Lơ̆m tơdrong joh ayŏ kơ bơngai Êđê, tơdra chĭng chêng ưh kơsĭ tơdra ƀônh hiôk đĕch ôh. Noh jing nơ̆r krao hơvơn kon pơlei pơla, jing tơdra ang bang lơ̆m dôm tơdrong kăp gĭt kơ tơdrong hơrih kon bơngai. Bơngai hơ-ioh đei rơneh noh đei tơdra chĭng chêng pơsô̆ pơchơt. Ah mă bơngai kră lôch hiong, tơdra chĭng chêng re ang tơbang tơdrong tơklah.

Ngê̆ nhơ̆n Y Tŏ Byă, dah mă đe oei krao Aê Sa, tơ̆ pơlei Dang Kang, xah Dang Kang, dêh char Đăk Lăk tơroi, tơdra chĭng chêng ưh gơh kơƀah lơ̆m tơdrong hơrih. Mă lei vă gơh tôn minh ƀai chêng, dôm bơngai pơhrăm tôn chĭng chêng athei pơtơm đơ̆ng tơdra ƀônh hiôk hloh – chĭng kram: “Kiơ̆ khôi kră sơ̆, lơ̆m dôm tơdrong et xa kơ pơlei pơla, tơdra chĭng chêng hơnơ̆ng đei lăng kăp gĭt. Rim 'măng et soi kơ Yang, tơdra chĭng chêng đei tôn pơre. Mă lei hơdrol hloh 'noh, athei pơhrăm tôn chĭng kram 'mơ̆i. Ah gơh tôm tơdra chĭng chêng, đe sư pơtoi pơhrăm tôn chĭng kong”

Đơ̆ng tơdra chĭng kram mă blŭng, bơngai hŏk pơm juăt hăm rim tơdra. Păng đơ̆ng rŏng kơ noh ah tơdra chĭng kong re ang lơ̆m dôm tơdrong et xa ưh hơdrô̆ pơre tơdra ang, mă oei hơnhăk hloi dôm tơdrong kăp gĭt joh ayŏ đei pơdjoi đơ̆ng lơ jơhnơr hơrih. Ngê̆ nhơ̆n Y Ka Niê (Aê Cứu), tơ̆ pơlei Dang Kang, xah Dang Kang, dêh char Đăk Lăk ăn tơbăt: “Dang ei inh hlôi 'lŏ sơnăm bơih, mă lei inh adoi oei hơdrin pơtho chĭng chêng ăn kon sou lơ̆m pơlei. Truh dang ei, inh hlôi pơhrăm đei minh khŭl, đe mon hlôi tôn goh tôm ƀai chêng mă inh pơtho ăn. Inh hơpơi 'meh kon soi pơtoi pơhrăm păng răk vei tơdra chĭng chêng, vă ưh đei pơm tơhiong tơdrong joh ayŏ juăt jue kon kông po kơdih”

Hăm tơdrong pơgơ̆r dăp đon dăp bơnôh đơ̆ng đe ngê̆ nhơ̆n, tơdrong pơhrăm chĭng chêng lơ̆m pơlei hơnơ̆ng đei akŏm 'lơ̆ng. 'Noh ưh hơdrô̆ pơhrăm gah trong tôn minh tơdra chêng. Mă oei jing 'măng ăn đe hơ-ioh hlôh vao hơdah hloh gah joh ayŏ kon kông po kơdih. Đei oh lăp 'nao 7 sơnăm hlôi pơtơm pơm juăt hăm chĭng kram. Đơ̆ng hnam kơjung, tơdra chĭng chêng kiơ̆ đe oh truh tơ̆ hnam trưng hŏk, truh dôm tơdrong akŏm lơ̆m pơlei pơla. 'Nhŏng Y Tloi Niê (Ama Tra), bơngai hơrih lơ̆m pơlei tơroi:  “Tơdrong vei răk tơƀăk mong păng pơtho chĭng chêng đei đơ̆ng tơdrong 'meh vă đơ̆ng kon pơlei lơ̆m pơlei. Nhôn hơnơ̆ng pơtho pơhrăm an kon soi, đơ̆ng đe hơ-ioh truh khul 'lŏ sơnăm. Mă kăl, đe 'lŏ sơnăm pơtho ăn kon sou đơ̆ng 7 truh 8 sơnăm, atŭm hăm noh hơmet pơtho ăn đe hŏk tro tơ̆ hnam trưng jăl 2.”

“Tơƀăng kră pơlă pla”, mă lei hăm tơdrong tơplih tenh kuăng kơ tơpôl, lơ đe sơnăm mơlôh hăt hot năm jang xa tơ̆ hơtaih, noh ưh kơsĭ layơ pơlei pơla adoi gơh akŏm chă pơhrăm tôm khul chĭng chêng mơlôh. 'Noh jing tơdrong mă ngê̆ nhơ̆n Y Cheo Byă (Aê Bươm), tơ̆ pơlei Dang Kang pơngơ̆t kơ đon hloh: “Tơpă noh, khul ngê̆ nhơ̆n nhôn 'lŏ sơnăm bơih, mă lei kŭm hơnơ̆ng chă pơhrăm atŭm dih băl. Kăp gĭt hloh noh tơring kăl đei tơdrong pơkăp pơtho pơhrăm 'noh tơdrong vei răk tơƀăk mong chĭng chêng gô đei jơnei hloh. 'Nou ưh hơdrô̆ jĭ tơdrong jang kơ đe ngê̆ nhơ̆n nhôn đĕch ôh, kơlih nhôn hlôi 'lŏ sơnăm, ning mônh kơnh pă đei grăng pran vă chă năm pơdah tơ̆ ou tơ̆ to bơih”

Tơdra chĭng chêng Dang Kang 'năr ou adoi oei re ang lơ̆m rim 'măng et xa. Mă lei đơ̆ng rŏng kơ rim tơdra brông brŏng noh jing pă lĕ dôm yơ tơdrong pơngơ̆t đơ̆ng đe ngê̆ nhơ̆n kră. Đon 'mêm păng tơdrong hơdrin đơ̆ng đe ngê̆ nhơ̆n tŏk bŏk oei pơdjoi "pơhngol" kơ bri kông hăm đe sơnăm mơlôh. Vă rim 'măng ah kơmăng jur, tơring bri kông, đe adoi oei kơtơ̆ng tơdra chĭng chêng re ang nhen kơ tơdra hơrih xa tam mă lah pơdơh kơ pơlei pơla Dang Kang.