Hăm tơdrong chơt hơiă kơ Năr joh ayŏ kơdŏ soang, ƀơ̆t Cham să 16/4 ƀrŭng ƀrăng khăn hơbăn ao tanh păng djơ djrĭng jơva re đơ̆ng dôm tơmam tôn reh. Dơ dĭng jơva Paranưng, klel Saranai mơ̆ng tôch kơ hơiă lơ̆m jơhngơ̆m đon, ‘nhŏng David, mĭnh ‘nu bơngai truh đơ̆ng Mi tôch kơ hơiă pơma:

“Ĭnh ‘meh mơ̆ng tơdrong tôn reh đơ̆ng bơngai Chăm, ƀôh tôch kơ hơiă, hiôk chơt lơ̆m jơhngơ̆m, nhen băt dơ̆ng tơdrong hưch hanh đơ̆ng kon bơngai, ‘nâu jĭ tơmam tanh đơ̆ng sơ̆ kơ bơngai Chăm truh đơ̆ng plei Mỹ Nghiệp, jĭ tơmam tôch kơ gĭt kăl vă chĕp vei tơ̆ hơnăp kơnh”.

Năr joh ayŏ tơpă hlôi pơjing đei um ai joh ayŏ kơdŏ soang ‘lơ̆ng hơiă hăm ƀĕnh tơdrong chhôk ‘nă păng đon hơpơi ‘meh jang tŏk lơ̆m chăl ‘nao. Tơdrong hơiă sơng đei bơngai truh hăm Năr joh ayŏ ưh khan lăp hơdrô̆ dôm tơdrong joăt so kăp gĭt đơ̆ng sơ̆ đĕch mă oei đei đơ̆ng jơhngơ̆m đon ‘mêm băl, ngôi hơdai tôch kơ hơiă đơ̆ng kon pơlei tơ̆ jơ̆p tơring. Dơ̆ng ƀơ̆t tŏk bŏk Cham să ƀĕnh kơ hla kơ, ƀok Mô Ha Mad, truh đơ̆ng dêh char An Giang, chhôk hơiă tơroi:

“Tơdrong ‘lơ̆ng đơ̆ng tơring đei tơƀôh tơ̆ âu. Ĭnh jĭ bơngai Chăm Hồi giáo, oei tơ̆ âu ‘noh Chăm Bà Ni, Chăm H’Roi… Rim tơring đei tơdrong ‘lơ̆ng pha ra băl, kŭm đei tơdrong ‘lơ̆ng vă lei lăi băl mơ̆n, kiơ̆ đơ̆ng noh pơm hơtŏk tơdrong ‘mêm băl”

Năr joh ayŏ kơ bơngai Chăm đei pơgơ̆r tih lơ̆m teh đak, tơƀôh hơdăh tơdrong hơiă đei hơnơ̆ng lơ̆m dôm tơdrong joăt ‘lơ̆ng đơ̆ng hơdrĕch hơdrŭng lơ̆m chăl 'nao. Hăm dêh char Khánh Hòa, năr joh ayŏ tôch kăp gĭt. Đơ̆ng rŏng kơ tơmơ̆t hơdai, Khánh Hòa đei 1 anih jang tŏk ‘nao - tơring akŏm đei lơ anih gru groa so, đei kông tơ̆ đak dơsĭ ‘lơ̆ng rŏ kŭm hăm lơ tơdrong ‘lơ̆ng găh chă tơmang lăng, jang khoa hŏk kơmăy kơmŏk păng mŭk drăm tơ̆ đak dơsĭ. ‘Nâu jĭ dôm tơdrong pran ‘lơ̆ng vă tơring tơmơ̆t hơdai dôm tơdrong chĕp vei tơmam kăp gĭt đơ̆ng sơ̆ hơdai hăm jang tŏk pran kơjăp, đơ̆ng chĕp vei tơdrong joh ayŏ kơdŏ soang hăm tơplih ‘nao hơgei. Pơma hơdăh găh tơdrong gĭt kăl đơ̆ng vei kơjăp dôm tơdrong joăt so, ƀok Nguyễn Việt Hùng, Kơdră Anih vei lăng kon pơlei dêh char Khánh Hòa akhan:

“Nhôn lui ‘meh năm hrĕnh athei tơlĕch jên pơm trong, mă lei ‘meh năm hơtăih athei tơlĕch jên ăn tơdrong joh ayŏ kơdŏ soang, ăn kon bơngai. ‘Noh ưh khan lăp tơdrong rơih đơ̆ng Khánh Hoà đĕch mă oei jing hơnăp jang đơ̆ng dêh char Khánh Hòa hăm tơdrong jang tŏk pran kơjăp kơ teh đak, kơ hơdrĕch hơdrŭng. Rim jơhnơr lăp yak hơdai 1 jăl trong mă lei tơdrong joh ayŏ kơdŏ soang gô yak hơdai hăm hơdrĕch hơdrŭng ling lang truh ning mônh”.

Vă bơ̆jang đei tơdrong ‘noh, Khánh Hòa oei hơdrin jang hơdai hăm dôm Anih tơm, anih jang kơpal kơ Trung ương, dôm bơngai jang khoa hŏk păng tơpôl vă pơm hla ar ăn UNESCO chih tơbăt hơnăn tơmam kăp gĭt đơ̆ng tơdrong soi kơ yang plĕnh Y Ana kơ bơngai Chăm lơ̆m hơnăn dôm tơmam kăp gĭt dơ̆ng tang ăn kơ kon bơngai. Dang ei Khánh Hòa oei hue lăng truh tơdrong bơ̆jang vă gơh tŏk jing tơring chĕp vei, tơchĕng hơlen păng roi tơbăt tơdrong joh ayŏ kơdŏ soang Chăm tơ̆ tơring tơ ter đak dơsĭ Nam Trung Bộ păng Tây Nguyên.