Jơ ‘năr pơgơ̆r Yôk Ƀok tơm dơnơm Hùng Vương, jơ ‘năr pơdơ̆h lêh 30/4 păng kăl hloh pơyan tŏ ‘mi 2026, tơmoi khul păng tơmoi ŭnh hnam năm truh hăm Lâm Đồng rŏ năng gô tŏk lơ. Vă sơng hơvơn khul ou, ‘ngoăih rim tơdrong pơgơ̆r pơtrŭt năm lơ, lơ hnam tep pơdơ̆h păng hơnih tơmang pơhiơ̆ hlôi ming hơmet pơ ‘lơ̆ng, sơđơ̆ng pơvih pơvăn ‘lơ̆ng hơ iă hloh lơ̆m jơ ‘năr kăl ou. Yă Nguyễn Thị Mai Trâm, Bơngai jang tơgŭm ăn Kơdră chĕp pơgơ̆r Muine Bay Resort (Phan Thiết) tơbăt, hơnih hlôi pơjing đei lơ tơdrong pơgơ̆r ‘nao.“Đak dơsĭ tŏk bok lơ̆m pơyan ‘lơ̆ng rŏ hloh. Tơ̆ Hòn Lao, tơmoi hao rơkĭ dơng prit năm truh tơ achon dơsĭ vă môch đak chă ăng san hô dăh mă vơ̆r SUP. Tơ̆ ou đei sem, klang kok păr năm pơm tơpu kơna tơmoi ƀôh kơmăt, adoi pơgơ̆r chă môch đak glơi hơdoi hăm ka păng chă tơmang lăng san hô.

Yă Đinh Ngọc Khánh Vy, Hơnih jang mơdro sa TTC World - Thung lũng Tình yêu (Đà Lạt) tơroi, đơ̆ng blung sơnăm 2026, hơnih hlôi tơmơ̆t iŏk yoa 2 tơmam drăm ‘nao ‘noh trong pơm tơsĕr ‘ngiĕt păng trong pơm tơsĕr pơhao hrĕng. Dôm tơdrong pơgơ̆r ou tơgoăt atŭm hăm gơng pơnĭl Ngàn Thông đơ̆ng groi Mộng Mơ năm truh tơ̆ Thung lũng Tình yêu, pơmăn tơmoi chă tơmang lăng ‘lơ̆ng hơ iă:“Lơ̆m jơ ‘năr lêh 30/4 păng 1/5, nhôn hơmŏ gô sơng đei 25.000 ‘nu tơmoi, tơchĕng lăng tok 123% pơtêng hăm sơnăm sơ̆. Nhôn lui kơjăp kơ yuơ lơ̆m jơ ‘năr lêh truh ou kơnh gô pơgơ̆r hloi dôm tơdrong hle ‘măn ăn tơmoi sơnăm mơlôh, ŭnh hnam păng đe hơ ioh”.

Hơnih jang tơmang pơhiơ̆ dêh char Lâm Đồng tŏk bok atŏk kơtang tour trong teh păng tour tơgoăt dih băl tơring lơ̆m khei ‘năr cham gre păr Liên Khương pơdơ̆h jang vă ming hơmet. Atŭm hăm ‘noh, dêh char atŏk kơtang tơƀôh tơbăt lơ̆m kmăi kmŏk kơsô̆ păng pơjing hla kak tơmang pơhiơ̆ vă pơvih pơvăn ‘lơ̆ng hơ iă hloh dôm kơtơ̆ng ang ou to ăn tơmoi.

Kiơ̆ đơ̆ng ƀok Nguyễn Văn Hùng, Kơ iĕng Kơdră chĕp pơgơ̆r Khul tơmang pơhiơ̆ dêh char Lâm Đồng, dêh char gô pơgơ̆r lơ tơdrong pơgơ̆r tih nhen: Khei tơmang pơhiơ̆, Festival Pơkao. Hơdrô̆ tơmoi teh đak đe năm truh hăm Đà Lạt, rim hơnih jang tơmang pơhiơ̆ gô pơgơ̆r sơng hơvơn đơ̆ng cham gre păr Cam Ranh:“Khei năr ou ki, tơ̆ hop akŏm khul jang ba tơmoi hăm đei vang năm đơ̆ng rim dêh char, đĭ đăng jei drơ̆ng mĭnh nơ̆r tơgum djru tơmang pơhiơ̆ Lâm Đồng păng pơlei tơm Đà Lạt (so). Tơplih ăn chă yak ƀônh truh hăm gre păr nhen hơdrol, dang ei tơmoi gơh chă hao hre trong gre rĕnh dăh mă dôm jăl trong ‘lơ̆ng rŏ. Nhôn hlôi hơmet đang rim hơnih pơdơ̆h jơ̆ng sơng hơvơn, pơjing hơnih hơ iă ăn tơmoi, vă tơmoi hoei kơ hăl”.

Tơdrong tơlĕch jang ou đei tơ iung pơjing kơjăp ‘lơ̆ng. Jăl I/2026, Hơnih jang tơmang pơhiơ̆ lâm Đồng sơng đei dang 6 triu ‘nu tơmoi, tŏk hloh 20% pơtêng hăm khei năr ou sơnăm hơdrol. Mă kăl, tơmoi teh đak đe đei lơ hlôi tơgop kăl lơ̆m tơdrong atok tơ iung kơ tơdrong jang pơvih pơvăn-tơmang pơhiơ̆ kơ tơring.

Mă kăl, đơ̆ng rong hơgrop, dêh char Lâm Đồng dang ei đei cham char ‘lơ̆ng rŏ, đei ư̆ akhan "hơnih ‘lơ̆ng rŏ tơmang pơhiơ̆” akŏm đei tôm “kông kơjung-dơnou să-đak dơsĭ hlăng hnhơr-achon dơsĭ ‘lơ̆ng liĕm” pơm hơtŏk hơvơn jơhngơ̆m đon hưch hanh kơtang hăm tơmoi lơ̆m teh đak păng tơmoi teh đak đe. Ƀok Đinh Văn Tuấn, Kơ iĕng kơdră chĕp pơgơ̆r Hơnih vei lăng kon pơlei dêh char Lâm Đồng pơma hơdăh:“Dêh char Lâm Đồng tôch ‘lơ̆ng liĕm, đei tôm tơdrong, gô jing hơnih truh hle ăn tơmoi lơ̆m teh đak păng teh đak đe. Tơdrong cham gre păr Liên Khương tang ‘măng pơgia vă ming hơmet jĭ mĭnh tơdrong ưh kơ rơvơn, mă lei nhôn jei gơh pơm ăn tơdrong long jing tơdrong rơvơn hloh. ‘Nou jĭ jơ ‘năr vă tơƀôh tơbăt rim jăl trong teh ‘nao, pơjing ăn tơmoi chă tơmang ‘lơ̆ng hơ iă găh groi teh să sap kơ Lâm Đồng

Hăm dôm tơdrong pơgơ̆r ‘lơ̆ng hơ iă chă tơmang lăng đơ̆ng bri kông jur truh đak dơsĭ, hơnih jang tơmang pơhiơ̆ Lâm Đồng hơmŏ lơ̆m pơyan tơmang pơhiơ̆ Jơ ‘năr Yôk Ƀok tơm dơnơm Hùng Vương, năr pơdơ̆h lêh 30/4- 1/5, pơyan tŏ’mi 2026 gô atŏk kơtang păng iơ iơ̆r iơ iăr chơt hơ iă.