Jang kiơ̆ Tơchơ̆t kơsô̆ 08 xơnăm 2021 đơ̆ng Jơnŭm pơgơ̆r kon pơlei dêh char Đăk Lăk găh tơgŭm atŏk chă tơmang lăng tơpôl tơ̆ dôm pơlei pơla kon kông đơ̆ng xơnăm 2021-2025, lơ̆m 3 xơnăm kơ âu, tơring hlôi tơgŭm ăn 5 pơlei păng 22 unh hnam, hăm kơsô̆ jên vă jê̆ 4,2 tih hlak jên. Jên đei tơgŭm mă lơ ‘nŏh pơ ‘nhŏ ăn pơm hơmet anih jang, cham char, chih kơƀang roi tơƀôh, man hnam chă pơyơ̆ng, anih gre dơ̆ng, hơbăn ao hrŭk păng tơmam tôn reh.

Tơdrong tơgŭm blŭng a, pơjing tơdrong 'lơ̆ng vă kon pơlei vang pơvih pơvăn ăn tơdrong tep pơdơ̆h, sŏng xa, hơri hơxoang păng roi tơƀôh rim tơdrong tơ̆ pơlei. Mă lei, lơ tơdrong jang oei iơ iĕ; tơmam đơ̆ng dôm pơlei oei lei lăi băl, jang hơdoi hăm anih chă tơmang lăng tam mă kơjăp. Kơsô̆ tơmoi truh păng jên iŏk đei tam mă sơđơ̆ng, pơm pơmat tat ăn tơdrong hơmet ming anih jang, tơmât jên jang păng vei kơjăp tơdrong jang xa mưh tôch khei ‘năr tơgŭm.

Yă H’Zuni Niê, Bí thư Chi bộ plei chă tơmang lăng lơ̆m tơpôl Akǒ Dhông akhan, trong tơgŭm 'nao athei yak hơdoi đunh đai hăm tơpôl: "Tơdrong tơchơ̆t 08 sơnăm 2021 đơ̆ng Jơnŭm pơgơ̆r kon pơlei dêh char 'nŏh jĭ tơdrong tơm gĭt kăl vă atŏk tơiung chă tơmang lăng lơ̆m tơpôl, đơ̆ng dôm lăm pơtho bơ̆ jang chă tơmang lăng truh tơdrong tơgŭm anih jang, tơmam drăm, ‘nŏh jĭ tơdrong tôch ‘lơ̆ng vă kon pơlei tưk tơiung tơdrong chă tơmang lăng. Hơpơi ‘mĕh tơdrong tơgŭm đơ̆ng 2026-2030 gô hơmet roi ‘lơ̆ng ƀiơ̆ găh trong pơgơ̆r jang, ưh lăp tơgŭm mĭnh 'măng đĕch mă hơnơ̆ng pơgơ̆r hơdai; đei lơ tơdrong tơgŭm rơđăh ƀiơ̆ hăm dôm bơngai oei chĕp vei hnam kơjung, đe ngê̆ nhơ̆n tôn chĭng chêng dăh mă ngê̆ nhơ̆n tanh brai vai khăn."

Tơ̆ hop akŏm, dôm bơngai tang măt Jơnŭm pơgơ̆r kon pơlei dêh char Đăk Lăk kŭm tơlĕch lơ nơ̆r tơgop, apĭnh găh trong jang tơgŭm đơ̆ng 2026-2030 tơplih đơ̆ng tơgŭm rim tơdrong jang jing vang yak hơdai lơ̆m pơđĭ tơdrong pơjing tơmam, pơgơ̆r bơ̆jang păng tĕch mơdro. Hơdai hăm, hơmet pơ 'lơ̆ng dôm tơdrong tơhlăk găh teh, jên jang păng jên asong tŏk iŏk păng anih jang tơgŭm, kăl kơ pơm hơdăh hơnăp jang vei lăng tơdrong jang; hơtŏk 'lơ̆ng tơdrong gơh jang păng tơdrong jang hơdai vă kon pơlei tơpă pơm tơm tơdrong jang chă tơmang lăng.

Pơtôch hop akŏm, yă Cao Thị Hòa An, Phŏ Kơdră chĕp kơ̆l Đảng dêh char, Kơdră Jơnŭm pơgơ̆r kon pơlei dêh char Dak Lăk athei Anih vei lăng kon pơlei dêh char jăh tơchĕng hơlen trong jang 'nao tơplih ăn Tơdrong tơchơ̆t kơsô̆ 08 găh tơgŭm atŏk tơ iung chă tơmang lăng lơ̆m tơpôl tơ̆ rim pơlei pơla kon kông.

“Inh athei Anih vei lăng kon pơlei dêh char jăh tơchĕng hơlen, jang tơgŭm vă tơlĕch trong jang 'nao tơplih ăn tơdrong tơchơ̆t so. Dôm tơdrong pơmat tat, tơhlăk tăk, ưh kơ lăp 'nŏh bơ̆n athei đei trong jang vă  jang mă 'lơ̆ng ƀiơ̆. Iŏk kon pơlei, anih tĕch mơdro păng kon pơlei pơm tơm vă tưk tơiung tơdrong jang hơdoi đơ̆ng hơp tak xăh chă tơmang lăng lơ̆m tơpôl hăm anih chă tơmang lăng; pơtho pơhrăm, pơtâp pơhrăm kơtă anih găh tơdrong juăt jang, nơ̆r teh đak đe, tơmam xa vă kơdih kon pơlei pơm tơdrong pơvih pơvăn hai.”