Tơ̆ kueng kơphô̆ Pơlei Đưng 1, phương Lang Biang – Đà Lạt, ƀok Păng Ting Sin, bơngai K'Ho hơdrung Lạch, lơ sơnăm kơ ou adoi oei hăt hot hăm tơdrong pơtho chĭng chêng, hơri brông, hơsuang kră sơ̆. Jĭ Ƀĭ thư Chi ƀô̆, atŭm hăm noh jĭ kơdră khul chĭng chêng Pơlei Đưng hăm 15 'nu akŏm, ƀok hơnơ̆ng lăng tơdrong vei răk tơƀăk mong joh ayŏ jĭ sơnong jang kơ po hăm pơlei pơla:  “Mưh bơ̆n ưh đei vei lăng tơdrong juăt jue ou noh kơnh gô hiơt hiong đĭ tơdrong joh ayŏ. Hăm kon pơlei kon kông tơ̆ kông Lang Biang 'meh pơtho ăn kon sou băt gah chĭng chêng, hơri brông, hơsuang. Vei răk tơƀăk mong joh ayŏ kon kông tơ̆ tơring, noh athei pơtho ăn kôn mon kon sou”

Đơ̆ng dôm ngê̆ nhơ̆n 'lŏ sơnăm tơ̆ dôm thôn, pơlei kơ dêh char Lâm Đồng, đon băt kơ joh ayŏ juăt jue tŏk bŏk đei pơjao ăn kôn mon kon sou. Sơng iŏk păng pơdjoi đơ̆ng dôm ngê̆ nhơ̆n 'lŏ sơnăm, đe sơnăm mơlôh hrei ou adoi oei pơtoi tơdrong vei răk tơƀăk mong. 'Nhŏng Kră Jăn Jun Guy, bơngai K'Ho hơdrung Lạch tơ̆ kueng kơphô̆ Dang Ja, phương Lang Biang – Đà Lạt jĭ bơngai jang lơ̆m khul ngê̆ nhơ̆n đei 22 'nu. Hăm 'nhŏng, rim 'măng tôn pơdah chĭng chêng ưh hơdrô̆ tơroi gah joh ayŏ mă oei jing trong vă đe sơnăm  mơlôh pơ-ư pơ-ang gah tơm a la chă kơdih po. 'Nhŏng Kră Jăn Jun Guy tơroi:  “Dôm tơdrong mă yă ƀok pơsư̆ ăn nhen hơri brông, hlôm klel hlôm đing, adoi nhen hơsuang kră sơ̆... athei pơtoi đei vei răk tơƀăk mong ăn đe kôn mon kon sou. Bơ̆n ưh gơh lê̆ hiơt hiong dôm tơdrong 'lơ̆ng gah joh ayŏ ou kơ kon pơlei po kơdih”

Lơ̆m tơring bri kông Lang Biang, jơva chĭng chêng re ang rim 'măng pơlei pơla đei tơdrong et xa. Lơ̆m không tanh juăt jue, rim djoi brai adoi oei ding dônh pơjing đon băt kơ chăl bơngai. Yă Bon Jô Liên, Phŏ Kơdră Hơnih jang Măt trâ̆n Tôh kuô̆k Việt Nam, Kơdră Jơnŭm jang Đe Drăkăn phương Lang Biang – Đà Lạt sơkơ̆t hơdah: "Dôm bơngai đei kon pơlei lui yom tơ̆ phương Lang Biang – Đà Lạt noh kăp gĭt tơpă. Đe sư jĭ gơng tơroh đơ̆ng Đảng hăm kon pơlei gah dôm tơchơ̆t tơgŭm đơ̆ng Đảng, khôi luơ̆t teh đak, vă đơ̆ng 'noh gơh tơjê̆ hăm Đảng hloh, tơjê̆ hăm teh đak hloh. Hơdrol 'noh đe sư jĭ bơngai yuk trong hơlou, đơ̆ng rŏng kơ noh đe sư tơroi ăn unh hnam păng kon pơlei pơla băt, vă atŭm pơm kiơ̆ dôm tơchơ̆t tơlĕch đơ̆ng Đảng, tơchơ̆t khôi luơ̆t đơ̆ng teh đak gơh 'lơ̆ng hloh".

Tơ̆ xah Đơn Dương, tơring mă kon pơlei kon kông đei jê̆ 40% kơsô̆ măt bơngai, lơ pơlei pơla jang tơdrong jang kră so păng dôm kou lak ƀô̆ chĭng chêng adoi oei đei akŏm tơnăp gơnơm đei tơdrong jang jang đơ̆ng khŭl jang ou. Yă Lê Thị Hồng Nhung, Phŏ Kơdră hơnih jang Joh ayŏ - Tơpôl xah Đơn Dương ăn tơbăt: “Xah Đơn Dương đei minh ƀar pơlei jang tơdrong jang so nhen pơm tơkiĕn hu tơ̆ thôn Ha Wai, đang kơ noh tanh hơkă tơ̆ thôn Đa Hoa, đang kơ noh đei minh ƀar Kou lak ƀô̆ chĭng chêng. Dôm bơngai đei kon pơlei lui yom vang jang hơdai tơroi tơbăt tơchơ̆t jang đơ̆ng Đảng adoi nhen chă roi pơtho gah dôm tơdrong kăp gĭt kơ tơdrong jang juăt jue tơ̆ tơring. Đe sư jang atŭm hăm kơdră thôn, Ƀĭ thư Chi ƀô̆ adoi nhen rim hơnih jang tơ̆ tơring, jơnŭm tơpôl, rim khŭl lui, vang jang hơdoi hăm tơring lơ̆m tơdrong vei răk tơƀăk mong khôi juăt kră sơ̆”.

Đơ̆ng dôm không tanh tơ̆ Đạ Huoai, Cát Tiên truh jơva chĭng chêng re ang lơ̆m tơring bri kông Lang Biang, ăn ƀôh joh ayŏ tŏk bŏk đei pơdriu đơ̆ng kơdih tơpang ti kon pơlei. Mŭk drăm đei vei răk, pơdjoi păng tơguăt hăm hơtŏk tơmang pơhiơ̆ adoi jing trong vă tơplih tơdrong 'lơ̆ng joh ayŏ jing jơhngơ̆m pran vă hơtŏk tơ-iung mŭk drăm, pơjing Lâm Đồng hơtŏk tenh, kơjăp sơđơ̆ng.