Ƀât hơnăp hang lơng hnam kơjung, Kră pơlei – ngê̆ nhân Rơ Châm Nha oei tuĕnh hơmet tĭng ning, ƀok vei lăng sư nhen thoi 1 tơmam chĕp vei dôm tơdrong juăt ‘lơ̆ng đơ̆ng chăl sơ̆, uơ uĕt hơ nglou ƀok reh tơ̆ tơlei, hăm lơ boa jur tŏk, jrang hơbôn tôch hiôk. Măt ƀok hue lăng tơ̆ hơtăih, nhen oei hnhoi kiơ̆ boa tĭng nĭng, chă tơroi dơ̆ng dôm tơdrong lơ̆m pơlei păng kơdih kâu chă ‘nao iung tơdăm sơ̆.

‘Nŏh jĭ ƀât ‘nao tơ̆l 20 sơnăm, ƀok vang pơm du kĭch tơ̆ tơring, đang kơ ‘noh vang jang lơ̆m khul druh dăm xung phong, bơ̆ jang pơdŭ, chơ chuĕn phe ƀa, tơmam xa ăn ƀô đô̆i tơblăh Mi. Sơnăm 1968, ƀok iŏk unh om păng hơnơ̆ng pơm du kĭch tơ̆ tơring. Lơ̆m dôm sơnăm tơblăh sơ̆, mă đơ̆ng tôch pơmat tat ră mă lei Rơ Châm Nha oei hơnơ̆ng 1 jơhngâm kiơ̆ Đảng, kiơ̆ ƀok Hồ, vang tơgop jơhngâm ăn tơdrong tơblăh iŏk rơngei tơring Pơbăh, pơjing đei mĭnh teh đak kơjăp 'lơ̆ng.

“Lơ̆m dôm sơnăm 1961-1962, inh noh tơdăm lơ̆m pơlei. Truh sơnăm 1963 inh đei tơmơ̆t jang Đoan păng truh sơnăm 1965 inh đei pơjao pơm Kơdră khŭl du kích. Ah kơ-'năr noh jang lơ̆m pơlei pơla, truh ah kơmăng, 'nhăk ƀô đô̆i năm tơblah tơ̆ kơđông đe ayăt. Kang ƀô̆ păng ƀô đô̆i khei năr noh ưh đei bơngai 'nhăk tơƀôh ăn trong vă vih vơ̆t. Kơlih inh noh bơngai tơ̆ tơring, băt hơdah tơdrong mă ayăt chă pơđep pơjuă păng hơnih oei kơ đe ayăt tơ̆ hơnih ayơ, kông mă yơ noh inh 'nhăk ƀô đô̆i năm tơblah kơđông ayăt păng đei iŏk jơnei”.

Bou truh ‘năr 30/4/1975 – jơnăr tơblăh iŏk rơngei tơring Pơbăh 30/4/1975 – măt kră pơlei, ngê̆ nhân Rơ Châm Nha nhen roi hơdăh, ƀơ̆r hơ hiĕk tôch hơiă. Ƀok  athei sâu sư ‘nŏh Rơ Châm Tứ teh ngôi chĭng klơk hơdai hăm ƀok reh tĭng ning kiơ̆ ƀai Hơiă kơ teh đak rơngei.

“Jơhngơ̆m đon tôch chơt ah mă teh đak đei tơblah jơnei rơngei keh kong. Đơ̆ng rŏng kơ tơblah ayăt đang, teh đak đei iŏk rơngei, rim bơngai đơ̆ng iĕ khĕ kră, hơdruh tơdăm bu bu kŭm sô̆ chơt nhen hlôi đei yaih tơlei chô̆ hret, chơt hơ-iă atŭm hăm pơlei pơla. Pơm kiơ̆ nơ̆r krao hơvơn pơjing grŭp hơdruh tơdăm chă tơroi tơbăt, minh grŭp akŏm pơdah joh ayŏ kơdŏ suang, minh grŭp năm jang mŭk drăm, hơmet tơ-iung pơlei pơla teh đak. Chơt hơ-iă kơlih đei rơngei hiôk hian, tôn chĭng chêng, hơsuang mơ̆ng kơ vă”.

Hăm kră pơlei – ngê̆ nhân Rơ Châm Nha, đei reh tĭng nĭng, tôn bơ̆n chĭng chêng ƀât tơbăt 51 sơnăm Tơblăh iŏk rơngei tơring Pơbăh, pơjing đei 1 teh đak kơjăp ‘lơ̆ng ‘nŏh jĭ tơdrong hơiă hlŏh, tơ̆ âu jơva đơ̆ng tĭng nĭng, chĭng klơk nhen mât hơdai hăm jơhngâm hưch hanh, hơiă kơ pơlei pơla, teh đak tơplĭh ‘nao ‘lơ̆ng rŏ./.