Tơdrong pơgơ̆r hăm hơnăn "Đơ̆ng Huila lĕch truh apŭng plĕnh teh" yua đơ̆ng Bơngai tang măt ăn teh đak Colombia tơ̆ Việt Nam jang hơdai hăm dôm anih bơ̆ jang pơlei tơm Đà Nẵng pơgơ̆r. Tơ̆ tơdrong pơgơ̆r, dôm bơngai joh hơri mơlôh Colombia tơƀôh truh kon pơlei păng tơmoi tơmang lăng Hội An dôm tơdrong joh hơri hơsoang 'lơ̆ng hơiă nhen Bambuco, Rumba Campesina, Rajaleña păng Sanjuanero.

Vang akŏm tơdrong jang oei đei đe oh hơioh pơlei tơm Đà Nẵng. Kiơ̆ đơ̆ng dôm ƀai hơri hơsoang, đe buăl mơlôh 2 teh đak đei dơ̆ng tơdrong hiôk tơƀơ̆p, vang tơroi păng hlôh ƀiơ̆ găh joh ayŏ kơdŏ soang đơ̆ng băl. Tơdrong jang oei lơ̆m khei ‘năr pơcheh Jang tơbôl Tơplŏng kơdâu păng Joh ayŏ kơdŏ soang đơ̆ng Anih tơm jang tơbôl Colombia, yak truh pơtrŭt mơ̆t hơdai tơpôl, vang hơrih hơdai rơngei păng pơma dơnuh găh 2 tơdrong joh ayŏ, mă loi ‘noh ‘moi kiơ̆ dôm tơdrong jang ‘măn ăn hơdruh tơdăm, hơioh.