tơdrong hơri hơsuang kơ po”.

Rija Nagar ‘noh lêh akŏm sơng sơnăm ‘nao kơ bơngai Chăm, hăm dôm khôi soi tơbeh apinh asong ăn tŏ ‘mi kial sơđơ̆ng păng tơdrong hơrih sơnêp sơnua ăn kon pơlei pơla. Rim pơlei bơngai Chăm pơgơ̆r lêh tơm lơ̆m 2 năr hăm dôm khôi soi tơbeh juăt jue, mă lei khei năr pơgơ̆r noh phara băl noh tơdrong akŏm hơnơ̆ng pơdui đunh năr lơ̆m pơlei pơla. Pơmai Trần Thị Dung, tơmoi truh đơ̆ng Hà Nội tơroi: “Inh năm akŏm lơ tơdrong et xa tơ̆ dôm tơring, đơ̆ng gah Tu truh Pơbah mă lei ou jĭ tơdrong akŏm et xa kơ kon pơlei Chăm, hăp kăp gĭt tơpă. Noh jing tơdrong tơguăt tơguăl kon pơlei, pôk pơ-ư tơdrong joh ayŏ kon kông tơ̆ tơring. Inh lăp kơ măt tơpă, hmach bơnê păng pơ-ư pơ-ang ah đei năm akŏm Lêh akŏm tơ̆ tơring teh ou”.

Lêh akŏm Rija Nagar oei jing hơnih răk vei lơ tơdrong hơri kră sơ̆ kăp gĭt kơ bơngai Chăm, đơ̆ng tơdra hơri, tơdrong hơsuang truh dôm khôi juăt so. ‘Nou jĭ cham char vă dôm kơjă joh ayŏ juăt jue pơtoi đei vei răk tơƀăk mong kiơ̆ lơ jơhnơr bơngai:

Phó Cả sư Lưu Sanh Thanh, xah Phước Hữu, dêh char  Khánh Hòa ăn tơbăt: “Lêh akŏm sơnăm ou ah năr 1 khei 1 Chăm lĭch trŏ ah năr 16/4 dương lĭch, adoi jing ‘măng tơbăt năr tơblah đei jơnei dêh char Ninh Thuận (so), kon pơlei chơt hơ-iă dêh. Đảng păng Teh đak lơ̆m khei năr ou ki hlôi tơrĕk tơgŭm ăn tơdrong hơrih kon pơlei. Nhôn hơpơi ‘meh lêh akŏm Rija Nagar pơtoi đei vei răk tơƀăk mong păng hrôih đei tơmơ̆t lơ̆m hơnăn mŭk drăm joh ayŏ đon bơnôh kơ teh đak”

Tơdra hơgơ̆r Paranưng păng khen hlôm Saranai re ang ah rim pơyan lêh akŏm, tơguăt kon pơlei pơla păng vei răk joh ayŏ kăp gĭt kơ bơngai Chăm. Păng đơ̆ng dôm lêh akŏm nhen Rija Nagar, um ai joh ayŏ Chăm pơtoi đei vei răk tơƀăk mong păng pơlan să lơ̆m tơdrong hơrih hrei ou.