Mih ma duch nă păng bôl buăl mơ̆ng tơdrong hơri brông Jarai yuơ ngê̆ nhơ̆n Y Quân Mjâo hơri. Dôm tơdra hơri noh ưh hơdrô̆ jing tơdra hơri, mă oei jing tơdrong tơroi gah tơdrong hơrih pơm jang, gah đon băt kơ pơlei pơla đơ̆ng dôm bơngai kon tơ̆ tơring sơlam Ea Sup, dêh char Đăk Lăk.

 Ngê̆ nhơ̆n Y Quân Mjâo (đe juăt krao Ơi Khely), oei tơ̆ pơlei A2, xah Ea Sup, dêh char Đăk Lăk. Đei rơneh păng tih vơ̆ tơ̆ tơring teh Ea Sup, đơ̆ng oei 'lơ̆p ƀok hlôi đei hơrih lơ̆m tơdrong joh ayŏ kon kông po kơdih.  Lơ̆m dôm kơmăng akŏm pơlei pơla, ah jih tơnuh unh khơ̆ng, nơ̆r hơri brông Jarai re ang nhen lĕ tơroi gah tơdrong hơrih, tơroi kơ bri kông, tơroi kơ tơdrong đon băt păng kon bơngai tơ̆ tơring ou. Đơ̆ng dôm tơdra noh hlôi rong đei tơdrong băt 'mêm kơ tơdrong hơri brông lơ̆m ƀok. Ngê̆ nhơ̆n Y Quân Mjâo tơroi: “Inh hlôi pơjuăt hăm tơdra hơri brông đơ̆ng oei 'lơ̆p sơ̆. Tŏk 15, 16 sơnăm inh băt chă hơri. Inh hơri tơ̆ rim hơnih, rim jơ rơvơn, kơplah năm jang tơ̆ mir hăm kon hơkăn, phơ phŏ năm phe 'nhot bri. Tơdrong hơri brông Jarai nhôn noh hơnơ̆ng hơri hơ-'nguơ̆u kơ tơdrong hơrih, tơdrong pơm jang”

Adoi nhen lơ ngê̆ nhơ̆n hơri brông nai, ngê̆ nhơ̆n Y Quân Mjâo pơhrăm hơri hăm trong mơ̆ng păng ƀlŏk hơdơ̆r. Đơ̆ng dôm nơ̆r hơri ƀônh mă blŭng, brư̆ brư̆ ƀok hlôi rơbot păng gơh hơri lơ ƀai hơri brông kră sơ̆. Ƀơ̆r hơri ƀok 'noh hiôk 'lơ̆ng, akŏm ƀenh kơ tơring bri kông. Ngê̆ nhơ̆n oei rơbot păng hơri lơ ƀai hơri brông kră sơ̆ tơroi gah tơdrong tơhưch druh dăm – minh tơdrong hơri tơguăt tơjê̆, akŏm hơ-'nguơ̆u kơ tơdrong hơrih đon bơnôh bơngai Jarai. Dôm nơ̆r hơri hiôk 'lơ̆ng, phŏ tơƀlŏk tơdrong ƀlŏk băt, tơbang hơdah đon bơnôh tơguăt kơ hơdruh tơdăm tơ̆ pơlei pơla. Ƀok tơroi, dôm ƀai hơri hơ-'nguơ̆u kơ tơdrong tơhưch ưh hơdrô̆ jing nơ̆r hơri, mă oei jing trong vă đe kră sơ̆ akŏm đon băt păng đon lui 'lơ̆ng rŏ gah đon bơnôh, gah tơdrong tơguăt kơjăp lơ̆m tơdrong hơrih:  “Ah mă minh 'nu tơdăm hưch băt kơ minh 'nu hơdruh, sư hơnơ̆ng pơtruh đon băt kiơ̆ nơ̆r hơri: “'Nhŏng hơnơ̆ng hơlen lăng oh. Lăng tơjê̆, oh 'lơ̆ng thoi lĕ pơkao bri. Lăng hơtaih, oh 'lơ̆ng thoi lĕ bia yang lơ̆m tơring. Băt kơ oh, 'nhŏng et xa ưh kơ 'lơ̆ng, tep ưh kơ hlơ̆k. Tơdrong jang noh ưh kơ băt kloh klĕch. Lơ̆m đon hơnơ̆ng đei um ai oh dưp dim” Oei inh, inh lăp kơ tơdrong hơri brông nhen kơ tơdrong hơrih. Bơngai yơ 'meh pơhrăm hơri, inh kơchăng pơtho ăn. Mă pơlei hơtaih yaoh, trong hơtaih tơnap kơ vih vơ̆t, inh kơchăng năm mơ̆n, hơdrô̆ 'meh nơ̆r hơri brông oei ang bang păr ang hơtaih ling lang”

