Tơdrong jang ‘nao đơ̆ng lêh pơih ăn hơnih tih hloh vă Đắk Lắk roi tơƀôh tơmam sầu riêng, tơgoăt hơdai pơm tơlĕch hăm anih tĕch mơdro, hơdai hăm roi tơƀôh dôm kơjă kăp gĭt joh ayŏ, tơmang lăng kơ tơring teh groi kông păng tơ ter đak dơsĭ.

Pơma pơgơ̆r pơih blŭng, ƀok Đỗ Hữu Huy, Kơdră Anih vei lăng kon pơlei dêh char Đắk Lắk tơbăt, lơ̆m dêh char dang ei đei dang 41.000 hek tar sầu riêng, kơsô̆ tơmam pơyan jang sơnăm 2026 tơchĕng hơdrol vă jê̆ 500.000 tấn, hơdrô̆ sơnăm 2025 kơjă tĕch tơ̆ teh đak đe hloh 1,1 ti USD. Đơ̆ng iŏk yua âu, Đắk Lắk băt hơdăh athei hơtŏk ‘lơ̆ng kơjă tơmam hăm trong pơklep pơm tơlĕch hăm hơtŏk ‘lơ̆ng, tơchă băt anih pơm tơlĕch, pơm tơlĕch jrŭ, logistics păng anih tĕch mơdro.

“Nhôn băt hơdăh athei tơplih pran đơ̆ng đon tơchĕng vei lăng kơsô̆ tơmam choh jang sa jing vei lăng kơjă kăp gĭt choh jang sa; ưh khan lăp bơngơ̆t truh pơm tơlĕch đei dôm yơ tấn, mă athei bơngơ̆t truh 1 hek tar pơm đei dôm yơ kơjă, kon pơlei đei sa yua dôm yơ kơjă, anih mơdro sa vang jang đei dôm yơ lơ̆m trong jang păng hơnăn Đắk Lắk đei chih pơkăp thoi yơ lơ̆m anih tĕch mơdro apŭng plĕnh teh”.

Tơdrong pơm hơtŏk kơjă tơmam kŭm đei tơƀôh hơdăh kiơ̆ đơ̆ng lơ tơdrong jang tơ̆ Lêh sầu riêng Đắk Lắk 2026. Hơdai hăm hop akŏm tơlĕch trong jang sa, tĕch mơdro sầu riêng păng pơjing anih ming pơdă tơmam, lêh oei pơgơ̆r lơ trong tơlĕch trong tĕch mơdro, tĕch tơmam, plei sầu riêng tơ̆ pơgar, truh hơlen năng tơdrong jang tơ̆ pơgar, lêh tơmam sŏng sa hăm 102 tơmam đei pơm hơdai hăm plei sầu riêng. Tơ̆ lêh pơih blŭng, Đắk Lắk kŭm pơjao 2 Ki lŭk Việt Nam đei “Hơkăt tăh sầu riêng tih hlŏh Việt Nam” păng “Tơdrong pơm hơmet păng pơdă tĕch dôm tơmam sa đơ̆ng plei sầu riêng lơ hlŏh Việt Nam”. Dôm tơdrong jang ‘nâu ăn ƀôh tơdrong lêh tŏk bŏk đei pơih xă đơ̆ng roi tơƀôh tơdrong choh jang sa jing tơlĕch trong  tĕch mơdro, joh ayŏ kơ dŏ soang păng chă tơmang lăng. Hăm kon pơlei Đắk Lắk, tơdrong ‘măng mă blŭng pơgơ̆r lêh tih tơ̆ dêh char ‘nŏh jĭ tơdrong ‘lơ̆ng vă sầu riêng đei jơ̆p tơring băt truh, pơih dơ̆ng anih tĕch mơdro păng pơjing jơhngơ̆m pran atŏk tơiung tơmam drăm. Ƀok Bùi Văn Duy, tơ̆ phường Buôn Ma Thuột pơma:      

“Tơmoi đơ̆ng jơ̆p tơring truh tơ̆ tôch lơ păng jơhngơ̆m đon kon pơlei tôch hơiă mưh truh hăm lêh năr ‘nâu. Sầu riêng âu đei lơ bơngai tơrek truh ưh lăp tơ̆ Việt Nam đĕch mă dôm teh đak jŭm dăr bơ̆n hai, kơna kăl đei trong jang tŏk mă pran vă pơjing mŭk drăm roi đunh roi tŏk ‘lơ̆ng.”

Lêh Sầu riêng Đắk Lắk sơnăm 2026 yoa thoi noh kơna ưh khan lăp jing 1 tơdrong vă roi tơbăt tơmam đĕch mă oei jing tơdrong hơmĕng jing hơyak blŭng a vă tơring pơm hơtŏk anih jang, pơih xă trong jang hơdoi păng dar deh pơjing mĭnh tơdrong lêh tih gơ̆h păr ang jơ̆p jang lơ̆m dôm sơnăm truh.