Blŭng khei 7 âu ki, Pơlong byoh joăt joe dôm Hơnih byoh Bình Định tơgar Cúp Hoàng đế Quang Trung ‘măng mă VIII sơnăm 2026 kŭm hlôi đei pơgơ̆r, hăm tơdrong vang akŏm đơ̆ng hloh 700 ‘nu bơngai byoh truh đơ̆ng 75 hơnih byoh păng kâu lak ƀô̆ lơ̆m, ‘ngoăih dêh char. Ƀok Bùi Trung Hiếu, Phŏ Kơdră Anih vei lăng găh Joh ayŏ, Tơplŏng kơdâu păng Chă tơmang lăng dêh char Gia Lai chhôk ‘nă, byoh joăt joe Bình Định jing tơdrong joăt so đei tơiung đơ̆ng jơhnơr pơjing teh đak, vei teh đak kơ hơdrĕch hơdrŭng.

“‘Năr 31/3/2025, Thủ tướng Teh đak hlôi drơ̆ng ăn pơtruh hla ar hô sơ ăn UNESCO xet hơlen chih hơnăn Byoh joăt joe Bình Định lơ̆m hơnăn Tơdrong joh ayŏ kăp gĭt kơ kon bơngai. ‘Nâu jĭ tơƀôh tôch kơ hơiă hăm Byoh joăt joe Bình Định, ưh khan lăp jing tơdrong chhôk ‘nă hơnhăk tơdrong joăt so kơ teh đak yak kiơ̆ apŭng plĕnh teh mă oei tơgop hơtŏk ‘lơ̆ng đon hlôh vao, jang tơnăp đơ̆ng tơpôl lơ̆m tơdrong chĕp vei, tưk tơiung dôm kơjă kăp gĭt joh ayŏ kơ hơdrĕch hơdrŭng”.

Đơ̆ng ‘năr 26/7 truh 2/8 vă jê̆ truh, Pơlong Byoh joăt joe dôm kâu lak ƀô̆ apŭng plĕnh teh gô pơgơ̆r tơ̆ Quy Nhơn – Gia Lai, hăm dang 650 ‘nu bơngai pơlong pơjei băl tơ̆ dôm tơdrong chok, byoh. Hơdai hăm pơlong pơjei, Khŭl pơgơ̆r oei hơmet ăn rim khŭl apŭng plĕnh teh năm chă lăng Hơnih An Khê, hnam chua Long Phước păng kơthôt Bánh Ít vă lăng joh ayŏ, jơhnơr hơrih păng tơmam drăm so kơ tơring teh Gia Lai.

Đang kơ noh, đơ̆ng ‘năr 2 truh ‘năr 5/8, Pơlong Apŭng plĕnh teh  Byoh joăt joe Việt Nam ‘măng mă IX – Gia Lai 2026 gô pơgơ̆r tơ̆ phường Quy Nhơn păng 1,2 tơring tơ jê̆ hăm hơnăn “Byoh joăt joe Việt Nam – Tơdrong ‘lơ̆ng rŏ”. Tơdrong jang akŏm 16 khŭl apŭng plĕnh teh truh đơ̆ng 9 teh đak, kŭm hăm 43 khŭl lơ̆m teh đak păng 11 kâu lak ƀô̆ byoh tơring.

 Tơdrong hơiă đơ̆ng pơlong chok pơrŏ hơdai đơ̆ng hlŏh 1.000 ‘nu byoh, bơngai hŏk byoh hăm dôm ƀai chok thoi iĕr choh băl – tơdrong byoh đei ư hơnhang tơklep kơjăp hăm groi teh Tây Sơn, tơƀôh hơdăh jơhngâm đon bơngai byoh nuih mơng, tơpăt ‘lơ̆ng păng tơdrong joăt tôch hơiă đơ̆ng byoh joăt joe Bình Định. Tơdrong ‘nao lơ̆m ‘măng pơlong sơnăm ‘nâu ‘nŏh tơdrong vang pơrŏ pơtâp chok hơdai hăm lơ bơngai, vang tơgop hơmet pơ ‘lơ̆ng hla ar vă chih tơƀôh Tơdrong Byoh joăt joe Bình Định ăn UNESCO năng jĭ tơmam jŏh ayŏ kăp gĭt dơ̆ng tang ăn kon bơngai.

Kiơ̆ yă Nguyễn Thị Thanh Lịch, Phŏ Kơdră vei lăng kon pơlei dêh char Gia Lai, tơring oei dar deh atŏk tơiung trong jang mŭk drăm hăm tơdrong juăt ‘lơ̆ng đơ̆ng sơ̆, lơ̆m noh đei hloi byoh joăt joe, đei năng jĭ 1 lơ̆m dôm kơjă kăp gĭt vă atŏk tơiung chă tơmang lăng, jŏh ayŏ kơ dŏ xoang păng hơtŏk tơdrong pơvei hăm apŭng plenh teh. Hlŏh đơ̆ng rim ‘măng pơlong, dôm khul hŏk chok lơ̆m păng ‘ngoăih kơ teh đak đei dơ̆ng tơdrong ‘lơ̆ng vă tơƀâp, hŏk pơhrăm, yak hlŏh rim tơdrong găn trong găh nơ̆r pơma mưh bơngai hŏk byoh, kiơ̆ đơ̆ng noh hơmet kơjăp tơdrong pơvei păng tơiung jơhngơ̆m đon tơpăt ‘lơ̆ng đơ̆ng bơngai hŏk byoh Việt Nam.

“Đon pơhnŏng đơ̆ng nhôn kiơ̆ đơ̆ng ‘măng pơlong ‘nŏh, dôm khul byoh lơ̆m teh đak đei pơma nuh hăm băl, mă loi hăm khul truh đơ̆ng apŭng plenh teh, atŭm hăm ‘nŏh roi tơƀôh tơdrong juăt ‘lơ̆ng đơ̆ng byoh dêh char. Rŏ năng kŭm đei tơdrong găn trong găh tơdrong joăt, găh nơ̆r pơma mă lei kiơ̆ đơ̆ng pơtâp pơhrăm pơlong găh bơngai byoh gô pơm hơtŏk tơdrong pơvei băl. Păng lơ sơnăm âu ki, byoh joăt joe tơ̆ dêh char iŏk đei tơdrong tơrek đơ̆ng lơ khul hŏk byoh tih lơ̆m apŭng plenh teh. Kiơ̆ đơ̆ng 9 'măng pơgơ̆r, hlôi pơjing đei jơhngâm đon hơiă, tơdrong tơtăm đơ̆ng lơ tơmoi lơ̆m apŭng plenh teh”.

Đơ̆ng dôm ‘măng pơlong chok tôch hơiă truh ‘măng pơlong pơrŏ hơdai đơ̆ng rơbâu ‘nu bơngai hŏk byoh, đơ̆ng dôm ‘măng tơƀâp pơma nuh truh đon hơpơi ‘mĕh hơnhăk tơmam jŏh ayŏ so kăp gĭt kơ Việt Nam truh hăm apŭng plenh teh, dôm tơdrong pơgơ̆r pơlong byoh joăt joe tơ̆ Gia Lai oei pơjing jơhngơ̆m pran ăn 1 tơmam kăp gĭt ưh lăp vă chĕp vei lơ̆m dôm ƀai hŏk chok đĕch, mă oei hơnơ̆ng chă trong chĕp vei, tưk tơiung kiơ̆ đơ̆ng jơhngơ̆m đon ‘mêm, hưch hanh păng hơnăp jang tơnăp đơ̆ng lơ jơhnơr hrei ‘nâu dơ̆ng.