Ƀa mir hlôi kĕch đang, hloh 4.000 ‘nu kon pơlei jơ̆p pơlei pơtơm dih băl vang năm pơgơ̆r pơm lêh tơ̆ hơnih kơdrơ̆m tơring Phước Chánh, Đà Nẵng. Ưh kơ đei proh hơmet hơdrol, ưh kơ đei hơnih pơrŏ, năr lêh lăp đei dôm tơmam drăm, tơdrong oei sa joăt joe kơ kon pơlei Bhnong (mĭnh sơdrai hơdrung Giẻ Triêng): hnam pơtăm, pơk ƀa, hnam gŏ đei chă pơm nhen lĕ tơ̆ pơlei; hơnih hơjơ̆m ngar khưi; tơkhông brai tơ̆k klơ̆k chă tanh ƀơ̆t pra hnam. Nhen lĕ mĭnh pơlei bơngai Bhnong đei pơjing. Ngê̆ nhân Lê Thị Oanh, tơring Phước Chánh tơbăt:“Truh năr lêh oei sa joh ayŏ Bhnong, pơlei nhôn ‘meh vă tơƀôh tơbăt tơdrong oei sa joăt joe nhen chĭng chêng, sơgơ̆r, dui brai vai tanh khăn ... ‘Nou jĭ tơdrong oei sa joăt joe kơ bơngai Bhnong”.

Bơngai Bhnong đei lơ tơdrong oei sa joăt joe ‘lơ̆ng rŏ gơnang lơ̆m bri: đơ̆ng tơdrong jang hơjơ̆m, hnam pơtăm, pơk ƀa, truh tơdrong jơmŭl pơtăm ƀa hơƀo tơ̆ mir: Đĭ đăng đei pơm nhen tơdrong oei sa yan ou. Tŏk bŏk rĕng tơmam drăm nơ̆r pơma hiơ hiĕk iơ iơ̆r iơ iăr, mĭnh ‘nu hơdruh hơngŭr tanh brai. Ngê̆ nhân sơnăm mơlôh Hồ Thị Trang, tơring Phước Chánh, tơroi:“Khul mơlôh nhôn chơt dêh, hưch hanh hơmanh bơnê mưh đei vang năm pơm lêh tơgop lơ̆m vei răk tơƀăk mong tơdrong oei sa joăt joe sơ̆ ki lơ̆m tơring bơ̆n”.

Tơdrong oei sa ƀĕnh ƀang tơdrong lơ loh, mă lei mưh mĭnh ‘nu ngê̆ nhân sơnăm ‘lŏ kră kiơ̆ mĕ ƀă yă ƀok, jei jing jơ ‘năr tơdrong ƀlŏk hơdơ̆r kơ kon pơlei hơmơt vă hiong hiơt. Đơ̆ng năr khul kơdră chĕp pơgơ̆r tơring 2 kâp đei iung jang, tŏk bŏk lơ̆m ƀĕnh ƀang tơdrong jang, kơdră chĕp pơgơ̆r rim tơring groi kông pơlei tơm Đà Nẵng ‘măn lơ jơhngơ̆m đon ăn tơdrong vei răk tơƀăk mong tơdrong oei sa joăt joe. Rim chĭng tơmo, rim chĭng chêng gŏ ge răh rap lơ̆m kon pơlei đei jô̆ hơlen, đei trong iung jang vei răk tơ̆ hơnăp tơdrong đe tơchă răt mŭk drăm so. Hăm khul kơdră chĕp pơgơ̆r tơ̆ ou, tơdrong oei sa joh ayŏ joăt joe ưh khan vă chă pơdă, mă lei ‘noh mŭk drăm gĭt kăl vă ‘măn ăn kon pơlei pơla. Ƀok Lê Đình Tài, Kơdră chĕp pơgơ̆r Hơnih vei lăng kon pơlei tơring Phước Chánh tơbăt:“Xơkơ̆t hơdăh tơdrong oei sa joh ayŏ jĭ jơhngơ̆m pran vă atŏk tơ iung mŭk drăm oei sa tơpôl kơjăp ‘lơ̆ng, mă kăl tơlĕch jang kiơ̆ ‘lơ̆ng Tơdrong tơchơ̆t 80 đơ̆ng Hơnih tơm Chinh trĭ găh atŏk tơ iung tơdrong oei sa ‘lơ̆ng rŏ Việt Nam mơ̆t lơ̆m tơdrong hơrih yan ou, nhôn ‘măn lơ khul, kon jên hu vă pơgơ̆r năr lêh joh ayŏ kơdŏ soang joăt joe”.

Tơ̆ tơring groi kông Đà Nẵng, tơdrong oei sa joăt joe sơ̆ ki kơ kon pơlei Cor đei ‘măng ngêh ngăi đĭ hiong hiơt. Mă lei hrei ou, mưh truh pơyan kơ̆m kang kơnang giĕng khei pơyan, lơ̆m rim pơlei bơngai Cor, đe ƀôh dơ̆ng hơdruh tơdăm hrŭk hơbĕn ao tanh, hơngŭr lơ̆m tơdrong pơgơ̆r pơlong dih băl tôn chĭng chêng. Găh rŏng tơdrong đei jing dơ̆ng ‘noh ngê̆ nhân ưu tú Dương Lai, oei tơ̆ tơring Trà Liên, pơlei tơm Đà Nẵng. Hloh 30 sơnăm, ƀok chă yak jơ̆p pơlei pơla, tơhoach jơ ‘năr, jên hu lăp vă pơjing dơ̆ng đei tơdra hơri kon pơlei, tơdrong tôn reh kơ kon pơlei. Truh dang ei, tơdrong oei sa joăt joe kơ bơngai Cor hlôi gei dơ̆ng nhen lĕ đêl so. Ngê̆ nhân ưu tú Dương Lai pơma:“Tơdrong oei sa joăt joe ‘noh kơ bơ̆n, kơna ba năm chă pơrô̆, hơvơn kon pơlei hơdrin vei kơjăp tơdrong oei sa joăt joe ‘lơ̆ng rŏ kơ bơ̆n…”

