Lơ̆m 3 năr pơdơh lêh soi kơ ƀok Pơtao Hùng Vương, tơmang lăng Lâm Đồng chih iŏk kơsô̆ tơmoi tŏk lơ, lơ anih ƀĭch pơdơh ƀĕnh bơngai ƀĭch pơdơh, dôm tơdrong jang joh ayŏ - tơmang lăng pơgơ̆r ‘lơ̆ng hơiă. Đơ̆ng ‘năr 25–27/4, dêh char Lâm Đồng sơng dang 350.000 ‘nu tơmoi chă năm lăng, ƀĭch pơdơh, lơ̆m noh đei 14.000 ‘nu tơmoi apŭng plĕnh teh; akŏm iŏk yua đei dang 768 ti hlak jên. Kŏng suơ̆t lăm jô̆ pơhlom đei 65–75%, hơdrô̆ hnam hô tel 3–5 sao đei 80–95%.

Kiơ̆ kơ Anih vei lăng găh Joh ayŏ, Tơplŏng kơdâu păng Chă tơmang lăng dêh char Lâm Đồng, gơnang đơ̆ng hơmet ăn hrôih kơna tơdrong sơđơ̆ng tơpôl, sơđơ̆ng trong nơnăm, tang găn ŭnh sa pĭt ŭnh sa păng vei lăng rơgoh ‘lơ̆ng tơmam sa tơ̆ rim hơnih chă tơmang lăng đei vei sơđơ̆ng; kơjă pơvih pơvăn, mă loi ‘noh jĭ kơjă lăm ƀĭch pơdơh sơđơ̆ng hiôk, ưh kơđei tơdrong pơgơ̆ kơjă, dui iŏk tơmoi. Lơ̆m ‘măng pơdơh lêh 3 năr, lơ tơdrong jang joh ayŏ - chă tơmang lăng nhen tơdrong soi pơyơ̆r, nơnăm pơrŏ, joh hơri hơsoang, pơngôi pơchơt kră sơ̆... đei pơgơ̆r, pơm tơdrong hơiă sơng đei tơmoi, tơgop pơdui đunh jơ năr ƀĭch pơdơh păng hơtŏk jên pơhoach.