Ƀơ̆t minh pơgê ah achon Nhơn Châu (Cù Lao Xanh), dôm tong duk rôp ka adoi oei dơ̆ng tơ̆ dơnŏk nhen rim năr. Hơdrô̆ pha, tơ̆ gơng dơnŏk duk đei lơ kơmăi kuay, unh pơchră, ngê̆ sih păng kơ hrĕng 'nu tơmoi. Dôm bơngai hlôi juăt hăm tơdrong hơrih rơnguơ̆ kơ pơlei jang ka dang ei jing "bơngai tơroi" dơnơm gah tơdrong hơrih kơdih po. Đe ngê̆ sih jang ka lĕch tơ̆ đak dơsĭ, môch đak lăng hơbon tơmo san hô, yak rok kiơ̆ trong iĕ kơ achon teh, pơma dơnuh hăm kon pơlei tơ̆ tơring. Ah kơmăng, đei chơnang pơdah tơdra hơri đei pơm tơ̆ achon hơvơn kơ rơbou kon pơlei păng tơmoi truh lăng.

Ưh hơdrô̆ jĭ minh tơdrong pơchơt, Nhơn Châu 'măng mă blŭng đei kơ triu tơmoi lơ̆m jơ̆p teh đak băt truh hăm dôm um rup tơpă gah kon bơngai păng tơdrong hơrih tơ̆ achon teh hơtaih yaih. Pơmai Hồ Thị Đoan Trang, oei tơ̆ thôn Tây, xah Nhơn Châu ăn tơbăt, kon pơlei chơt hơ-iă ah mă pơlei pơla po đei hơtŏk pơdah um rup kơtă păng đei akŏm pơma dơnuh hăm đe ngê̆ sih: “Inh chơt hơ-iă kơlih đunh bơih tơring teh ou pơtơm đei minh tơdrong akŏm tih hơvơn lơ tơmoi truh hăm achon Cù Lao Xanh nhôn ou. Inh hơpơi 'meh achon teh gô đei lơ tơdrong jang vă hơtŏk tơmang pơhiơ̆”.

Ƀok Nguyễn Tiến Dũng, Ƀĭ thư Đang uy xah Nhơn Châu ăn tơbăt, tơdrong đei đơ̆ng tơdrong pơchơt tơpă tơgŭm ăn achon teh đei tơbang jơ̆p jang lơ̆m dôm tơdrong tơroi tơbăt, hơvơn lơ tơmoi truh hăm tơring ou:  "Lơ̆m tơdrong akŏm “Say Hi rực rỡ” yơ̆ng ou ki đei hơtŏk lơ̆m tơdrong tơroi tơbăt tơpôl, đei lơ kon pơlei păng tơmoi hlôi băt truh Nhơn Châu. Inh hơpơi 'meh Nhơn Châu hăm mŭk drăm hlôi đei, păng tơdrong gơh jang ou, gô hơvơn lơ tơmoi truh hloh, vă tơƀôh um rup, kon bơngai, tơdrong arih tơ̆ tơring păng cham char plenh teh tơ̆ ou vă jang hơtŏk tơ-iung lơ̆m khei năr truh"

Atŭm hăm tơdrong pơdah um rup kơtă, Gia Lai oei tơroi kơ dôm tơdrong kơdih po kiơ̆ phim đei pơm. Pơtăl kơ pơm phim ah hơnih kuay pơkăp, lơ khul pơm phim rơih dôm hơnih tơguăt hăm tơdrong tơblah Tây Sơn vă pơdah dơ̆ng gah chăl hơrih nuih mơng sơ̆. Hơnih linh oei, hơnih pơhrăm linh, hơnih kron aseh dah mă hnam phak đei pơm kăp gĭt ưh hơdrô̆ 'măn ăn tơdrong pơm phim đĕch ôh.

Đơ̆ng rŏng kơ phim keh đang, tôm hơnih ou gô đei răk vei nhen minh hơnih pơm phim pơih să, hơnih mă tơmoi gơh hơlen băt gah chăl hơrih, hơlen băt gah joh ayŏ păng hlôh vao hơdah gah tơring teh đei lăng jĭ hơnih tơm kơ tơdrong bioh Tây Sơn. Bơngai pơm phim Võ Đức tŏk bŏk oei pơm phim tơ̆ xah Tây Sơn tơroi:  “Nhôn 'meh pơtruh ăn bơngai lăng gah dôm tơdrong 'nao iŏk đơ̆ng tơdrong đei tơpă, vă bơngai đei pơtih lơ̆m phim gơh trŏ hăm tơdrong arih kơ rim bơngai hloh. Pơm phim 'măng mă ou 'noh 'măn ăn tơdrong jang tơmang pơhiơ̆, thoi lĕ răk minh mŭk drăm iĕ mă khul pơm phim răk ăn pơlei pơla kơdih po".

