Vă tơtom roi tơƀôh lơ̆m năr Festival Đak dơsĭ, Anih vei lăng găh Joh ayŏ, Tơplŏng kơdâu păng Chă tơmang lăng dêh char Khánh Hòa jang hơdai hăm Hla ar tơroi păng Pơre nơ̆r, Pơdăh tivi Khánh Hòa kŭm hăm dôm bơngai joăt jang, hlôi bơ̆jang hơdrin vă chih tơmơ̆t lơ̆m kơmăy kơsô̆ hloh 20 hơnăn hơnih chă lăng ‘lơ̆ng, hơnih gru groa păng hơnih chă tơmang lăng ‘lơ̆ng nhen Kơthôt Yă Pô Nagar, Kơthôt Trầm Hương, Hòn Chồng, Hơnih chă lăng bơ̆n ka, tơmam lơ̆m đak, Hnam Joh hơri Đó, hơnih đak dơsĭ Nha Trang… Hla ar chih răk đei pơih 3D, kuay phim flycam, phĭn rup 360 độ păng hơmet pơ ‘lơ̆ng hloi tơ̆ hơnih vă vei sơđơ̆ng tơdrong trŏ ƀlep mưh tơmơ̆t lơ̆m kơmăy kơsô̆.

Ƀok Nguyễn Xuân Duy, Phŏ Kơdră vei lăng Hla ar tơroi păng Pơre nơ̆r, Pơdăh tơvi Khánh Hòa tơbăt, tơdrong jang hơdai đơ̆ng hla ar tơroi păng kơmăy kơmŏk gô pơm đei trong roi tơƀôh ‘nao, tơgŭm tơmoi gơh băt păng chă lăng hơnih truh hloi đơ̆ng hơdrol kơ vă năm:

“Tơdrong pran găh hla ar kơtơ̆ng ang ‘noh nhôn ưh khan lăp bơ̆jang kiơ̆ hơnăp jang tơroi tơbăt oei vang yak hơdai lơ̆m kơplăh chih tơmơ̆t lơ̆m kơmăy kơsô̆ dôm hơnih truh hăm trong tơmơ̆t hơdai um rup, kơmăy kơmŏk păng hla ar chih răk. Lơ̆m rim tơdrong tơroi, nhôn tơgŭm tơmoi ƀônh kơ gơh băt, chă lăng dôm hơnih truh. Kơmăy kơmŏk kơsô̆ ‘noh jĭ tơmam pơyua, oei hla ar kơtơ̆ng ang ‘noh jĭ bơngai tơroi tơdrong mưh 2 tơdrong ‘nâu hơdai băl ‘lơ̆ng, rim hơnih truh ưh khan lăp đei roi tơƀôh đĕch mă oei đei tơrroi tơdrong hơiă, pơm tơdrong păr ang pran kơtang”.

Kơmăy kơsô̆ găh chă tơmang lăng Khánh Hòa ưh khan lăp roi tơƀôh um rup dôm hơnih truh mă oei tơmơ̆t hơdai tour chă năm lăng 3D, hlak kak kơsô̆, hơnih băt, tơplih jên teh đak đe, răt pơkă tour trực tuyến, roi tơƀôh ăn tơmoi hơnih ƀĭch pơdơh, hơnih sŏng sa, gre yak vih vơ̆t, dôm tơdrong jang Festival Đak dơsĭ kŭm hăm lơ tơdrong đei yua nhen hơnih pơdơ̆ng gre, dŏng tơgŭm, jang pơgang, hơnih chă pơyơ̆ng.... Kiơ̆ đơ̆ng noh, tơmoi gơh kơchăng tơchă hơlen tơdrong kơtơ̆ng ang, pơjing trong jang păng tơgoăt hơdai kơtă hăm dôm tơdrong pơvih pơvăn chă tơmang lăng hloi lơ̆m kơmăy chĕp ti. ‘Nâu đei lăng jing hơyak tơplih đơ̆ng roi tơƀôh joăt joe jing pơjing hơnih chă tơmang lăng hơgei, iŏk lăng vă kơbăt đơ̆ng tơmoi pơm tơm. Mŏ Bùi Thị Ngọc Trâm, xăh Khánh Vĩnh, dêh char Khánh Hòa hơmĕng:

“Hơdrol ki ‘noh ĭnh kŭm lăng tơ̆ dôm kơmăy kơsô̆ joh ayŏ kơdŏ soang Chăm păng lăng ‘noh jĭ hơiă tơpă yua kơ um rup ‘lơ̆ng, roi tơbăt rơđăh păng ƀônh kơ pơih lăng dơ̆ng. Kơmăy kơsô̆ ‘nao kŭm thoi noh, lăp kăl kơ 1 trong link ‘noh gơh chă lăng pơđĭ Khánh Hòa tơmơ̆t iĕ tôch kơ hiôk vă roi tơƀôh ăn kơbôl buăl tơ̆ hơtăih”.

Kiơ̆ kơ yă Hoàng Thị Bích Hạnh, Hơnih tơgŭm tơplih kơsô̆ hla ar kơtơ̆ng ang, Anih jang Hla ar kơtơ̆ng ang (Anih tơm vei lăng găh Joh ayŏ, Tơplŏng kơdâu păng Chă tơmang lăng), dôm bơngai joăt jang hlôi akŏm hơmet pơ ‘lơ̆ng, hơlen lăng hla ar chih răk vă vei sơđơ̆ng kơmăy kơsô̆ găh chă tơmang lăng Khánh Hòa bơ̆jang trŏ tơdrong.

“Hrei ‘nâu đei hloh 20 hơnih ‘lơ̆ng hơiă mă Khánh Hòa đĭ rơih iŏk vă tơmơ̆t lơ̆m kơmăy chă tơmang lăng kơsô̆. Pơđĭ khŭl akŏm tôch bơneh ăn tơdrong tơblang hơdăh, hơmet pơ ‘lơ̆ng dôm hla ar chih răk, dăr hơlen, hơlen lăng dôm tơdrong vă tăh tơmơ̆t lơ̆m kơmăy chă tơmang lăng kơsô̆”.

Roi tơƀôh trŏ lơ̆m năr Festival Đak dơsĭ Khánh Hòa 2026, Kơmăy chă tơmang lăng kơsô̆ - Kơsơ̆p hla ar kơmăy kơsô̆ chă tơmang lăng Khánh Hòa ưh khan lăp pơyua ăn tơmoi tơmang lăng lơ̆m pơyan lêh mă oei pơm tơdrong ‘lơ̆ng chih răk yua hơdai ăn anih jang tơmang lăng, tơgop pơjing Khánh Hòa jing hơnih truh hơgei, ‘nao păng ƀĕnh jơnghơ̆m pơjei.