Tơ̆ Anih soi Lạc Giao, phường Buôn Ma Thuột, Anih vei lăng joh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk pơgơ̆r tơdrong hơri hơxoang “Ƀai hơri kơtang nuih mơng Khei 4”, hăm 2 jăl “Ƀai hơri kơ mĭnh teh đak kơjăp ‘lơ̆ng” păng “Đắk Lắk – Jơva re chăl ‘nao”. Tơdrong joh hơri tơƀôh dơ̆ng jăl trong iung tơblăh pơmat tat, tơƀôh dơ̆ng tơdrong gĭt kăl đơ̆ng Tơblăh jơnei Pơyan Puih mak sơnăm 1975, mă loi jĭ tơdrong tơblăh jơnei Buôn Ma Thuột, tơdrong jơnei pơih blŭng tơ̆ kơdrăn tơblăh Tây Nguyên, vang tơgop pơjing đei tơdrong jơnei tih ăn Tơdrong tơblăh Hồ Chí Minh. Atŭm hăm ‘nŏh, tơƀôh um ai ‘nao kơ Đắk Lắk đơ̆ng rŏng hlŏh 50 sơnăm iŏk rơngei. Đơ̆ng ‘năr 30/4 truh 3/5, tơ̆ phường Tuy Hòa đei pơgơ̆r lơ tơdrong hăm hơnăn “Ka ngư Đắk Lắk – Tơdrong ‘lơ̆ng đơ̆ng kâu văh” hơdai hăm “Lêh tơpăr khinh khí cầu – Păr lăng ngôi ‘năr lĕch”, vă hơiă kơ dôm năr lêh tih păng roi tơbăt tơdrong chă  tơmang lăng tơ̆ tơring.

Tơ̆ Cham să Đại Đoàn Kết, phương Pleiku, Hơnih jang vei lăng kon pơlei dêh char Gia Lai 'nao pơgơ̆r Tơdrong Joh ayŏ Kơdŏ xoang kăp gĭt “Bri kông re ang” pôk bơnê kơ jơhngơ̆m pran tơdrong tơguăt tơguăl tôm kon pơlei. Tơdrong akŏm vă tơbăt 80 sơnăm Năr Ƀok Hô gơih kơthơ ăn Hop akŏm kon pơlei kon kông tơring Pơbah tơ̆ Pleiku,  tơbăt 51 sơnăm Năr tơblăh jơnei tơring Pơbah, rơngei teh đak. Hơnih hơdah hloh kơ tơdrong akŏm noh tơdrong pơdoah dơ̆ng kơthơ chih pơtruh đơ̆ng Ƀok Kơdră Hồ Chí Minh gơih ăn  kon pơlei kon kông tơring pơbah ah sơnăm 1946.