Hơnih pai gŏ iĕ kơ unh hnam pơmai Ksor H’Liên, 37 sơnăm, re ang jơva peh tơmam. Lơ̆m hơnih noh, đei tơnuh unh khơ̆ng rơhêm, đei hơkă, get đak, plei hơƀo kro hơtol tơ̆ chơnĕng hnam... Minh pôm điê̆n thuăi thŏng minh đei 'măn bot vă chih akŏm rim tơdrong mă H’Liên pơm.

Pơmai pai rah 'nhot xa, kơdih kuay rah video. Đơ̆ng hơmŏ tôm tơmam pai xa truh ah 'nhot xa đei pai keh đang, tôm đei phĭn akŏm păng hơtŏk lơ̆m mạng tơpôl. Hăm H’Liên, tơnuh unh iĕ noh ưh hơdrô̆ jing hơnih pai xa kơ unh hnam, mă oei pơm ăn kơ sư hơdơ̆r gah tơdrong hơrih oei xa kơ bơngai Jarai:  “Hăm inh, hơnih pai gŏ ou ưh hơdrô̆ pai xa ăn unh hnam mă oei jing hơnih inh 'meh răk vei dôm tơdrong hơrih kơ bơngai Jarai nhôn. Yuơ noh, inh hơdrin pơjing đei hơnih 'măn pai gŏ, đei hơkăt, get đak, đei hơƀo kro... Inh adoi 'meh vă ah đe truh tơ̆ ou noh hơlen băt lơ hloh gah trong mă Jarai sŏng xa, et nhă păng vei răk tơƀăk mong tơdrong joh ayŏ”

Hơbŏ đơ̆ng dôm um rup ƀônh ƀŏ noh hlôi pơjing đei um ai kơdih lơ̆m lơ video mă H’Liên pơm đei. Đơ̆ng hơnih pai gŏ iĕ, dôm tơmam xa juăt jue lơ̆m tơdrong hơrih kơ bơngai Jarai nhen hla ƀlang xao, pro peh hăm ka kro, ƀoh hơmrĕ hmôch trit... pơtơm đei hơtŏk lơ̆m mạng tơpôl, truh hăm lơ bơngai hloh. Ah mă dôm video đei H’Liên pơm hơtŏk lơ̆m tai khuan facebook Mị Son, hlôi hơvơn kơ hrĕng rơbou, truh kơ triu bơngai lăng păng pơtruh nơ̆r:  “Ƀơ̆t blŭng inh tơchĕng pơm phim vă răk 'măn đĕch, đang kơ noh pơtruh ăn bôl buăl, 'nhŏng oh chă lăng. Ưh kơ ê dôm video 'noh đei lơ bơngai băt truh. Đei nơ̆r apinh gah tơdrong pai 'nhot xa, apinh gah khôi juăt kơ bơngai Jarai. Inh ƀôh hơ-iă lơ̆m đon bơnôh păng adoi ưh kơ ê đei lơ bơngai băt thoi ou”

Đơ̆ng dôm tơdrong băt truh noh, dôm 'nhot xa lơ̆m video adoi kăl đei trong pơtruh ăn bơngai lăng. Pơmai H’Liên pơm 'nhot xa păng tơroi lơ̆m mạng tơpôl. Dôm 'nhot xa juăt jue ưh hơdrô̆ đei lơ bơngai băt hloh mă oei đei jên pơyua ăn unh hnam. Mă kăl, 'nhot ka hơ̆p peh hla ĕch păng ƀoh hơmrĕ hmôch trit đei lơ bơngai lăp:  “Ƀơ̆t inh pai dôm 'nhot mă ou vă 'măn sŏng xa lơ̆m unh hnam đĕch. Đơ̆ng rŏng kơ video đei lơ bơngai lăng noh đei lơ bơngai pơtruh nơ̆r apinh: “mŏ hăm đei tĕch ưh”, “hăm gơh gơih ăn kơ inh keh peh ưh”. Ƀơ̆t doh inh pơtơm tơchĕng, mưh lơ bơngai lăp 'nhot xa ou, 'noh ba kuă kiơ kơ pơm vă chă tĕch. Păng ka hấp peh hla ĕch noh 'nhot mă pơm 'lơ̆ng hloh, kơlih ou jĭ 'nhot juăt xa kơ bơngai Jarai păng adoi jing 'nhot xa đei lơ bơngai apinh hloh. Dang ei, 'nguaih kơ chă tơroi gah 'nhot xa lơ̆m mạng tơpôl, 'noh inh adoi chă đei jên yua ăn unh hnam”.

Đơ̆ng rŏng kơ phim đei kơtriu bơngai lăng noh, oei đei tơdrong hơlêm tơgŭm đơ̆ng unh hnam, mă kăl noh klo pơmai, 'nhŏng Ksor Hai. 'Nhŏng noh jĭ bơngai yak hơdoi, bơ̆ng pang tôm tơdrong pơtơm đơ̆ng blŭng kuay video, păng adoi jing bơngai hlôh vao kloh klĕch hloh tơdrong sô̆, tơdrong lăp đon mă pơmai akŏm ăn tơdrong jang ou:  “Ƀơ̆t blŭng ƀôh hơkăn inh pai 'nhot xa kon pơlei nhôn, unh hnam adoi ưh kơ ê dôm 'nhot xa ou đei lơ bơngai băt truh. Ƀôh sư lăp đon păng roi năr pơm roi 'lơ̆ng noh rim bơngai tơgŭm sư. Unh hnam adoi hơ-iă lơ̆m đon, kơlih dôm video noh, đei lơ bơngai băt truh 'nhot xa kơ bơngai Jarai”.

Tơdrong pơjing đei tơdrong 'lơ̆ng lơ̆m dôm video mă pơmai H’Liên pơm ưh đei oei lơ̆m tơdrong chrih chrai ôh, mă đơ̆ng um rup ƀônh ƀŏ, tơpă. Pơmai Phan Thị Liên, tơ̆ phương Pleiku, dêh char Gia Lai ăn tơbăt:  “Inh lăp hăm phim mă H’Liên pơm, kơlih hăp tơguăt tơjê̆ hăm tơdrong hơrih. Kiơ̆ đơ̆ng dôm tơdrong tơroi kơ tơdrong hơrih ưh hơdrô̆ tơgŭm ăn rim bơngai băt hơdah hloh gah tơdrong hơrih, joh ayŏ kơ bơngai Jarai mă oei răk vei dôm tơdrong 'lơ̆ng, tơdrong juăt kơ pơlei pơla”.

Đơ̆ng dôm 'nhot xa juăt jue lơ̆m hơnih pai gŏ kơ unh hnam, pơmai H’Liên tŏk bŏk hơnhăk tơdrong tơroi gah tơdrong hơrih păng joh ayŏ Jarai truh tơjê̆ hloh hăm lơ bơngai kiơ̆ đơ̆ng tơdrong đei tơpă:  “Inh ưh đei tơchĕng kơdih inh oei pơm tơdrong tih tên kiơ. Inh 'meh pai dôm 'nhot xa mă inh băt. Mă lei mưh kiơ̆ đơ̆ng 'nhot xa noh mă rim bơngai băt hơdah ƀiơ̆ gah bơngai Jarai 'noh inh tơchĕng, ou adoi jĭ trong vă vei răk tơƀăk mong joh ayŏ po kơdih. Păng inh hơpơi 'meh ning nai kơnh, dôm 'nhot xa ou adoi oei đei pai pơjing, oei đei lơ bơngai băt truh, ưh hơdrô̆ lơ̆m pơlei pơla, mă oei păr truh dôm tơring nai hloi”.