Dôm tơdrong hơri brông Y Quân Mjâo hơri đei lơ bơngai 'lŏ sơnăm lŭ lăp, mă oei đei lơ buăl mơlôh lơ̆m pơlei tơrĕk pơhrăm. Rim 'măng ƀok pơre nơ̆r hơri, noh hơvơn đei lơ hơdruh tơdăm hơ-ioh iĕ truh tơmơ̆ng. Ưh hơdrô̆ lăp kơ tơdrong hơri brông, đe buăl mơlôh oei 'măn ăn ngê̆ nhơ̆n kŭp yom păng 'mêm bơnê. Pơmai H'Thuyên Kpă, tơ̆ pơlei A2 tơroi:  “Inh kơtơ̆ng ƀok hơri brông Jarai hiôk dêh, 'lơ̆ng dêh. Lơ̆m pơlei noh ƀok adoi pơtho đe kôn mon kon sou hơri, bu bu adoi chơt hơ-iă hŏk pơhrăm”. 

Oei 'nhŏng Y Nô Ksơr, oei tơ̆ pơlei A1, xah Ea Sup, dêh char Đăk Lăk tơroi thoi ou: “Ƀok hơnơ̆ng kơ hơri dôm ƀai hơri brông Jarai kră sơ̆, inh mơ̆ng lăp dêh. Ƀok hơnơ̆ng hơri ƀai hơ-'nguơ̆u kơ tơdrong hơrih, gah tơdrong tơhưch druh dăm, inh mơ̆ng hiôk dêh mă lei adoi tam mă vao tôm tơdrong kăp gĭt kơ nơ̆r hơri. Inh băt tŏ sĕt đĕch, noh inh hơpơi 'meh khei năr truh, đe hơdruh tơdăm nhen nhen nhôn gô đei pơhrăm hơri, đe hơ-ioh adoi đei tơrĕk hăm tơdrong hơri brông, vă tơgop vei răk tơƀăk mong joh ayŏ pơlei pơla”

Nơ̆r hơri đơ̆ng ngê̆ nhơ̆n Y Quân Mjâo ưh hơdrô̆ ang bang lơ̆m pơlei pơla, mă oei kiơ̆ ƀok năm truh lơ tơring, kiơ̆ dôm tơdrong akŏm pơdah, tơdrong akŏm joh ayŏ lơ̆m păng 'nguaih kơ tơring. Tơ̆ rim chơnang pơdah, ƀok adoi hơ-'nhăk dôm tơdrong hơri brông Jarai hiôk 'lơ̆ng, tơgop tơbang păng pơlan să um ai joh ayŏ kon kông po truh hăm lơ bơngai mơ̆ng lăng. Hăm đon băt păng tơdrong dăp đon dăp bơnôh noh, dôm tơdrong hơri brông Jarai gô đei vei răk, vă tơdra hơri brông ƀônh ƀŏ mă lei akŏm ƀenh tơdrong 'lơ̆ng ang bang tơ̆ tơring bri kông Tây Nguyên.