Kơsơ̆ brei (18/8), Khul jang chă tơmang lăng Việt Nam đei jơ bơ̆ jang hăm Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk vă pơjing trong jang atŏk tơiung tơmam lăp hăm anih jang xa, pơjing lơ tơmam ‘lơ̆ng, pha ra ƀiơ̆ vă hơtŏk kơsư̆k pơjei.

Đơ̆ng blŭng sơnăm truh dang ei, dêh char Đắk Lắk sơng đei dang 7,3 triu ‘nu tơmoi chă tơmang lăng, tŏk hlŏh 36% pơting hăm khei âu sơnăm sơ̆. Lơ̆m noh, tơmoi đơ̆ng teh đak đe đei dang 107.500 ‘nu, tŏk vă jê̆ 45%; tơmoi lơ̆m teh đak đei vă jê̆ 7,2 triu ‘nu bơngai. Akŏm đĭ đăng iŏk yoa đei vă jê̆ 13.500 ti hlak jên, tŏk hlŏh 36%. Ƀok Nguyễn Hồng Hải, Phŏ Kơdră vei lăng Khul jang chă tơmang lăng Việt Nam akhan, hăm tơmam ‘lơ̆ng tôch lơ, tơdrong gĭt kăl đơ̆ng Đắk Lắk hrei ‘nâu ‘nŏh athei rơih trŏ tơdrong ‘lơ̆ng vă pơjing đei lơ tơmam ‘lơ̆ng đei hơdrô̆ tơ̆ tơring.