Show pơdah “Hnam kơjung” đei 4 apăng, pơih blŭng hăm “Hơnih hơpo” păng 3 tơdrong tơm “Dring gah”, “Gah” păng “Ốk”. Bơngai lăng đei chơng ba kiơ̆ lơ cham char, chă pơdah kơ tơdrong hơrih ÊĐê, đơ̆ng hơrih tơguăt hăm cham char plenh teh, chă rôp hơnguang, choh jang mir ƀa truh tơdrong hơrih joh ayŏ, đon bơnôh tơguăt hăm hnam kơjung.

Dôm tơdra hơri brông, jơva chĭng chêng, tơmam tôn reh kon kông, nơ̆r khan, khôi juăt păng tơdrong hơrih pơlei pơla đei akŏm pơdah joh ayŏ hăm unh pơchră ang păng hơnih pơdah 'nao hơgei. Hơnih phara kơ tơdrong pơdah noh bơngai lăng ưh hơdrô̆ đei lăng mă đei yak kiơ̆ cham char, hrou dơh po lơ̆m minh ƀar pơdah, kiơ̆ đơ̆ng noh băt hơdah hloh gah tơdrong hơrih joh ayŏ juăt jue kơ bơngai Ê Đê.

Dôm bơngai đei akŏm pơdah noh jĭ đe ngê̆ nhơ̆n păng kon pơlei ÊĐê. Tôm tơdrong pơdah pơma hăm nơ̆r ÊĐê, tơgop vei răk tơƀăk mong đak kơ-ang so sơ̆ kơ tơdrong joh ayŏ đei pơdah dơ̆ng.

Hơlen lăng tơdrong pơdah, yă Lê Thị Lý, tơ̆ phương Buôn Ma Thuột, dêh char Đăk Lăk ăn tơbăt, tơdrong pơdah akŏm ƀenh tơdrong vơch ah mă pơdah dơ̆ng tơdrong et pơkong, khôi juăt kră sơ̆, hơbăn ao hrŭk păng chơmei pơguăng kơ đe drăkăn ÊĐê hơdrol ki:  “Ƀơ̆t inh lăng băt hơdah noh vơch kơ đon tơpă. Inh ƀôh tơdrong hơrih kon pơlei sơ̆ ki noh 'lơ̆ng păng lăng ƀôh đei tơdrong joh ayŏ athei răk vei. Ưh kơ ê Đăk Lăk pơjing đei minh tơdrong pơdah 'lơ̆ng thoi ou”

Ƀok Trần Hồng Tiến, Kơdră Hơnih jang Joh ayŏ, Tơplŏng kơdou păng Tơmang pơhiơ̆ Đăk Lăk ăn tơbăt, tơdrong tơmơ̆t kơmăi kơmŏk 'nao lơ̆m tơdrong pơdah joh ayŏ jĭ trong pơkăp jang trŏ ƀlep hăm tơdrong vă hơtŏk jang gah joh ayŏ, atŭm hăm noh pơih đei tơdrong pơjing dôm tơmam drăm tơmang pơhiơ̆ 'nao, pơkăp truh pơjing tơmam drăm tơmang pơhiơ̆ joh ayŏ vă hơvơn lơ tơmoi truh păng pơjing atăm tơdrong kăp gĭt gah mŭk drăm đơ̆ng joh ayŏ tơ̆ tơring: “Nhôn hơpơi 'meh, ou gô jing minh tơmam drăm 'măn ăn tơmang pơhiơ̆ vă tơgŭm ăn hơnih jang tơmang pơhiơ̆ hơtŏk tơ-iung. Ah mă tơmoi truh hăm Đăk Lăk, pơm thoi yơ gơh hơpơi đei lăng dôm show pơdah tơdrong đei tơpă đơ̆ng tơdrong hơrih thoi ou”.