Hơdrol kơ pơgơ̆r et soi, atŭm hăm tơmam soi plang, unh hnam pơgơ̆r et soi hơvơn tôm bơngai đơ̆ng iĕ khĕ kră drŏnglo drăkăn lơ̆m pơlei truh vă atŭm băl tơgŭm unh hnam jơmŭl ƀa. Unh hnam jơmŭl ƀa hơmet tôm găr hơdrĕch nhen: ƀa, hơƀo, găr tơyăn, găr pro, găr hơmrĕ. Gah tơmam soi plang, kiơ̆ kơ tơdrong kĕ đei kơ rim unh hnam mă gơh chă ƀuh nhŭng dah mă iĕr păng ge tơdrô. Bơngai lơ̆m pơlei truh tơgŭm noh 'nhăk ba đing chơnoi (đing jơjŭk) vă jơmŭl choi ƀa.

Yă Amĭ Nư tơ̆ xah Ea Wer, dêh char Đăk Lăk ăn tơbăt, et soi jơmŭl ƀa mir jing minh tơdrong kăp gĭt lơ̆m tơdrong hơrih joh ayŏ kơ bơngai M'nông, tơƀôh tơdrong tơguăt tơguăl đơ̆ng kon pơlei pơla: “Đŏng rŏng kơ muih choh soh mir đang noh unh hnam hơmet jơmŭl ƀa. Hơdrol hloh noh athei hơmet ƀa hơdrĕch 'lơ̆ng, đang kơ noh tơroi hăm rim bơngai truh tơgŭm jơmŭl ƀa. Đơ̆ng rŏng kơ et soi đang noh đe drŏnglo pơtơm jơmŭl, đe drăkăn choi ƀa. Đơ̆ng rŏng minh năr jơmŭl ƀa tơ̆ mir noh unh hnam adoi pai por 'nhot hơvơn rim bơngai atŭm et xa. Unh hnam yơ adoi thoi ăi ngăl, lăng thoi lĕ jang hơpong pơlĭ dih băl, Đơ̆ng rŏng kơ ƀa đum noh đe adoi pơm jang thoi ou mơ̆n”.

Pơgê hrôih, tơm hnam rơih minh cham teh ah anih kơjung hloh lơ̆m mir, choh hơmet rơgoh vă pơm chra iĕ 'măn tơmam soi. Tơjê̆ hăm hơkă 'măn ƀenh kơ găr hơdrĕch, 'noh ge tơdrô hlôi tuh ƀenh đak, minh pôm iĕr hlôi đei ƀuh 'lơ̆ng, minh gŏ por tơyông, atŭm hăm 'nhik, văng, 'long jơmŭl, đing chơnoi. Tơ-'ngla hnam pơtơm kiơ̆ khôi sơkat kơ yang. Nơ̆r sơkat tơroi ăn kơ yang bri kông, yang mir, apinh yang asong ăn 'mi kial sơđơ̆ng, vă ƀa giơ̆ng 'lơ̆ng, ưh đei ƀơm kon bri brah chă pơrăm, vă pơyan jang xa đei yua lơ. Soi kơ yang đang, tơ-'ngla hnam pơtơm tuh găr hơdrĕch lơ̆m đing, jơmŭl choi ƀa. Pơtoi kơ noh kon pơlei truh tơgŭm ah 'năr noh gô jơmŭl ƀa kiơ̆ đơ̆ng rŏng. Yă Amĭ Ly tơ̆ xah Ea Wer, dêh char Đăk Lăk ăn tơbăt, khôi juăt ou kơ bơngai M’nông đei đơ̆ng đunh bơih: "Sơ̆ ki kon pơlei gơnơm lơ̆m tŏ 'mi kial đĕch, ưh đei săi tuh phŏng noh đơ̆ng rŏng kơ muih roh choh klăng đang mir noh đe pơtơm jơmŭl ƀa dang đơ̆ng rŏng kơ 2 truh 3 sơnăm, đơ̆ng rŏng kơ teh sap noh đe tơplih anih teh nai dơ̆ng vă jơmŭl ƀa lơ̆m 3 sơnăm noh vih hơlơ̆k tơ̆ mir so, đe ưh đei phă iŏk teh bri vă jang mir ôh. Dang ei teh mir noh pơtăm tơh, hơƀo păng kơtao, oei ƀa noh đe jang ƀa na đĕch, kon pơlei hơtŏk tơ-iung bơih, pơm kiơ̆ tơchơ̆t tơlĕch đơ̆ng teh đak ưh đei phă bri, mă khôi soi jơmŭl ƀa hơdrol kơ pơtơm jang đe adoi oei pơm kiơ̆ trŏ khoi juăt sơ̆ ki”.

Pơtôch minh năr jang hrat tơ̆ mir, tơ-'ngla hnam păng rim bơngai atŭm băl et xa păng akŏm pơchơt sô̆, hơri hơsuang, tơƀôh hơdah tơdrong tơguăt tơguăl tơgŭm dih băl. Hrei ou, rim sơnăm tơ̆ dôm pơlei kơ bơngai M’Nông adoi oei pơm kiơ̆ khôi juăt ou ah blŭng pơyan choh jang, vă akŏm đon bơnôh hmach bơnê hăm yang hơpang hlôi asong ăn đe sư minh pơyan jang xa đei yua lơ.