Gia Lai: Hlŏh 3.000 ‘nu bơngai vang akŏm lơ̆m năr kơdâu Olympic yoa jơhngâm pran kơ đĭ đăng kon pơlei, yoa tơdrong sơđơ̆ng teh đak
Thứ hai, 15:02, 23/03/2026
VOV Tây Nguyên/Dơ̆ng tơblơ̆
VOV Tây Nguyên/Dơ̆ng tơblơ̆
VOV.Bahnar – Pơgê 22/3, tơ̆ Cham xă Nguyễn Tất Thành (phường Quy Nhơn), Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng jang hơdoi hăm Công an dêh char Gia Lai pơm lêh tơlĕch Năr kơdâu Olympic yoa jơhngâm pran kon pơlei, yoa tơdrong sơđơ̆ng teh đak sơnăm 2026.
Pơma tơ̆ jơ pơm lêh, Đại tá Ngô Cự Vinh, Phŏ kơdră chĕp kơ̆l Công an dêh char Gia Lai pơma hơdăh, năr kơdâu âu ưh lăp tơdrong tơplŏng kơdâu đĕch mă oei hơnhăk ba tơdrong chinh trĭ tôch gĭt kăl, vang tơgop pơm hơtŏk đon hlôh vao, pơjing trong arih xa ‘lơ̆ng hơiă, yoa mĭnh teh đak Việt Nam jang tŏk pran kơjăp.
Đơ̆ng rŏng kơ lêh, đei pơgơ̆r hloi Năr kơdâu Olympic yoa jơhngâm pran kon pơlei sơnăm 2026, hăm tơdrong vang akŏm đơ̆ng vă jê̆ 3.000 ‘nu bơngai. Kiơ̆ kơ ‘nŏh, rok trong kơdâu đơ̆ng Cham xă Nguyễn Tất Thành, kơdâu kiơ̆ trong năm ƀât anih kơvŏng dăr Nguyễn Tất Thành - Trường Chinh, đơ̆ng rŏng kơ ‘nŏh vih dơ̆ng tơ̆ Cham xă Nguyễn Tất Thành, akŏm đĭ đăng trong kơjung dang 2 km.
Viết bình luận