Tơ̆ năr akŏm, dêh char Gia Lai roi tơƀôh lơ tơmam 'lơ̆ng hơiă, đơ̆ng chă tơmang lăng tơ̆ đak dơsĭ Quy Nhơn, bri kông Pleiku, joh ayŏ chĭng chêng, chă tơmang lăng cham char bri brăh, tơmam sa 'lơ̆ng kơ tơring, pơdơ̆h ngôi păng dôm tơmam jang hơdai tơring. Tơdrong tơm 'nŏh tơƀôh hơdăh Gia Lai jing anih truh 'lơ̆ng hơiă. Mă kăl ‘noh, tơdrong jang tơgoăt hăm dôm anih tĕch mơdro truh đơ̆ng Hàn Quốc, Nhật Bản, Trung Quốc, Ấn Độ, Nga, Australia... đei hơmĕng pơih đei anih tĕch mơdro păng tơmoi 'nao ăn Gia Lai păng dôm anih truh đơ̆ng Việt Nam.

Ƀok Hà Văn Siêu, Phŏ Kơdră Anih jang Tơmang lăng Việt Nam pơma hơdăh, lơ̆m khei ‘năr 'mĕh vă păng tơdrong chă tơmang lăng đơ̆ng tơmoi tơplĭh tĕnh koăng, tơdrong đei yua tơmam drăm 'nŏh tam mă tôm. Anih jang tơmang lăng kăl tơplĭh đơ̆ng iŏk yua tơmam drăm jing pơjing pơm pơcheh kơjă kăp gĭt; đơ̆ng pơvih pơvăn hơdrô̆ jing tơmam bri brăh lăng vă kơbăt; đơ̆ng pơjei băl hăm kơ jă jing pơjei dih băl hăm tơdrong 'lơ̆ng păng tơdrong joăt.

“Nhôn băt hơdăh Gia Lai đei tơdrong hiôk gĭt kăl, đơ̆ng sơnăm tơmang lăng teh đak 2026 gơh tơgoăt hăm dôm anih mơdro sa vă jang hơdai tơring păng hơtŏk tơdrong 'lơ̆ng Gia Lai. Nhôn krao hơvơn dôm anih mơdro sa, tơring tơrang, anih jang hơdai pơkăp bơ̆jang: mĭnh tơring 1 tơmam 'lơ̆ng hơiă, hơnhăk tơdrong 'lơ̆ng păng tơdrong pran kơdih kơ tơring. Minh anih mơdro sa 1 tơdrong pơcheh tơplih 'nao pơjing đei kơjă pha ra băl, hơtŏk ‘lơ̆ng tơdrong kĕ pơjei, mưh mĭnh anih truh 'noh jĭ mĭnh tơdrong tơroi joh ayŏ 'lơ̆ng hơiă pơlung jơhngơ̆m, tơgoăt jơhngơ̆m hơiă hăm tơmoi".

Ƀok Phạm Anh Tuấn, Kơdră Anih vei lăng kon pơlei dêh char Gia Lai pơma hơdăh, đơ̆ng rŏng Sơnăm Tơmang lăng Teh đak 2026, dôm anih jang hơdai tơmang lăng gô đei pơjing, tơmam gô hơnơ̆ng đei pơm đei păng rim tơmoi ‘nao gô hơnơ̆ng hơtŏk tơiung. Ƀok ‘meh vă tơpôl mơdro sa ưh khan lăp lăng Gia Lai jĭ 1 hơnih truh ‘nao, mă kŭm hăm tơring pơm đei dôm tơdrong jang ‘nao.

“Inh hơmĕng  năr chă tơmang lăng Việt Nam 'măng mă 2 tơ̆ Gia Lai đei dơ̆ng lơ tơdrong jang hơdai, tơmam 'nao, lơ trong chă tơmang lăng păng tơmoi 'nao truh tơ̆ Gia Lai kŭm nhen dôm anih truh nai kơ Việt Nam. Nhôn hơpơi 'mĕh tơpôl chă tơmang lăng pơm ăn "Bri kông tơƀưh đak dơsĭ 'lơ̆ng rŏ"  đơ̆ng mĭnh nơ̆r roi tơbăt jing mĭnh tơdrong chă tơmang lăng tơpă, đơ̆ng mĭnh tơdrong jang kơ sơnăm 2026 jing mĭnh kơjă kăp gĭt hơtŏk tơiung đunh đai".