Hăm bơngai tơdăm Jarai gơ̆h hơgei Rơ Châm Blinh, tơ̆ xăh Ia Phí, dêh char Gia Lai, tơdrong pơchĕh rơgei hlôi jing mĭnh păh lơ̆m tơdrong arih xa. Lĕch 'măng khoă hŏk tơdrong jang chhơ̆ rup, mă lei 'nhŏng iŏk đei jơnei lơ̆m tơdrong jang hơri hăm dôm ƀai hơri 2 nơ̆r Jarai – Việt ƀơm truh tơdrong hơri Tây Nguyên, păr ang pran kơtang lơ̆m kơmăy kơsô̆.

Đei ƀơ̆r hơri hơbôn hiôk, jăng kŭm hăm trong hơri ƀĕnh tơdrong 'lơ̆ng kơ bri kông, dôm video "triệu View" đơ̆ng Rơ Châm Blinh hơnhăk ba lơ tơdrong 'nao ăn bơngai mơ̆ng. Kiơ̆ đơ̆ng tơdrong hơri hơxoang, 'nhŏng 'mĕh chĕp vei, tưk tơiung tơdrong juăt jŏh ayŏ kơ dŏ xoang kơ hơdrĕch kơdih. Jang kiơ̆ sơnăm chă tơmang lăng kơ teh đak Gia Lai 2026, sư iŏk đei jơnei mă mônh 'Măng pơlong video chă tơmang lăng Gia Lai 2026 hăm hơnăn "Rim kon pơlei Gia Lai jĭ mĭnh 'nu bơngai tang măt ăn chă tơmang lăng". Tơ̆ Hop akŏm KOL dêh char Gia Lai 2026, pơgơ̆r ‘năr 11/9, Rơ Châm Blinh tơroi:

“Ĭnh tôch kơ chhôk hơiă ƀơ̆t đei Kŏng an dêh char Gia Lai hơvơn vang truh Hop akŏm KOL Gia Lai 2026. Tơ̆ âu, ĭnh đei tơdrong hiôk tơƀơ̆p păng pơma dơnuh hăm lơ 'nhŏng oh pơcheh tơdrong truh đơ̆ng Quy Nhơn kŭm nhen dôm tơring nai. 'Nâu jĭ 'măng tôch kơ ‘lơ̆ng vă tơpôl pơcheh tơdrong vang hŏk pơhrăm, tơgoăt păng roi tơƀôh um rup pơlei pơla. Kơdih kâu ĭnh ling lang hơpơi 'meh vă dôm bơngai pơcheh tơdrong gô hơdrin roi tơƀôh lơ hloh dơ̆ng găh tơdrong 'lơ̆ng hơiă joh ayŏ, tơdrong joăt oei sa păng dôm tơdrong et soi gĭt kăl kơ tơring teh âu."

Kŭm hăm dôm video hmă, mŏ Rah Lan H'Wĩ, tơ̆ plei Kte Lớn A, xăh Phú Thiện, dêh char Gia Lai, tŏk bŏk tơgop păr ang tơdrong 'lơ̆ng hơiă joh ayŏ Jarai lơ̆m kơmăy kơsô̆. Lĕch 'măng khoă Hnam trưng Đại học Thể dục Thể thao Đà Nẵng, H'Wĩ đei tơdrong rơgei ‘meh tĕch mơdro online lơ̆m TikTok păng Facebook. Dôm video găh tơdrong joăt đơ̆ng sơ̆ đei mŏ pơm tơlĕch kơtă tơ̆ pơlei păng lơ̆m unh hnam hlôi sơng đei kơtriê̆u 'nu bơngai lăng.

Đơ̆ng soi jơhngơ̆m pran, soi bluh đon, krao pơ hngol truh dôm tơmam sa joăt joe nhen hla ƀlang sao, ka tơ ‘ngum hla prit, tŭl pro har…, H'Wĩ hơ 'nhăk tơdrong joăt Jarai truh hăm bơngai lăng hăm dôm um rup tơjê̆. 'Nao âu, video kuay bơngai mĕ pơđih tơdrô ge Jarai joăt joe hơnơ̆ng iŏk đei tơdrong lăng truh đơ̆ng tơpôl mạng. Hăm H'Wĩ, pơjing tơdrong tơroi 'nŏh jĭ tơdrong jang sa, kŭm jing trong vă pơtruh tơdrong oei sa joăt joe pơlei pơla.

