Tơdrong jang sơng đei tơdrong vang akŏm đơ̆ng bơngai tang măt dôm anih tơm, anih jang Trung ương, anih jang apŭng plĕnh teh, dôm bơngai tang măt, bơngai joăt jang, bơngai jang khoa hŏk păng anih mơdro sa lơ̆m, ‘ngoăih teh đak. Hop akŏm ‘măng âu ‘noh jĭ ‘măng vă Đắk Lắk iŏk đei tơdrong hlôh vao đơ̆ng apŭng plĕnh teh, pơjing hla ar hô sơ athei UNESCO drơ̆ng ăn tơmam kăp gĭt; pơtrŭt hơtŏk tơiung cheh phe kơjăp, tơklep hăm chă tơmang lăng păng kơmăy kơmŏk joh ayŏ.

Pơma tơ̆ tơdrong jang, ƀok Nguyễn Minh Vũ, Phŏ kơdră Anih tơm jang tơbôl akhan, tơdrong rơih iŏk cheh phe pơm tơm đơ̆ng pơma dơnuh joh ayŏ ‘noh jĭ trong gơh băt pơcheh, tơgop tơƀôh dơ̆ng kơjă kăp gĭt đơ̆ng kơloăi tơmam choh jang sa joăt joe lơ̆m tơdrong hơrih. Cheh phe Việt Nam  hrei ‘nâu ưh khan lăp vang mơ̆t jrŭ lơ̆m kơjă mŭk drăm jơ̆p plei teh mă oei pơm hơnăp jang nhen 1 tơmam tang măt ăn joh ayŏ, hơnhăk ba tơdrong tơroi găh kon bơngai păng tơdrong ‘lơ̆ng hơiă Việt Nam truh hăm bôl buăl apŭng plĕnh teh.