Hăm kon pơlei Bahnar, hơdrơ̆m đak dah mă oei krao (đak tơnglang) jĭ um pơtih ăn tơdrong hơrih. Hơdrơ̆m đak hơnơ̆ng đei pơm ah jơ̆ng groi teh đơ̆ng rŏng kơ pơlei, tơjê̆ hăm bri tơm. 'Nou đei lăng jĭ hơnih yang grasia, đei yang đak dăng oei. Yuơ noh, hơdrol kơ sŏ nhă đak, kon pơlei hơnơ̆ng pơgơ̆r et soi vă pôk bơnê păng apinh yang pring vei. Et soi hơdrơ̆m đak hơnơ̆ng đei pơgơ̆r đơ̆ng rŏng kơ kĕch yua tơmam pơtăm, ah mă kon pơlei pơla đei jơ rơvơn pơdơh pơdơi păng hơmet ăn pơyan jang xa 'nao.

Hơmet ăn tơdrong et soi, kon pơlei atŭm dih băl pơ-'nguaih rơgoh hơdrơ̆m đak, choh chong rơgoh 'nhĕt uh, hơmet tơnglang đak. Drăkăn hơmet ge tơdrô, por prung, dôm tơmam xa juăt jue; đe drŏnglo noh pơtăm gơ̆ng, hơmet nhŭng, iĕr. Kră pơlei, bơngai đei kon pơlei lui yom păng hlôh vao kloh klĕch gah khôi juăt gô pơtơm tơdrong soi kơ yang. Vang năm akŏm et soi hơdrơ̆m đak tơ̆ thôn Plei Tơngia, phương Đak Cấm, dêh char Quảng Ngãi, bơngai tơdăm A Sinh tơroi: “Đơ̆ng oei iĕ inh kiơ̆ yă ƀok inh năm et soi hơdrơ̆m đak. Rim 'măng năm akŏm, inh băt hơdah hloh sơnong jang vei vêr thong đak păng khôi juăt kon kông po kơdih”

Lơ̆m pơgơ̆r et soi, jơva chĭng chêng re ang, hrau atŭm hăm tơdra yak jơ̆ng kơ kon pơlei pơjing đei minh hơnih grasia ang bang. Kră pơlei dơ̆ng ah hơnăp hơdrơ̆m đak sơkat hơvơn yang hơbang jur bơ̆ng pang păng et xa hăm kon pơlei.

Đơ̆ng rŏng kơ soi tơbeh, kon pơlei atŭm băl et xa sô̆ hăm dôm tơdrong chă hơsuang tăp dăr gơ̆ng ga. Rim bơngai atŭm băl et tơdrô ge, chă 'nhĕm 'nhot xa kon kông păng tơroi dih băl lơ tơdrong sô̆. 'Nou adoi jĭ 'măng vă kon pơlei tơguăt dih băl, sut hŭt lê̆ dôm tơdrong ưh kơ lăp băl, hơtŏk jơhngơ̆m đon tơguăt tơguăl lơ̆m pơlei pơla.

Minh tơdrong 'lơ̆ng lơ̆m et soi hơdrơ̆m đak noh tơdrong lăng tơgĭt kơ cham char plenh teh. Bơngai Bahnar ưh đei sŏ đak kư̆ kă ôh, mă ling lang vei lăng 'lơ̆ng thong đak. Kon pơlei lui, mưh pơm đak 'mê̆ 'mach, yang gô hĭl păng pơtruh lơ tơdrong ưh kơ 'lơ̆ng. Yă Y Linh, bơngai 'lŏ sơnăm tơ̆ thôn Plei Tơngia, phương Đak Cấm tơroi: “Đơ̆ng kră sơ̆ chă pơtho kon sou ưh gơh tŭk rơm rĕk tơ hơdrơ̆m đak, ưh gơh chă koh phă 'long bri jŭm dăr thong đak. 'Noh ưh kơsĭ khôi luơ̆t, tơdrong oei xa 'lơ̆ng đĕch ôh, mă oei jing trong vă vei lăng cham char hơrih xa ăn kơ tôm pơlei pơla”

Lơ̆m tơdrong hơrih dang ei, et soi hơdrơ̆m đak adoi đei kon pơlei Bahnar tơ̆ tơring Pơmơ̆t dêh char Quảng Ngãi răk vei. Dôm tơdrong akŏm joh ayŏ thoi ou adoi tơgop pơlan să tơdrong oei xa 'lơ̆ng joh ayŏ kơ kon pơlei kon kông truh hăm tơmoi chă tơmang lăng. Ƀok A Ngoát, kơdră thôn Plei Tơngia, phương Đăk Cấm, dêh char Quảng Ngãi tơroi:  "Et soi hơdrơ̆m đak dah mă bơ̆n oei krao et soi đak tơnglang, jĭ et soi kơ yang ddak tơnglang kiơ̆khôi juăt so. Lơ̆m dôm năr pơgơ̆r et soi hơdrơ̆m đak 'noh kon pơlei hơkŭm lơ̆m tơdrong sô̆ chơt, tơnŏ rơhŏ rơhŏm, păng mưh tơmoi truh tơmang tơ̆ pơlei pơla lơ̆m 'măng ou, adoi đei sơng drơ̆ng thoi lĕ 'nhŏng oh po kơdih chôt vih tơ̆ pơlei pơla"

Et soi hơdrơ̆m ( et soi kơ đak tơnglang) kơ bơngai Bahnar ưh hơdrô̆ jĭ khôi juăt joh ayŏ đon lui mă oei tơƀôh tơdrong hơrih xa 'lơ̆ng hăm cham char plenh teh, rim bơngai hơrih xa 'lơ̆ng hăm dih băl lơ̆m tơpôl. Lơ̆m tơdrong hơrih 'nao hrei ou, ah mă lơ trong hơrih jang xa đei lơ tơplih, khôi juăt et soi kơ hơdrơ̆m đak adoi oei đei vei lăng năng tông.