20 sơnăm âu ki, tơdrong tôn chĭng chêng đei vei kơjăp hăm lơ trong pơgơ̆r dơ̆ng dôm tơdrong lêh so, vei kơjăp khul tôn chĭng, pơih lăm pơtho tôn chĭng ăn druh dăm păng iung, roi tơbăt tơdrong juăt ‘lơ̆ng hăm apŭng plenh teh, tơmât hơdai tơdrong chĕp vei hăm atŏk tơiung chă tơmang lăng găh joh ayŏ kơ dŏ xoang.

Hơdrô̆ tơ̆ Đắk Lắk, 20 sơnăm âu ki, dêh char asong ăn 214 sơmrŭk chĭng chêng păng hlŏh 1.140 blăh hơbăn ao tanh; pơih 26 lăm pơtho tôn, reh, hơri hơxoang, tơroi hơ ‘mon; chih akŏm, pơgơ̆r dơ̆ng dôm tơdrong juăt tôn chĭng kơ bơngai Rađe, M’nông; pôk hơpăh hơnăn Nghê̆ nhơ̆n rơgei ăn 45 ‘nu bơngai. Kiơ̆ ƀok Đào Mỹ, Phŏ Kơdră vei lăng kon pơlei dêh char Đắk Lắk, kiơ̆ đơ̆ng hop akŏm âu, dêh char chih iŏk lơ nơ̆r pơma, roi tơbăt dôm kơjă kăp gĭt vă chĕp vei, tưk tơiung hlŏh dơ̆ng tơdrong juăt tôn chĭng chêng.