Ƀok Liêng Hót Ha Chong (bơngai K’Ho) sơnăm ou hloh 95 sơnăm, oei tơ̆  thôn Đạ Kao 2, xah Đam Rông 4, dêh char Lâm Đồng tơroi, yă ƀok dơnơm kơ ƀok sơ̆ hlôi đơ̆ng dêh char Đăk Lăk truh oei tơ̆ Lâm Đồng tơchă teh pơjing pơlei pơla đơ̆ng hloh minh anglŏ sơnăm hơdrol ki.

Tơdrong lŭk lơ̆k gah joh ayŏ đunh đai tơgŭm ăn kon pơlei tơ̆ ou gơh pơma pơđĭ 3 nơ̆r pơma: Êđê, K’Ho păng M’Nông. Pơm kiơ̆ tơchơ̆t jang đơ̆ng Đảng păng Teh đak, bơngai K'Ho Cil pă đei oei ƀơ̆t ou kơdou ƀơ̆t to bơih. Rim unh hnam, kơtum kơtŏng chă rơih tơring teh vă pơm hnam, pơjing hơnih oei jang xa. Ah mă chă đei hơnih teh lăp kơ măt vă pơm hnam, tơ-'ngla hnam gô sơkat apinh:   “Ơ Yang Teh, Yang 'Mi, Yang Kial, Yang đak bơ̆ng pang păng asong ăn teh 'lơ̆ng ou dôm găr ƀa hơƀo, apinh asong ăn tơring teh ou tơdrong sơđơ̆ng sơnêp sơnua, ưh đei lê̆ unh hnam pơlei pơla jĭ jăn, apinh asong ăn jơhngơ̆m jăn grăng pran ăn unh hnam, ăn kon pơlei pơla…”.

Hơdrol kơ pơtơm pơm hnam, tơ-'ngla hnam hơmŏ tơmam drăm soi plang đei iĕr păng minh tơm tơdrô vă soi apinh Yang Teh. Kon pơlei tơ̆ pơlei Krong K’Ang tơ̆ thôn Đà Nhinh 1, xah Đam Rông 4 ăn tơbăt, tơdrong hơrih đon lui kơ bơngai K’Ho hơnơ̆ng đei yang hơpang pring vei, pơm hnam jĭ tơdrong jang kăp gĭt 'noh athei apinh yang hơpang:  “Apinh Yang kông, Yang bri, Yang teh, Yang kơ pơlei pơla bơ̆ng pang asong tơ-'ngla hnam 'năr ou gơh chă pơm hnam... 'Nou jĭ nơ̆r apinh lơ̆m khôi et tŏk hnam 'nao mă yă ƀok nhôn pơsư̆ ăn, ưh gơh hiơt ôh păng kon sou athei vei răk tơƀăk mong khôi juăt 'lơ̆ng rŏ ou”.

Đơ̆ng rŏng kơ hnam đei pơm keh đang, tơ-'ngla hnam pơgơ̆r et soi tŏk hnam 'nao lơ̆m kơdih unh hnam po. Tơmam soi plang athei kiơ̆ khôi juăt kră sơ̆ noh đei kŏ păng bip. Pham kơ ƀar kon tơrong ou đei tơprah tăp dăr hnam hăm tơdrong lui 'noh tơpuh lê̆ đĭ tơdrong ưh kơ 'lơ̆ng, apinh yă ƀok dơnơm păng dôm bơngai lôch hiong pring vei ăn hơnih teh 'nao gơh sơđơ̆ng 'lơ̆ng.  

Ah soi tơbeh đang, hnam 'nao pơtơm sơng đei tơdra rơ-ông rơ-ang mă blŭng. Tơ-'ngla hnam pơtơm tôn chĭng chêng sô̆ chơt vă tơroi ăn tôm pơlei băt truh. Kơtơ̆ng tơdra chĭng chêng ang, kon pơlei bu bu adoi năm truh vang sô̆ chơt. Et tŏk hnam 'nao kră sơ̆ kơ bơngai K'Ho Cil akŏm đon bơnôh kăp gĭt kơ pơlei pơla. Kiơ̆ tơdrong kĕ đei mă unh hnam chă ƀuh bơ̆n kơpô, rơmo, nhŭng; mưh ưh noh ƀuh iĕr đĕch kŭm gơh mơ̆n. Hơnih 'lơ̆ng kơ năr sô̆ ưh kơsĭ tơdrong et xa, mă tơdrong tơguăt tơguăl: đơ̆ng iĕ khĕ kră, hơdruh tơdăm atŭm băl krôp ti hơsuang sô̆ 'lơ̆ng. Hơdơ̆r kơ tơdrong 'lơ̆ng ou, yă Rơ Yam K’Jang tơ̆ thôn Dà Nhinh 1, xah Đam Rông 4 tơroi:  “Lơ̆m dôm tơdrong et xa thoi ou nhen et xa ƀa 'nao, 'noh nhôn hơri tòng, hơri pơ̆t vă atŭm sô̆ chơt hăm unh hnam, hnam yơ kĕ đei ƀiơ̆ noh ƀuh kơpô, rơmo,,, ƀơ̆t doh đe kră, đe sơnăm mơlôh, hơdruh tơdăm atŭm băl et xa păng hơri hơsuang... 'noh jing tơdrong 'lơ̆ng mă yă ƀok nhôn pơsư̆ ăn, ưh gơh hŭt lê̆ ôh, athei vei răk tơƀăk mong”.

Khôi pơm hnam 'nao păng et soi tŏk hnam 'nao kơ bơngai K’Ho Cil tơ̆ dêh char Lâm Đồng ưh hơdrô̆ jĭ tơdrong jang chă hơnih oei xa sơđơ̆ng, mă oei tơbang hơdah tơdrong tơguăt tơguăl tơpôl kon pơlei păng tơdrong kŭp yom hăm plenh teh, yă ƀok dơnơm. 'Noh jing tơdrong tơm kơ joh ayŏ, jĭ tơdrong 'lơ̆ng kơ đon lui păng đon bơnôh 'nhŏng oh kueng ƀôt kơjăp 'lơ̆ng tơgŭm ăn joh ayŏ bơngai K’Ho Cil gơh oei kơjăp ling lang kiơ̆ khei năr.