Mưh phim đei răk vei lơ̆m đon bơnôh noh tơdra hơri pơih minh trong 'nao ăn đe sơnăm mơlôh truh hăm Gia Lai. Mega Concert "Gia Lai – Bri kông truh đak dơsĭ jơk" lơ̆m lêh pơtơm kơ Sơnăm Tơmang pơhiơ̆ kơ teh đak 2026 pơgơ̆r tơ̆ tơring kơdrơ̆m đak dơsĭ Quy Nhơn hlôi akŏm đei lơ ngê̆ sih mă đe ư ang, hơvơn đei pơhlom 70.000 tơmoi đơ̆ng lơ dêh char, pơlei tơm truh lăng. Đei lơ bơngai 'măng blŭng năm truh Gia Lai vă lăng kơmăng tơdra hơri, mă lei đơ̆ng rŏng kơ noh akŏm năr vă chă hơlen băt đak dơsĭ, bri kông păng joh ayŏ kon pơlei tơ̆ tơring. Buăl mơlôh Lê Thanh Phương Hạ ăn tơbăt:  “Inh truh đơ̆ng Nha Trang. 'Măng mă blŭng tơring Tŏk bŏk đei pơgơ̆r minh concert kăp gĭt thoi ou, noh inh athei năm lăng”.

Dôm tơdrong tơroi đei pơdah um rup, phim păng tơdra hơri tŏk bŏk pơyua hơdah ăn tơdrong jang hơtŏk tơmang pơhiơ̆ kơ dêh char Gia Lai. Lơ̆m khei 7/2026, dêh char sơng đei pơhlom 1,8 triu 'nu tơmoi, tŏk 40% pơtêng hăm khei năr ou sơnăm sơ̆. Tơdrong pơyua lơ̆m 7 khei đei hloh 10,55 triu 'nu tơmoi. Lơ̆m noh, tơmoi đơ̆ng teh đak đe tŏk pơhlom 77%. Đei yua đơ̆ng tơmang pơhiơ̆ đei jê̆ 23.000 tih hlj, tŏk 22%.

Đơ̆ng rŏng kơsô̆ noh jing tơdrong tơplih gah trong jang tơmang pơhiơ̆: đơ̆ng tơbang hơnih truh tơmang truh tơdrong hơlen băt; đơ̆ng tơroi gah cham char plenh teh 'lơ̆ng truh tơroi tơbăt pơm ăn tơmoi kơdih 'meh năm chă hơlen băt. Ƀok Hà Văn Siêu, Phŏ Kơdră Hơnih jang Tơmang pơhiơ̆ kơ teh đak Việt Nam akhan, dêh char Gia Lai kăl iŏk yua trong jang 'nao ou: “Gia Lai athei pơm thoi yơ vă vei tơmoi oei tơmang đunh hloh hăm dôm tơdrong hơlen jrŭ hloh, tơmơ̆ng dôm tơdrong tơroi hơ-iă hloh kơ minh hơnih truh tơmang. Gia Lai athei iŏk yua gah kơmăi kơsô̆ vă chih tơmơ̆t rim mŭk drăm cham char 'măn ăn tơdrong jang tơmang pơhiơ̆. Bơ̆n iŏk yua kơmăi kơsô̆ vă tơroi kơ dôm tơdrong 'lơ̆ng kơ Gia Lai gô jing trong jang tơm kăp gĭt ăn tơdrong jang tơmang pơhiơ̆ Gia Lai pơma hơdrô̆ păng Việt Nam pơma atŭm lơ̆m khei năr truh"

Gia Lai tŏk bŏk oei rơih trong pơm jang pơchơt pơhiơ̆ ưh kơsĭ vă pơjing tơdrong kơđeh khei năr, mă vă lơ̆m rim tơdrong pơdah phim, rim phim pơdah, rim tơdrong akŏm joh hơri jing minh nơ̆r hơvơn chă tơmang lăng tơring teh. Păng ah kon pơlei tơ̆ tơring jing minh pah kơ dôm tơdrong tơroi 'noh, tơmang pơhiơ̆ ưh hơdrô̆ đei tơbang, mă oei đei hơtŏk hăm kơdih um ai joh ayŏ kơdih kơ kon pơlei pơla.