Lơ 'măng pơm tơm pơgơ̆r et soi tơmŏm mĕ kon, ƀok Aê Sên tơ̆ pơlei Tơng Jú, phương Ea Kao, dêh char Đăk Lăk ăn tơbăt: Et soi tơmŏm pơm mĕ kon kơ bơngai  Êđê jing khôi juăt kăp gĭt, vă pơtho pơhrăm kon pơlei pơla, ah mă 2 'nu bơngai ưh kơ juăt tơmŏm jing mĕ kon pôm hnam. Khôi et soi tơmŏm athei hơmet mă tơnăp păng đei pơgơ̆r kăp gĭt hloh: "Tơmŏm pơm ƀă kon, mĕ kon kơ bơngai Êđê hơdrol hloh noh, 'nguaih kơ tơdrong đei măt đơ̆ng kơtum kơtŏng 2 pah noh athei đei bơngai hlôh vao kơjăp gah khôi juăt kră sơ̆, vă tơblang hơdah hloh gah tơdrong pơkăp đơ̆ng khôi juăt adoi nhen sơnong jang kơ rim pah đơ̆ng rŏng kơ et soi tơmŏm pơm mĕ kon, thoi noh gơh tơgŭm ăn pơđĭ 2 pah gơh tơguăt đunh đai hăm dih băl”.

Hrei ou, khôi tơmŏm kơ bơngai Êđê adoi oei đei pơgơ̆r. Et soi tơmŏm ưh đei pơgơ̆r tih, đei minh pôm nhŭng iĕ, iĕr tơmông, minh tơm tơdrô păng 2 tŏ kong ƀot ti vă pơm tơmam tơƀlŏk ăn 2 pah. Mưh bơngai đei tơmŏm mă đei tơdrong hơrih tơnap tap, mă oei tơguăt dih băl hăm đon bơnôh 'mêm băt noh adoi gơh pơgơ̆r et soi tơmŏm, hơdrô̆ đei tôm tơdrô vă hơvơn 'nhŏng oh 2 pah păng bơngai bơ̆ng pang truh đĕch, ưh kăl pơgơ̆r et xa tih ôh.  

Ah mă Aê Sên tang măt ăn kơtum kơtŏng tơchơ̆t: “Et soi tơmŏm pơm mĕ kon hlôi đei pơtơm hăm tơdrong bơ̆ng pang kơ unh hnam 2 pah”, bơngai kon đei tơmŏm dang dơ̆ng iŏk pơnhan tơdrô đơ̆ng bơngai tang măt vă hơvơn bơngai drăkăn mă kơdih po krao mĕ “mĕ mŏm”, vă tơbang đon bơnôh kŭp yom. Pơtoi đơ̆ng rŏng noh, bơngai kon ou năm hơvơn et tơdrô hăm rim bơngai lơ̆m kơtum kơtŏng.  

Kiơ̆ khôi bơngai Êđê, bơngai đei tơmŏm pơm kon gô đei akŏm đon 'mêm kơ-eng păng mŭk drăm mơ̆n. Atŭm hăm noh, bơngai kon đei tơmŏm duh athei đei sơnong rong 'me mĕ ƀă mŏm, dah mă 'nhŏng pơmai oh mŏm kơ po. Hơlơ̆k kơ noh, bơngai kon mŏm duh athei băt chă kŭp yom, vei rong mĕ. Yă Amĭ H’ước, oei tơ̆ pơlei Tơng Jŭ, phương Ea Kao, dêh char Đăk Lăk ăn tơbăt: "Ah mă inh đei iŏk pơm kon rong noh inh lăng mĕ ƀă rong adoi nhen mĕ ƀă kơtơh inh. Rim tơdrong sô̆ hĕl sơ-'ngon lơ̆m tơdrong hơrih adoi glơng dih băl. Mĕ ƀă jĭ pơlŏ noh kon hơ-ioh athei năm lăng vei rong, lơ̆m unh hnam đei tơdrong kiơ duh atŭm băl vang glơng păng pơm jang nhen băl. Kơyuơ noh, ah mă 2 pah et soi tơmŏm mĕ kon adoi đei tang măt đơ̆ng kơtum kơtŏng 2 pah, adoi đei bơngai kơtă tơlĕch pơkăp ăn kơ 2 pah gơh truh hăm dih băl, noh jing tơdrong kăp gĭt”.

Kiơ̆ khôi kră sơ̆ kơ bơngai Êđê, bơngai đei iŏk pơm "kon mŏm" noh gô jing bơngai minh pham, nhen mĕ kon kơtơh, lôch hơrih athei đei măt, jơnap tơnap adoi vang glơng, 'mêm kơ-eng, tơgŭm dih băl ah ƀơm tơnap tap. Vă vei sơđơ̆ng tơdrong mă ou, athei đei sơnong kơ bơngai “pơgơ̆r et tơmŏm”. Ƀok Aê Sên tơ̆ phương Ea Kao, dêh char Đăk Lăk ăn tơbăt: “Mưh đơ̆ng rŏng kơ et soi tơmŏm mă minh lơ̆m 2 pah pă đei 'meh tơguăt băl bơih, adoi nhen 'meh "yuih lê̆” pơkăp mĕ kon noh gah yơ pơm yoch gah noh athei hrŭ pơkra ăn gah to. Kơplah ou bơngai pơgơ̆r et tơmŏm athei tơblang hơdah vă rim pah băt hơdah gah dôm tơdrong “phak”, 'nguaih kơ dôm tơdrong pơkăp kơ 2 pah noh mưh gah yơ pơm glăi noh athei ƀuh minh pôm nhŭng vă et pơkra ăn dôm bơngai bơ̆ng pang, mă kăl noh ăn bơngai pơgơ̆r et soi tơmŏm nhen nhôn ou”.

Khôi et soi tơmŏm pơm mĕ kon kơ bơngai Êđê jing djoi tơlei tơguăt pơlei pơla, kơhret đon bơnôh đơ̆ng bơngai ưh kơ juăt jing 'nhŏng oh klak klơm minh hnam. Lơ̆m tơdrong hơrih 'nao hrei ou, mă et soi tơmŏm ƀônh ƀŏ dang yơ, mă lei hăp oei kăp gĭt gah grasia đon bơnôh, sơnong kơdih păng tơdrong pơkăp adoi oei vei răk, iŏk yua păng jing minh khôi juăt joh ayŏ 'lơ̆ng rŏ kăl đei vei răk tơƀăk mong kăp gĭt.