Năr 30/8, xah Vân Hoà, dêh char Đăk lăk, pơgơ̆r sơng hơnăn tơm 'long Mŭk drăm kăp gĭt Việt Nam hăm 1 tơm 'long Cộng (đe oei krao 'long Sui) păng 3 tơm 'long Đỏ (oei krao noh Dâu kơđoh brê), 'nao đei Jơnŭm jang vei lăng Cham char Plenh teh Việt Nam pơkăp. 3 tơm 'long Đỏ đunh hloh 200 sơnăm kơ ou păng tơm 'long Cộng đunh hloh 350 sơnăm bơih. Tơm 'long Đỏ hlôi asong ăn kon pơlei kơhrĕng pơyan plei 'ngam, oei tơm 'long Cộng hlôi asong kơtăk vă pơm pơgang tong lơ̆m 'mrơ̆m hră đơ̆ng khei năr blŭng yă ƀok muih choh teh, chă lua hơnguang, tơjră ayăt tơgar.  

Đơ̆ng đunh sơ̆, dôm tơnơm 'long Kăp gĭt ou hlôi bơ̆ng pang kơ jơhnơr hơrih, jing tơdrong joh ayŏ, jing tơdrong oei xa 'lơ̆ng kơ tơring teh păng jing tơdrong pơ-ư pơ-ang kơ kon pơlei tơ̆ tơring. 'Nhŏng Lê Quốc Nam, oei tơ̆ xah Vân Hoà, dêh char Đăk Lăk chơt hơ-iă tơroi: "Tơm 'long Cộng ou hlôi găn ga lơ sơnăm yăm khei năr, găn ga lơ 'mi kial phŭt huơ̆r, mă lei hăp oei chăt 'lơ̆ng kơjăp tơ̆ noh. 'Noh tơm 'long Cộng ou hăm kon pơlei adoi jing hơnih akŏm tih tên gah jơhngơ̆m đon. Păng hăm kŭm nhen đon bơnôh kon bơngai tơ̆ tơring ou"

Atŭm hăm tơdrong sơng hơnăn tơm 'long Mŭk drăm kăp gĭt, xah Vân Hòa pơtơm pơdah dơ̆ng 'măng akŏm Chợ Đồn tơ̆ hơla Dơnơm 'long Cộng. 'Nou jing 'măng akŏm kơchơ hlôi đei đơ̆ng kơhrĕng sơnăm kơ ou ah jăl trong mŭk drăm pơtoi đơ̆ng tơring đak dơsĭ tŏk truh tơring kông. Atŭm hăm noh pơtơm dôm tơdrong jang tơbang, tơroi hăm hơnih jang mŭk drăm asong jang păng hơp tak xah tơ̆ tơring teh Vân Hòa; pơtơm dôm tơdrong jang tơmang pơhiơ̆ cham char plenh teh tơguăt hăm chă tơmang lăng dôm pơgar 'long Đỏ - hơdrĕch 'long kăp gĭt kơ tơring teh ou.

Ƀok Phạm Quốc Hoàng, Kơ iĕng Kơdră chĕp pơgơ̆r Hơnih vei lăng kon pơlei tơring Vân Hòa tơbăt, băt hơdăh găh tơdrong kăp gĭt kơ ‘long Gĭt kăl dăr sơnăm, khul kơdră tơring atŭm hăm kon pơlei lăng kơjăp truh tơdrong vei lăng năng tông ‘lơ̆ng dôm dơnơm ‘long hơrih sot ou:  "Nhôn tŏk bŏk vă dăr lăng hơlen dôm dơnơm ‘long ou păng gô hơvơn khul joăt jang găh tơdrong bơ̆ jang bri ‘long năm tơ̆ ou vă pơgơ̆r pơtho, tơgŭm djru kih thuơ̆t vei lăng năng tông ‘long Đỏ păng ‘long Cộng ou vă hăp bluh vơ̆ jing ‘lơ̆ng hloh păng kon pơlei gơh iŏk yoa jang tơmang pơhiơ̆ ‘lơ̆ng hơ iă hloh."

Hrei ou tơ̆ găh Hơlĕch dêh char Đắk Lắk đei 25 dơnơm ‘long Gĭt kăl dăr sơnăm đei drơ̆ng nơ̆r. ‘Ngoaih ‘long Cộng păng 3 dơnơm ‘long Đỏ ‘noh, oei đei 20 dơnơm ‘long pơ ŏ tih tơ̆ Hơnih Gru gra git kăl dăr sơnăm Teh đak hnam chùa Từ Quang, tơring Tuy An Bắc păng 1 dơnơm ‘long Bồ Đề sot hloh 200 sơnăm tơ̆ Hơnih gru gra gĭt kăl dăr sơnăm Teh đak Hơnih soi tơbeh Danh nhân Lương Văn Chánh.

Ƀok Nguyễn Thành Sơn, Kơ iĕng kơdră chĕp pơgơ̆r Hơnih bơ jang vei lăng Joh ayŏ kơdŏ soang-Tơpôl, tơring Phú Hoà 2, dêh char Đắk Lắk tơbăt, rim ŭnh hnam, kon pơlei đei dơnơm ‘long Tih hơrih sot jei iung jang kơtang, vang vei lăng năng tông tơdrong git kăl kơ “ ‘long hơrih sot” ou:  "Rim sơnăm nhôn vang pơrô pơrôp ŭnh hnam, kơtum kơtŏng ‘nhŏng oh đơ̆ng noh kon pơlei, mă kăl hơdrol kơ pơyan ‘mi ‘noh nhôn kăt sơleh sơdrai pơ ‘lơ̆ng, vă kơ dơnơm ‘long hoei chă păk tơgơ̆ lơ̆m pơyan ‘mi kial hơbut hơbông."

Kơhrĕng sơnăm hlôi yak hloh, dôm dơnơm ‘long tih sot-Dơnơm ‘long Gĭt kăl oei tơƀlơ̆k tih vơ̆ djơ̆ ‘lơ̆ng nhen tơm kơ mĭnh tơring, mơ̆t lơ̆m jơhngơ̆m đon rim bơnbgai. Tơdrong vei lăng năng tông ‘Long git kăl dăr sơnăm Việt Nam ưh khan lăp tơdrong kăp gĭt găh cham char, mă oei tơdrong lăng ba ‘lơ̆ng hơ iă kơ chăl sơnăm, hôn bơnê kơ đe kră hlôi tơ iung pơjing hơnih oei sa, vei lăng năng tông truh hrei ou păng ning nai kai ning mônh.