Kơmăng hei 28/7, tơ̆ phường Quy Nhơn, dêh char Gia Lai, Anih vei lăng jŏh ayŏ kơ dŏ xoang, Tơplŏng kơdâu păng chă tơmang lăng dêh char Gia Lai jang hơdoi hăm Anih vei lăng tơplŏng kơdâu Việt Nam păng Hŏk vo so Việt Nam pơgơ̆r tơdrong thi dôm Câu lạc bộ Hŏk vo so lơ̆m teh đak ‘măng mă XV sơnăm 2026. Tơdrong thi akŏm đei 33 khul hăm hlŏh 900 ‘nu bơngai tang măt, khul pơtho, bơngai thi vang pơjei băl găh 2 tơdrong thi pơrŏ păng tơteh băl.

‘Nâu jĭ tơdrong gĭt kăl tơgŭm ăn dôm bơngai thi tơƀâp, pơma nuh, hơtŏk đon hlôh vao, pơvei băl kơplăh dôm tơring lơ̆m tơdrong chĕp vei, tưk tơiung kơjă kăp gĭt đơ̆ng vo so. Anih pơgơ̆r pơm hơdăh vo so jĭ tơmam kăp gĭt đơ̆ng tơdrong juăt ‘lơ̆ng, tơƀôh hơdăh jơhngâm đon ‘lơ̆ng đơ̆ng hŏk vo păng jơhngâm ‘mêm kơ teh đak đơ̆ng hơdrĕch hơdrung. Tơdrong ‘nâu vang pơm hơtŏk kơjă kăp gĭt đơ̆ng vo Việt Nam ƀât mă teh đak oei pơm hla ar tơroi ăn UNESCO hơlen năng, chih tơbăt "Vo so Bình Định" jĭ tơmam joh ayŏ kăp gĭt kơ kon bơngai.