Pơma tơ̆ jơ pơm lêh, Thủ tướng pôk pơ ư Đảng ƀô̆, khul kơdră tơring păng kon pơlei Quảng Ninh kŭm hăm dôm tơring ƀơm truh adrin chih hơmet hla ar. Thủ tướng athei anih jang kơpal jăh hơmet pơ ‘lơ̆ng khôi luơ̆t, tơdrong hơgăt vei lăng đơ̆ng teh đak păng tơring, chih hơdăh hơnăp jang đơ̆ng dôm anih jang đei ƀơm truh, jang hơdoi hăm khul tơpôl vang vei lăng mă ‘lơ̆ng.

Atŭm hăm ‘nŏh, athei chih hơdăh dôm tơdrong krê ƀơm ưh ‘lơ̆ng truh tơ̆ anih gru groa, pơjing trong tang găn, pơm tơjur ƀiơ̆ tơdrong răm đơ̆ng sar bar, ‘mê̆ ‘mach cham char păng vei lăng ‘lơ̆ng kơsô̆ tơmoi trui tơmang lăng. Tơdrong dôm anih gru groa âu đei chih tơbăt jĭ anih jŏh ayŏ kăp gĭt kơ apŭng plenh teh sư tơƀôh hơdăh kơjă kăp gĭt jơ̆p plei teh, atŭm hăm ‘nŏh pơjing jơhngâm pran vă atŏk tơiung chă tơmang lăng, jŏh ayŏ kơ dŏ xoang păng muk drăm, tơpôl kơjăp ‘lơ̆ng.