Mă hơdăh, lơ̆m 9 jơ 30 pơnĭt gơmăng năr 29/8, lăp đơ̆ng rŏng Pơm lêh pơgơ̆r blŭng a Pơm lêh “ ‘Lơ̆ng rŏ Bri kơdrơ̆ng-Đak dơsĭ ‘lơ̆ng liĕm akŏm mĭnh ƀôt”, ‘măng pơgơ̆r soh kơ mlăi pơkao jăng păh ai đei pơgơ̆r tơ̆ Cham să Nguyễn Tất Thành (phương Trần Phú), pơih blŭng ăn pơgơ̆r jang, pơjing jơ ‘năr chơt hơ iă ‘nă hal ăn kon pơlei păng tơmoi. Kiơ̆ đơ̆ng rŏng ‘noh, lơ̆m gơmăng năr 2/9, tơ̆ Cham să Đại Đoàn Kết (phương Tây Sơn) gô pơgơ̆r soh kơ mlăi pơkao jăng lơ̆m 9 jơ 30 pơnĭt gơmăng, lăp đơ̆ng rŏng pơgơ̆r Joh ayŏ kơdŏ soang gĭt kăl kơkuh chơt hơ iă ăn Quốc khánh. Dôm kơ mlăi pơkao ‘lơ̆ng rŏ gô pơjing đei tơdrong hơ iă hloh, tơgop lang să jơhngơ̆m đon hưch hanh hơmanh bơnê, tơgoăt dih băl kơjăp kon pơlei pơla lơ̆m jơ ‘năr lêh gĭt kăl.