Tơ̆ pơlei tơm Pleiku, Jơnŭm jang gah Tơmang pơhiơ̆ dêh char Gia Lai 'nao pơgơ̆r pơma đam “Pôk pơ-ư joh ayŏ kon kông – yak hơdoi hăm tơmang pơhiơ̆ hơtŏk tơ-iung”, hăm tơdrong vang akŏm đơ̆ng Anih jang Tơmang pơhiơ̆ kơ teh đak Việt Nam păng lơ anih jang gah tơmang pơhiơ̆ lơ̆m păng 'nguaih kơ dêh char. Rim bơngai tang măt hlôi pơma đam, tơroi gah lơ trong jang tơguăt hăm hơtŏk tơmang pơhiơ̆ hăm vei răk tơƀăk mong joh ayŏ tơ̆ tơring, atŭm hăm noh tơbang hơdah tơdrong pơgăn oei đei dang ei noh ưh đei pơkăp hơdah gah khôi luơ̆t ăn tơdrong jang tơmang pơhiơ̆ pơlei pơla.

Lơ nơ̆r tơgop drơ̆ng nơ̆r Gia Lai athei chih akŏm trong chă tơroi tơbăt vă sơkơ̆t hơdah hơnăn tơmang pơhiơ̆ kăp gĭt hăm dôm um rup pơtih kăp gĭt nhen chĭng chêng, hơri hơ-'mon, rông. Mă kăl, athei pơma đam gah sơnong dơnơm ăn bơngai kon kông, tơgŭm đe yĕt kơdih chă tơroi gah joh ayŏ kon kông po kiơ̆ um rup, video păng mạng tơpôl, tơgop pơlan să joh ayŏ Gia Lai gơh 'lơ̆ng sơđơ̆ng păng kơjăp đunh đai.