“Inh pơm tơdrong tơroi lơ̆m TikTok, găh lơ tơƀôh găh tơdrong jang tơchă jên vă pơm 1 pôm hnam ăn kơ mĕ ƀă. Dôm tơdrong tơroi ‘noh iŏk đei tơdrong lăng truh păng tơgŭm đơ̆ng lơ bơngai. Đei vang truh Hop akŏm KOL dêh char Gia Lai ‘noh jĭ 1 tơdrong chơt hơiă păng kŭm jing tơdrong ‘lơ̆ng tôch kơ tih hăm inh. Lơ̆m tơdrong jang pơm tơdrong tơroi, inh ling lang băt dôm bơngai hlôi ‘mêm kơ eng, tơgŭm păng vang yak hơdai hăm inh. Kơlih đơ̆ng gơnang tơdrong bơngơ̆t truh đơ̆ng rim bơngai mă inh đei đăi năr ‘nâu. Kiơ̆ đơ̆ng hop akŏm ‘măng âu, inh kŭm ‘meh vă tơgop 1 păh jơhngơ̆m iĕ ioch đơ̆ng kơdih vă roi tơƀôh, păr ang dôm um rup kơ tơring”.

Ưh lăp dôm bơngai mơlôh chih tơroi tơƀôh găh joh ayŏ kơdŏ xoang, tơdrong hơrih sa đĕch, mă khŭl lĭnh Kŏng an kŭm oei iŏk yua mạng tơpôl vă tơƀôh um rup 'lơ̆ng hơiă truh hăm kon pơlei. Thiếu tá Lại Văn Đạt, kang ƀô̆ Khŭl vei sơđơ̆ng, Kŏng an xăh Phú Thiện, jĭ mĭnh lơ̆m dôm KOL kơ dêh char Gia Lai đei tơpôl mạng băt truh hăm tơdrong jang "Kŏng an vih tơ̆ pơlei". Kơplăh bơ̆jang, tơƀơ̆p kon pơlei, ‘nhŏng chă hŏk kơdih nơ̆r Jarai vă roi tơbăt khôi luơ̆t hăm nơ̆r kon kông; hơdai hăm krao hơvơn, asong 500 tŏ klang tap ăn hŏk tro mơmat tat mưh mơ̆t hŏk sơnăm hŏk 'nao. Dôm um rup đơ̆ng tơring đei Thiếu tá Lại Văn Đạt phĭn răk, chih hơmet, tơroi lơ̆m mạng tơpôl tôch đei yoa, pơm ăn rơbâu ‘nu bơngai pơih lăng. Kiơ̆ kơ 'nhŏng, tơdrong chă hŏk pơhrăm nơ̆r Jarai đơ̆ng kơdih, hlôh vao tơdrong juăt, joh ayŏ kơdŏ xoang đơ̆ng kon pơlei sư tơgŭm tơdrong jang tơroi tơbăt, hơvơn roi jê̆ kon pơlei păng đei iŏk yoa ‘lơ̆ng.

"Mưh inh chă pơhrăm păng băt nơ̆r kon kông jĭ bơngai Jarai, ‘noh bơ̆ jang ƀôh ƀônh ƀiơ̆, roi hơiă ƀiơ̆ kơna băt hơdăh tơdrong hơpơi 'meh đơ̆ng kon pơlei. Đơ̆ng noh nhôn đei trong jang, roi tơbăt, hơvơn lăp hăm yăn âu, kơna đei kon pơlei lăp đon, tơgŭm mưh nhôn bơ̆ jang, roi tơbăt hăm nơ̆r Jarai kŭm nhen chă tơgŭm kon pơlei".

Hop akŏm KOL dêh char Gia Lai sơnăm 2026, hăm hơnăn "Tơring bri kông tơƀưh hăm đak dơsĭ – Tơiung đon lui kơsô̆", đei pơgơ̆r lơ̆m tơdrong jang Sơnăm Tơmang lăng kơ teh đak 2026, vă tơguăt tơpôl, tơroi tơdrong hlôh vao păng vang tơƀôh hơdăh tơdrong joh ayŏ kơdŏ xoang, tơmang lăng, kon bơngai Gia Lai. Noh jĭ tơdrong tơƀơ̆p đơ̆ng dôm pang, dôm tơdrong tơroi păng dôm kon bơngai rim năr oei iŏk yua jơhngơ̆m pran đơ̆ng kơdih vă roi tơƀôh tơpăt ‘lơ̆ng dôm tơdrong đei tơpă. Kiơ̆ đơ̆ng noh, pơjing minh anih jang kơmăy sô̆ sơđơ̆ng ‘lơ̆ng, gơh hơgei păng gơ̆h lui kiơ̆.