Dôm bơngai nhen ƀok Dương Lai hlôi jing hơnglŏng pơchrang rang hơdăh ăn tơring Đà Nẵng. Iŏk ngê̆ nhân pơm tơm, jơ̆p mĭnh tơring să oei sa joh ayŏ joăt joe ‘lơ̆ng rŏ sơ̆ ki tŏk bŏk đei gei kơjăp dơ̆ng. Tơdrong mă ‘noh ưh khan lăp hơdrô̆ rim ngê̆ nhân, mălei tŏk bŏk đei khul kơdră tơring vang yak hơdoi iung jang.

Chĕp pơgơ̆r bơ̆ jang tơring 2 kâp, pơlei tơm Đà Nẵng ưh khan lăp pơngơ̆t ăn tơdrong por ‘nhot ăn kon pơlei tơring groi kông, mă oei lăng ba truh tơdrong  oei sa. Đơ̆ng rŏng hơgrop hăm dêh char Quảng Nam, lơ tơring, phương pro tơmăn Đà Nẵng hlôi pơm ‘nhŏng oh, tơbăt dih băl, jang hơdoi hăm rim tơring groi kông - mĭnh păh tơgŭm dih băl atŏk tơ iung mŭk drăm, mĭnh păh tơƀơ̆t dih băl, tơgoăt dih băl dôm tơdrong oei sa ‘lơ̆ng rŏ. Lơ tơdrong kơ̆m kang kơnang giĕng đei pơjing dơ̆ng lơ̆m pơlei pơla; tơdrong pơgơ̆r joh ayŏ kơdŏ soang, vei răk tơƀăk mong đei tơ iung pơjing, hơnhăk tơdrong oei sa joăt joe truh hăm tơring-vă kon pơlei minh păh pơm tơ-‘ngla, mĭnh păh đei iŏk yoa sa hơpăh đơ̆ng mŭk drăm kơdih. ‘Nou jei jing trong jang mă Tơdrong tơchơ̆t 80 kơ Hơnih tơm Chinh trĭ găh atŏk tơ iung tơdrong oei sa joh ayŏ ‘lơ̆ng rŏ hơdrĕch hơdrung lăng truh. Ƀok Nguyễn Mạnh Hà, Kơdră chĕp pơgơ̆r Hơnih jang vei lăng Kon kông păng Lui khop pơlei tơm Đà Nẵng sơkơ̆t hơdăh:“Pơlei tơm Đà Nẵng lăng ba tôch kơtang truh tơdrong oei sa joăt joe sơ̆ ki, pơrô̆ jang kiơ̆ kơjăp Tơdrong tơchơ̆t 80 đơ̆ng Hơnih tơm Chinh trĭ găh atŏk tơ iung tơdrong oei sa ‘lơ̆ng rŏ sơ̆ ki. Khei năr ou ki, lơ tơring tơlĕch jang kiơ̆ Tơdrong Tơchơ̆t ou tôch hơdăh”.

Đơ̆ng rŏng hơgrop hăm Quảng Nam, pơlei tơm Đà Nẵng ưh khan lăp tih să găh groi teh, mă tŏk bŏk hơnhăk ba mĭnh mŭk drăm tih tên: 2 mŭk drăm gĭt kăl dăr sơnăm oei sa ‘lơ̆ng rŏ apŭng plĕnh teh, 1 tơmam oei sa joh ayŏ kơdŏ soang tang măt ăn kon bơngai, 28 tơmamgĭt kăl dăr sơnăm teh đak, 4 hơnih gru gra gĭt kăl dăr sơnăm teh đak. Hơdrô̆ tơring groi kông, đei hơri pơjoang, pơma pơjoang, hơsoang tung tung da dá, tơdrong jang dui brai vai tanh khăn kơ bơngai Cơ Tu, dăh mă tơdrong pơm pơrŏ ‘lơ̆ng liĕm gơ̆ng ga kơ bơngai Cor ... đĭ đăng jei hlôi đei pôk pơ ăn hơnăn mŭk drăm oei sa joh ayŏ joăt joe sơ̆ ki kơ teh đak.

Đơ̆ng rim pơlei iĕ tơ̆ groi kông, mĭnh tơdrong hơpơi ‘meh vă tih tên tŏk bŏk đei pơjing: ba Đà Nẵng jing pơlei tơm mŭk drăm gĭt kăl dăr sơnăm-tơchăr-đei lơ tơdrong oei sa ‘lơ̆ng rŏ, hơnih rim bơngai kon pơlei jei jing bơngai tơ-‘ngla  kơ dôm mŭk drăm gĭt kăl dăr sơnăm kơ bơ̆n tŏk bŏk vei răk tơƀăk mong.