Lơ̆m nơ̆r Chăm păng 1,2 nơ̆r pơma kơ hơdrĕch kon kông Tây Nguyên, nơ̆r “Chum” jĭ tơdrong chŭm, tơƀôh jơhngâm đon 'mêm băl. Hăm vă jê̆ 60 pơnĭt, “Chum Show” tơroi truh tơdrong kon bơngai chă đei jơhngâm đon hưch 'mêm băl, pơvei băl. Tơdrong joh hơri pơm ăn lơ bơngai ưh ê  yoa jơva re păng um rup tôch juăt tơ̆ yăn âu. Juăt đơ̆ng jơva chĭng chêng, jơva hơgơ̆r, tơdrong hơxoang đơ̆ng tơpôl bơngai Chăm, Rađe, Raglai. Chrih ƀât đĭ đăng đe sư đei tơmât hơdai kŭm hăm unh pơchrang ang hơdăh tôch 'lơ̆ng rŏ đơ̆ng chăl hle. 

Kiơ̆ đơ̆ng dôm tơdrong joh ayŏ kơ dŏ xoang, pơm siêk, hơdai hăm jơva hơri, hơxoang tôch ‘lơ̆ng, bơngai lăng nhen đei arih xa lơ̆m chăl kră sơ̆ kŭm nhen ƀôh lơ tơdrong 'nao ‘lơ̆ng lơ̆m chăl hrei 'nâu hai, ƀôh đei kơdih kâu păng lơ bơngai lơ̆m noh ƀât tŏk bŏk plenh teh. Ƀok Nguyễn Hồng Quang, tơ̆ phường Nha Trang, dêh char Khánh Hòa akhan: “Jơva re chăl ‘nao, unh pơchrang ‘lơ̆ng rŏ tơmât hơdai tôch ‘lơ̆ng hăm lơ bơngai hơxoang tôch ‘lơ̆ng pơjing đei um rup tôch hơiă. Hơxoang chăl hle hơdai hăm siêk, tơdrong joh ayŏ kơ dŏ xoang so kơ bơngai Chăm, dôm hơdrĕch kon kông Tây Nguyên mât hơdai tơ̆ anih âu tôch hơiă”.

Yă Ngô Thanh Phương, Bơngai pơgơ̆r Chum Show tơroi, dôm bơngai vang pơm tơdrong ‘nâu ‘mĕh pơjing anih joh ayŏ kơ dŏ xoang pha ra ƀiơ̆, anih mă đe ngê̆ si păng ngê̆ nhơ̆n vă pơcheh hơdai. Rim tơdrong hơri hơxoang tơklep kơjăp hăm tơdrong arih xa găh jơhngâm đon đơ̆ng kon pơlei Tây Nguyên – Tơring găh Pơbăh kơ Tơring Tŏk bŏk, mă lei đei hơnhăk tơroi tơ̆ anih joh hơri hơxoang ‘nao. Iŏk yoa tơdrong joh ayŏ kơ dŏ xoang ‘lơ̆ng hơiă đơ̆ng sơ̆ kơ dôm hơdrĕch kon kông vă tơgŭm ăn tơpôl roi hlôh vao, roi ‘mêm băl: “Nơ̆r mă nhôn ‘mĕh hơnhăk truh ăn bơngai lăng mât hăm Chum show ‘nŏh tơguăt hơdai păng hơmet pơ ‘lơ̆ng; Vih hăm chăl so sơ̆, tơdrong juăt đơ̆ng kơdih. Nơ̆r Chum hăm 1,2 nơ̆r kon kông ‘nŏh jĭ chŭm ‘mêm, tơguăt băl, hưch băl păng hơmet pơ ‘lơ̆ng, ƀât mă tơ̆ ‘ngoăih to oei đei ‘mi kial hơbŭt hơbang, tơblăh vang hrang tơƀet”.

Đơ̆ng rŏng kơ tơmât hơdai dôm tơring Tây Nguyên hăm Tơring găh Pơbăh kơ Tơring tŏk bŏk, khei ‘năr âu ki, anih chă tơmang lăng tơ̆ tơring âu hơnơ̆ng tŏk pran. Hăm Khánh Hòa, đon pơhnŏng lơ̆m sơnăm 2025 âu gô sơng đei dang 15 triu ‘nu bơngai chă tơmang lăng, iŏk yoa hlŏh 60 rơbâu ti hlak jên. Chă tơmang lăng hơnơ̆ng đei dêh char Khánh Hòa năng jĭ tơdrong jang mŭk drăm tơm tơ̆ tơring; păng tơmât chă tơmang lăng hăm joh ayŏ kơ dŏ xoang ‘nŏh jĭ tơdrong ưh gơ̆h veh.

Dôm tơdrong joh hơri hơxoang nhen “Chum Show” ưh lăp pơm pơ ‘lơ̆ng hlŏh dơ̆ng tơmam chă tơmang lăng đĕch, mă oei pơm hơtŏk kơjă kăp gĭt đơ̆ng joh ayŏ kơ dŏ xoang, tơdrong pran 'lơ̆ng mưh pơjei băl hăm dôm anih chă tơmang lăng. Yă Trần Thị Kim Yến, Kơdră vei lăng Hnam hơri Đó pơma hơdăh, Khánh Hòa ưh lăp đei tơdrong ‘lơ̆ng đơ̆ng cham char bri brăh đĕch, mă oei đei lơ tơdrong juăt joh ayŏ kơ dŏ xoang tôch hơiă, pơjing đei lơ tơdrong pơchĕh 'nao vă rim 'măng chă tơmang lăng đơ̆ng tơmoi gơ̆h jing 1 trong yak chă hơlen năng rim tơdrong 'lơ̆ng hơiă đơ̆ng sơ̆. 

“Đon tơchĕng blŭng a ‘nŏh jĭ tơmât hơdai tơdrong ‘lơ̆ng đơ̆ng lơ hơdrĕch hơdrung tơ̆ tơring. Bơngai đơ̆ng teh đak đe tôch lăp, lăp hăm tơmam chă tơmang lăng âu. Mă lei đơ̆ng rŏng kơ ‘nŏh bơngai Việt bơ̆n lăp đon hlŏh păng truh lơ hlŏh. Đe sư ƀôh hlĭch mă lei nhen juăt păng ƀôh tôch hơiă”./.